Katar ličyŭsia biaśpiečnym miescam dla pieramoŭ. Što budzie paśla ŭdaru Izraila?

U aŭtorak 9 vieraśnia ŭ stalicy Katara Dosie prahučali niekalki vybuchaŭ. Izrailskija ŭłady i vajskoŭcy zajavili, što cellu dla ataki byli lidary CHAMAS, adkaznyja za arhanizacyju napadu na Izrail 7 kastryčnika 2023 hoda.

Premjer-ministr Izraila Bińjamin Nietańjachu zajaviŭ, što daŭ zahad ab udary ŭ adkaz na napad paleścincaŭ u Ijerusalimie 8 vieraśnia hetaha hoda.

MUS Katara nieŭzabavie paśla vybuchaŭ paćvierdziła, što ŭdar pryjšoŭsia na «rezidencyju CHAMAS».

Pradstaŭniki CHAMAS zajavili Bi-bi-si, što ŭ budynku, jaki byŭ cellu dla ŭdaru, znachodziłasia kamanda pierahavorščykaŭ. Jany abmiarkoŭvali apošniuju prapanovu Vašynhtona ab spynieńni ahniu ŭ Hazie.

Pavialičyć

Pakul niezrazumieła, chto zahinuŭ u vyniku ataki. Pradstaŭniki CHAMAS kažuć, što lidary hrupoŭki, u tym liku Chalił al-Chaja, vyžyli, ale zahinuŭ jahony syn Chumam i adzin z pamočnikaŭ. Izrail pakul nie davaŭ spravazdaču pra vyniki apieracyi.

Ale ŭžo vidavočna, što paśla ŭdaru Izraila Katar naŭrad ci zastaniecca hałoŭnaj placoŭkaj dla samych roznych dalikatnych pieramoŭ, jakoj jon byŭ na praciahu apošnich dvuch dziasiatkaŭ hadoŭ.

«Heta stvaraje tryvožny precedent u tym, što tyčycca lubych budučych mirnych pieramoŭ, — adznačaje karespandent Bi-bi-si pa pytańniach biaśpieki Frenk Hardnier. — Kali navat Katar, dzie raniej prachodzili pieramovy pamiž ZŠA i «Talibanam» da 2021 hoda, bolš nie źjaŭlajecca biaśpiečnym miescam, to dzie tady jano jość?» — kaža jon.

Katar jak pasiarednik dla ŭsiaho śvietu

Ułady Katara adreahavali na ataku žorstka, ale pakul aficyjna nie zajavili pra spynieńnie svajoj pasiarednickaj roli ŭ pieramovach pamiž Izrailem i CHAMAS.

Heta ŭžo druhi raz za niekalki miesiacaŭ, kali Katar padvierhnuŭsia pramomu ŭdaru. 23 červienia Iran atakavaŭ vajskova-pavietranuju bazu Al-Udejd, u jakoj, u pryvatnaści, raźmiaščajucca VPS ZŠA. Zrešty, u vyniku ŭdaru nichto nie paciarpieŭ — amierykanskija vajskoŭcy evakujavalisia zahadzia.

Pa padlikach haziety Guardian, u lipieni 2025 hoda Katar byŭ uciahnuty ŭ 10 pracesaŭ miedyjacyi — niekatoryja ź ich prachodzili ŭnutry krainy, inšyja za jaje miežami. Mienavita Katar pačaŭ pieramovy, jakija pryviali da mirnaj damovy pamiž Demakratyčnaj Respublikaj Konha i Ruandaj.

Asabliva Katar słaviŭsia pasiarednictvam, kali havorka išła pra vyzvaleńnie zakładnikaŭ ci abmien źniavolenymi. «Jak Katar staŭ niezamiennym pieramoŭščykam dla ŭsiaho śvietu», — pad takim zahałoŭkam vyjšaŭ materyjał u časopisie New Yorker u listapadzie 2023 hoda.

Katar z samaha pačatku byŭ uciahnuty ŭ pieramovy pamiž Izrailem i CHAMAS, jakija adbyvalisia paśla napadu 7 kastryčnika. Pry pasiarednictvie Dochi baki pahadzilisia na časovaje spynieńnie ahniu i abmianiali 105 izrailskich zakładnikaŭ na 240 palestynskich źniavolenych.

U listapadzie 2024 hoda, adnak, Katar vyrašyŭ vyjści z pracesu: va ŭradzie krainy byli niezadavolenyja niežadańniem bakoŭ vieści pieramovy. Zrešty, praź niekalki miesiacaŭ, kali prezidentam ZŠA staŭ Donald Tramp, Katar znoŭ uklučyŭsia ŭ pieramovy i daŭ placoŭku dla bakoŭ u Dosie.

Udar Izraila pa Dosie ŭžo asudzili mnohija arabskija krainy, AAN, Francyja i Vialikabrytanija. Papa Leŭ XIV nazvaŭ situacyju «vielmi surjoznaj». ZŠA zajavili, što viedali pra padrychtoŭku ataki. 

«Heta surjoznaja eskałacyja kanfliktu z boku Izraila na terytoryi krainy, jakaja amal dva hady vystupała pasiarednikam pamiž im i CHAMAS, — miarkuje karespandent Bi-bi-si pry Dziarždepartamiencie Cim Biejtman. — Na fonie publičnaha abureńnia kiraŭnictva Dochi — klučavoha sajuźnika ZŠA — adziny dypłamatyčny šlach litaralna ŭzarvany, i Trampu daviadziecca spraŭlacca z nastupstvami».

• 0
• 1
• 1
• 0
• 1
• 0
• 0
• 0