«Padniabiennaha źbivaŭ były načalnik kałonii». Voś što raskazvajuć pra palitviaźnia, jaki zahinuŭ za kratami ŭ 36 hadoŭ

Hamielčuka Andreja Padniabiennaha zatrymali 5 listapada 2021 hoda. Mužčynu abvinavacili ŭ padpale mašyny načalnika homielskaha abłasnoha ŭpraŭleńnia Departamienta vykanańnia pakarańniaŭ, prakole kołaŭ u 39 tralejbusaŭ, stvareńni i administravańni telehram-kanała i čata, jakija pryznali ekstremisckimi farmiravańniami. Padniabiennaha asudzili pa siami ciažkich artykułach, u tym liku i pa artykule «akt teraryzmu». Spačatku jamu dali 15 hadoŭ źniavoleńnia, paźniej prysudzili jašče hod i vosiem miesiacaŭ.

Andrej apynuŭsia ŭ kałonii ŭ Mahilovie ŭ žniŭni-vieraśni 2023 hoda. Užo praź niekalki dzion, uspaminajuć znajomyja chłopca pa kałonii, jaho nakiravali ŭ ŠIZA, kudy potym znoŭ i znoŭ viartali. Chutčej za ŭsio,

u sumie chłopiec pravioŭ u ŠIZA nie mienš za 50 sutak.

U hutarkach ź inšymi viaźniami hamialčuk raskazvaŭ pra tuju mašynu siłavika, u padpale jakoj jaho abvinavacili. Pavodle słoŭ Andreja, jon išoŭ mima toj mašyny, u jakoj byli pabityja vokny, i kinuŭ u hetaje akno niepatušany byčok. Ad hetaha zaharełasia siaduška ŭ mašynie.

Spačatku, havaryŭ Andrej, jon za tuju siadušku zapłaciŭ štraf. A praz paŭhoda pa chłopca pryjšli, i jon apynuŭsia za kratami.

Daloka nie ŭsie viaźni kamunikavali z Andrejem u kałonii. Bajalisia, što za kantakty z «terarystam», jaki maje taki vialiki termin, ich mohuć niejak pakarać. Adnojčy kiraŭnictva kałonii pabačyła, što Andrej časta kamunikuje ź niekatorymi viaźniami, i pierakinuła jaho ŭ inšy atrad. Heta byŭ atrad 18, u jakim bolšaść — viaźni-piensijaniery.

U tym atradzie chłopiec atrymaŭ mahčymaść nie chadzić pracavać na pramzonu — zamiest hetaha jon padmiataŭ terytoryju kałonii i prybiraŭ śnieh. Adzin ź viaźniaŭ uspaminaje, što ŭ Andreja była niejkaja chraničnaja chvaroba, tamu Padniabienny sam imknuŭsia znajści bolš lohkuju pracu, jakaja pasavała b jamu pa zdaroŭi. Taksama jon časta chadziŭ u miedčaść kałonii.

Pavialičyć

Pry hetym Andrej imknuŭsia sačyć za zdaroŭjem — adzin ź viaźniaŭ uspaminaje, jak jon adciskaŭsia.

U kałonii Andreju było ciažka, i sprava nie tolki ŭ ŠIZA, dzie jon časta byvaŭ.

Chłopca časta pazbaŭlali pasyłak, tamu inšyja viaźni jaho padkormlivali i dzialilisia ź im rečami. Taksama Andrej raskazvaŭ znajomym, što były načalnik PK-15 Alaksiej Łazarenka źbivaŭ jaho.

Adzin ź viaźniaŭ, ź jakim my pahutaryli, uspaminaje Andreja jak adnaho z samych dobrych i razumnych viaźniaŭ, z kim mieŭ spravu ŭ toj kałonii. Pavodle jaho, Andrej byŭ vielmi vietlivym čałaviekam, ad jakoha jon nie čuŭ ni słova łajanki.

«Jon vieryŭ, zaŭždy kazaŭ, što budzie iści da kanca. Ja płakaŭ siońnia, kali daviedaŭsia — nastolki dobry jon byŭ čałaviek. Andrej kazaŭ, što projdzie praz usio… Jon byŭ mocny čałaviek», — uspaminaje zahinułaha viaźnia jaho znajomy.

U Andreja zastałosia troje dziaciej.

• 2
• 0
• 0
• 8
• 1
• 74
• 23
• 0