Finalistki «Mis śvietu na vazku» pradstaviać krainu ŭ nacyjanalnych kaściumach
Na konkurs pryhažości ŭ Varšavu ad Biełarusi pajeduć dźvie dziaŭčyny — Anhielina Uelskaja i Alaksandra Čyčykava.
Anhielina zaniataja ŭ madelnym biznesie ŭžo daŭno: jana stała pieršaj u krainie, chto, majučy dyjahnaz DCP, pačaŭ prakładać sabie šlach u industryju pryhažości.
Sioleta jana źniałasia ŭ ščyraj niu-fotasiesii, kab dakazać, što ŭ kožnym ciele jość seksualnaść. Akramia Biełarusi, Uelskuju viedajuć taksama ŭ Rasii i Ukrainie.
Druhaja ŭdzielnica, Alaksandra, tolki pačynaje sprabavać siabie ŭ roli madeli.
Jana «złamałasia» u 17 hadoŭ, ciapier joj 23: za hety čas dziaŭčyna navučyłasia žyć pa-novamu. Chutka atrymaje adukacyju psichołaha, udzielničaje ŭ pastanoŭkach Svabodnaha teatra i chodzić u trenažornuju zału. Udzieł u konkursie pryhažości — heta spantannaje rašeńnie, ale ciapier Saša vielmi radaja tamu, što prajšła ŭ finalistki.
Jak i Anhielina, svaim prykładam jana choča łamać stereatypy pra ludziej na vazočkach i natchniać chłopcaŭ i dziaŭčat z abmiežavanymi mahčymaściami na toje, kab być aktyŭnymi.
«Biełarusy z adroznymi mahčymaściami nie razumiejuć svajoj samakaštoŭnaści, nienavidziać siabie, saromiejucca svajho cieła i žadańniaŭ. I tamu stanoviacca jašče bolš niaščasnymi. Ja kryču ŭsim: budźcie volnymi ŭnutry, tady zdabudziecie svabodu zvonku! Na žal, moj hołas pakul nie ŭsie čujuć. Ale ŭsio źmienicca», — ličyć Anhielina.
Užo viadoma, što ŭ finale Anhielina i Saša pradstaviać honar krainy ŭ nacyjanalnych kaściumach. Kančatkovy varyjant sukienak pakul chavajuć u sakrecie. Pieršy kamplekt vopratki dla Sašy stvarali ŭ Dziaržynskim DK, ale nie fakt, što jana vyjdzie na scenu mienavita ŭ hetym stroi.
Madeli nie ličuć siabie kankurentkami: kali chacia b adna ź ich pryviazie damoŭ status «Mis śvietu na vazku», heta budzie šmat značyć i dla krainy, i dla nacyjanalnaj śfiery pryhažości ŭ pryvatnaści.
6 vieraśnia startavała internet-hałasavańnie, jakoje vyznačyć samuju papularnuju pryhažuniu. Finał konkursu projdzie 7 kastryčnika. Zaŭziejem za našych!
Ciapier čytajuć
Aryštavany viadomy nieŭrołah Rusłan Badamšyn. Jon byŭ na chatniaj chimii12
Kamientary