Znojdzienaja piataja płanieta Soniečnaj sistemy, vakoł jakoj jość koła
Na kanfierencyi Astrafizičnaha instytuta Andałusii ŭ ispanskim horadzie Hranada astranomy paviedamili, što karlikavaja płanieta Chaŭmiea akazałasia piataj płanietaj Soniečnaje sistemy, vakoł jakoj krucicca hazapyłavaje koła.
«My viedali, što Chaŭmiea zakryje saboj śviatło adnoj z zorak 21 studzienia hetaha hoda, i heta sapraŭdy zaŭvažyli adrazu 12 teleskopaŭ ź dziesiaci roznych jeŭrapiejskich absiervatoryj. Hetyja nazirańni dapamahli nam daviedacca dakładnuju formu i pamiery Chaŭmiea i adkryć, da našaha vialikaha ździŭleńnia, što my mocna niedaaceńvali jaje pamiery i prykmietna pieraaceńvali jaje jarkaść», — raspaviadaje Chase Ortyz.
Vialikim adkryćciom dla navukovaha śvietu stała toje, što vakoł płaniety krucicca koda, akurat jak vakoł Saturna. Ale Chaŭmiea — karlikavaja ćviordaja płanieta. Raniej ličyłasia, što koły ŭtvarajucca vyklučna vakoł hazavych hihantaŭ, bo tyja majuć mocnaje pryciahnieńnie i vialikuju kolkaść kamianistych i ledzianych spadarožnikaŭ, jakija płaniety mohuć «raskryšyć» i pieratvaryć u vielmi tonkaje koła.
Hetaje ŭjaŭleńnie było abvierhnutaje čatyry hady tamu, kali astranomy znajšli asteroid Charykła, što vałodaje svajoj ułasnaj sistemaj kolcaŭ. I voś, ciapier dakładna viadoma, što ŭ našaj zornaj sistemie isnuje jašče adna płanieta z kołam.
Chaŭmiea, jak raspaviadajuć navukoŭcy, tak daloka raźmieščana ad Sonca, što hod na joj ciahniecca prykładna 280 ziamnych hadoŭ. Ale pry hetym karlikavaja płanieta ździajśniaje adzin abarot vakoł svajoj vosi ŭsiaho za try hadziny, što ažno ŭ vosiem razoŭ chutčej za Ziamlu! Pa svaich pamierach i masie jana źjaŭlajecca amal poŭnym anałaham Płutona, adnak ułaścivaści jaje pavierchni pakul zastajucca zahadkaj dla navukoŭcaŭ praź vielmi vialikuju addalenaść ad Ziamli.
Ciapier čytajuć
Taksistka z Tadžykistana naśmierć źbiła biełarusku ŭ Polščy — i spakojna pakinuła krainu24
Kamientary