Kanapackaja spyniła supracoŭnictva sa svaim pamočnikam Dzianisam Cichanienkam? Raźbirajemsia
Tydzień tamu ciapierašni staršynia AHP Anatol Labiedźka ŭ intervju «Biełaruskamu partyzanu» paviedamiŭ: «Hanna Kanapackaja zrabiła zajavu, što prypyniła supracoŭnictva sa svaim hałoŭnym strateham i pamočnikam Dzianisam Cichanienka. Pra heta jana zajaviła publična. Było šmat krytyki, šmat čaho pisałasia na jaje staroncy ŭ sacyjalnych sietkach, Hanna nie mahła heta rastłumačyć».
Cichanienka byŭ z Kanapackaj u kamandzie ad momantu abrańnia apošniaj deputatkaj Pałaty pradstaŭnikoŭ. Letaś Kanapackaja i Cichanienka abvieścili ab stvareńni hramadzianskaj kampanii «Napierad, Biełaruś!»
Praŭda, kiraŭnictva AHP zajaviła, što heta supiarečyć statutu partyi. Usiu adkaznaść na siabie ŭziaŭ Dzianis Cichanienka, jaki ŭ kastryčniku 2017 napisaŭ zajavu ab vychadzie z AHP. Hanna Kanapackaja zastajecca ŭ šerahach partyi.
My spytalisia ŭ Dzianisa Cichanienki, ci adpaviadajuć słovy Labiedźki praŭdzie: «Nie adpaviadaje — heta čarhovaja chłuśnia Labiedźki. Jamu patrebnyja tolki skandały. Ja liču nižej za svaju hodnaść reahavać na heta. Havorka była ab tym, što ja nie budu vieści sacsietki Kanapackaj. Bo haračyja hałovy AHP i ŭ hetym mianie abvinavačvali», — skazaŭ Cichanienka.
Jon praciahvaje źjaŭlacca pamočnikam deputata, atrymoŭvaje zarobak.
Hanna Kanapackaja paviedamiła «Našaj Nivie», što prypynieńnie supracoŭnictva tyčycca kampanii «Napierad, Biełaruś», ale Cichanienka praciahvaje być jaje pamočnikam jak deputata.
Dzianis Cichanienka naradziŭsia ŭ 1974-m u Minsku. Pa adukacyi — palitołah. Baćka traich dziaciej.
Kanapackaja maje namier zaniać pasadu staršyni AHP na źjeździe, jaki adbudziecca 8 lipienia. Jaje supierniki — Vasil Palakoŭ i Mikałaj Kazłoŭ.
Kamientary