Łukašenka vydaŭ amerykancu sakret polišynela
Kaniečnie, možna ŭjavić sabie, što Kreml zusim źjedzie z hłuzdu. Ale ja raiŭ by sačyć za hetym siužetam jak za vialikim šoŭ, u jakim kožny aktor maje svaje pijaraŭskija dyvidendy. Piša ŭ svaim błohu Alaksandar Kłaskoŭski.
“Iskandery” — heta cacka, patrebnaja najpierš dziela ŭciechi vajskovych ambicyjaŭ samoha biełaruskaha kiraŭnictva. Imaviernaja pastaŭka hetaj zbroi ŭ našu krainu maje bolej čym uskosnaje dačynieńnie da słavutaha asymetryčnaha adkazu Maskvy na amerykanskuju PRA. Vysnovu, zroblenuju aŭtaram hetych radkoŭ u papiarednim artykule, faktyčna paćvierdzili adkazy Łukašenki na pytańni žurnalista “Ŭoł-stryt džorneł”.
Kali b Maskva tak užo hareła žadańniem pastavić u nas tyja “Iskandery”, dyk, budźcie ŭpeŭnienyja, tutejšaje načalstva nia tolki nie zapłaciła b za ich ni hraša, ale jašče b i sadrała z Kramla dadatkovyja bonusy.
A tak vyśviatlajecca, što “zaraz u nas niama na heta srodkaŭ, ale atrymać takuju zbroju — ja zaraz vydam tajamnicu — my planujem”.
Zrešty, amataram sensacyjaŭ varta prosta ŭzbroicca kartaj dy liniejkaj, kab pierakanacca, što tut šmat šumu ź ničoha. “Iskander –E”, to bok ekspartny varyjant, bje na 280 km. Hetymi ATRK miarkujecca ŭzbroić 465-ju rakietnuju bryhadu ŭ pasiołku Cel pad Asipovičami. Adtul da polskaj miažy nie dabješ — chiba što da rasiejskaj :) Ja ŭžo nie kažu pra českuju terytoryju: ad Bieraścia da palihonu Brdy, dzie miarkujecca pastavić radar, naŭprost až 850 km.
Navat kali 465-ju bryhadu z-pad Asipovičaŭ pierakinuć na našu zachodniuju miažu, to “Iskanderami-E” ŭsio adno nie dastać da polskaha Słupsku, dzie buduć (kali buduć) šachty z antyrakietami. A voś z-pad Kalininhradu — jak dvojčy dva, tym bolej što ŭ svaim anklavie Rasieja moža stavić dalnabojnuju madyfikacyju (da 500 km). Kab takija kompleksy pastaŭlać ŭ Biełaruś, treba vychodzić z damovy pra nieraspaŭsiud rakietnych technalohij.
Dyk našto rasiejcam, skažecie, padvojny hałaŭny bol (razryŭ mižnarodnych pahadnieńniaŭ plus niaŭdziačny torh z Łukašenkam), kali mohuć sami zrabić tanna dy siardzita?
U biełaruskim ža vojsku “Iskanderami” majucca zamianić sastarełyja “Kropki-U”. A ŭvohule meta vajskovaj madernizacyi, palahaje, badaj, vyklučna ŭ tym, kab Zachad zaścierahaŭsia razabracca z tutejšym režymam, jak niekali ź Miłošavičam dy Chusejnam.
Zrešty, nieviadoma jašče, jak buduć składvacca dačynieńni i z uschodniaj susiedkaj. Mo' tyja “Iskandery” jašče i pad Voršaj spatrebiacca? :)
Ci nie tamu, darečy, rasiejskija abaronščyki zaraz i ćvierdziać: samim “Iskanderaŭ” mała, tak što chutka nie čakajcie!
Nu a napuścić miž tym važnaści biełaruskaje kiraŭnictva ŭmieje. Sakret, jaki vydaŭ Łukašenka karespandentu “Ŭoł-stryt džorneł”, nasamreč jość sakretam polišynela. Bo
pierachod našaj 465-j bryhady na “Iskandery” daŭno zaplanavany dziaržaŭnaj prahramaj uzbrajeńnia da 2015 hodu. Heta sto razoŭ anansavali čyny ŭ pahonach, i pra tuju prahramu z vajskovych ahladalnikaŭ nie pisaŭ tolki łajdak.
Zaakijanski žurnalist, adnak, pavioŭsia na kodavaje słova “Iskander” i ŭ svaim artykule trochi źmiašaŭ bob z harocham. Daŭ kidki zahałovak “Belarus President Seeks to Deploy Russia Missiles”, chacia, kali razabracca, idziecca pra zbroju z klajmom “Made in Russia”, i nia bolej za toje.
Darečy, jašče adno tłumačeńnie dla kaleh-neafitaŭ: “Iskander” nie rakieta, a mienavita rakietny kompleks. Heta jak błytać strelbu z kulaj. Stralać ža tyja ATRK mohuć roznymi rakietami — jak balistyčnymi, tak i kryłatymi R-500. U tym liku i ź jadziernymi bojehałoŭkami. Voś takich biełaruskamu kiraŭnictvu, sto pudoŭ, nie pradaduć :)
I apošniaje. Maskoŭskija strašyłki — taksama blef. Bo kab harantavana źniščyć antyrakietu ŭ šachcie, treba miasić mienavita jadziernym zaradam. A miž tym Kalininhradzkaja vobłaść padpadaje pad zabaviazańni Rasiei datyčna biaźjadziernaha statusu Bałtyjskaha rehijonu.
Kaniečnie, možna ŭjavić sabie, što Kreml zusim źjedzie z hłuzdu. Ale ja raiŭ by sačyć za siužetam z PRA dy “Iskanderami” jak za vialikim šoŭ, u jakim kožny aktor maje svaje pijaraŭskija dyvidendy.
ZY. Što i patrabavałasia davieści. Kali hety postynh byŭ napisany, stała viadoma pra zajavu biełaruskaha MZS: amerykanskaja hazeta niedakładna interpretavała vykazvańni Łukašenki pra “Iskandery”. Sa słoŭ presavaha sakratara Papova, havorka išła nie pra raźmiaščeńnie rasiejskich kompleksaŭ, a pra pieraŭzbrajeńnie nacyjanalnaha vojska.
Kamientary