Administracyja Trampa razvažaje nad stvareńniem «Rady miru» dla Ukrainy pa prykładzie Hazy
Uznačalić jaje pavinien sam prezident ZŠA.
Brytanskaja hazieta Financial Times paviedamlaje, što administracyja prezidenta ZŠA Donalda Trampa razhladaje mahčymaść stvareńnia «Rady miru», jakaja mahła b kantralavać vykanańnie budučaha pahadnieńnia ab spynieńni vajny va Ukrainie.
«Rada miru» — heta častka mirnaha płana dla siektara Haza, uzhodnienaha pry pasiarednictvie Trampa. Hety orhan, jaki pavinien uznačalić sam Tramp, musić kaardynavać kiravańnie paleścinskim ankłavam u budučyni.
Jak paviedamiŭ vydańniu vysokapastaŭleny ŭkrainski čynoŭnik, jaki ŭdzielničaje ŭ pieramovach z ZŠA, stvareńnie «Rady miru» dla Ukrainy (jakuju taksama pavinien uznačalić amierykanski prezident) źjaŭlajecca «važnaj častkaj prapanoŭ, nakiravanych na zaviaršeńnie rasijskaj vajny».
Pavodle słoŭ surazmoŭcy FT, u radu pavinny ŭvajści pradstaŭniki Ukrainy, Jeŭropy, NATA i Rasii, a jaje zadačaj stanie harantavańnie vykanańnia budučaha mirnaha płana i kantrol za jaho zachavańniem.
Pakul niama nijakich prykmiet taho, što Rasija hatovaja pahadzicca — abo navat surjozna abmiarkoŭvać — mirny płan z 20 punktaŭ, uzhodnieny ZŠA, Ukrainaj i jaje zachodnimi sajuźnikami. Maskva nastojvaje na terytaryjalnych sastupkach z boku Ukrainy, u Kijevie hetyja patrabavańni ličać nieprymalnymi.
Jak piša FT sa spasyłkaj na svaje krynicy, u administracyi Trampa taksama razhladajuć ideju prymianieńnia schiemy z «Radaj miru» dla zaviaršeńnia inšych kanfliktaŭ, u tym liku va Ukrainie i Vieniesuele.
Pavodle źviestak vydańnia, hety płan moža być pradstaŭleny na Suśvietnym ekanamičnym forumie ŭ Davosie, jaki adbudziecca na nastupnym tydni.
Adnak zachodnija i arabskija dypłamaty vykazvajuć zaniepakojenaść u suviazi z hetaj idejaj, adznačajecca ŭ publikacyi.
Adzin z surazmoŭcaŭ FT, znajomy z prapanovami ZŠA, zajaviŭ, što, na dumku niekatorych, administracyja Trampa razhladaje «Radu miru» «jak patencyjnuju zamienu AAN… svojeasablivy paralelny nieaficyjny orhan dla ŭrehulavańnia inšych kanfliktaŭ, nie tolki ŭ Hazie».
Ciapier čytajuć
Palitołah Alina Charysava pahadziłasia supracoŭničać z SBU. Akazałasia, heta byŭ KDB56
Kamientary