Deputatka Kanapackaja prezientavała libieralnyja źmieny ŭ Ziamielny kodeks

Apazycyjnaja deputatka Pałaty pradstaŭnikoŭ Hanna Kanapackaja raspracavała zakonaprajekt, jaki źmianšaje rolu dziaržavy ŭ ziamielnych adnosinach. Bolšaść dziaržaŭnych orhanaŭ jaho pradkazalna nie padtrymali. Pazytyŭny vodhuk dasłaŭ tolki vice-premjer Turčyn, i to ŭ jakaści kiraŭnika hramadzkaj struktury, paviedamlaje «Radyjo Svaboda».

25 vieraśnia deputatka Pałaty pradstaŭnikoŭ Hanna Kanapackaja, jakaja ŭvachodzić u apazycyjnuju Abjadnanuju hramadiaznskuju partyju, prezentavała ekspertam i žurnalistam svoj prajekt źmienaŭ i dapaŭnieńniaŭ u «Kodeks Respubliki Biełarusi ab ziamli».

Padrychtavać źmieny ŭ «Kodeks Respubliki Biełarusi ab ziamli» Hannu Kanapackuju padšturchnuli kanflikty z pryčyny niedaskanałaści ziamielnych pravadačynieńniaŭ pamiž hramadzianami, u pryvatnaści pradprymalnikami, i dziaržavaj.

Zakonaprajekt Kanapackaj nakiravany na liberalizacyju ziamielnych pravadačynieńniaŭ. Pavodle ekanamista Leanida Złotnikava, jon «źmianšaje rolu dziaržavy ŭ ziamielnych adnosinach, nakolki heta mahčyma».

Što prapanuje Kanapackaja

• Źlikvidavać abmiežavańni ŭ vykarystańni ziamielnych učastkaŭ.
• Skaracić padstavy dla ich kanfiskacyi.
• Źlikvidavać niaroŭnaść u pravach roznych ziemlekarystalnikaŭ pry ažyćciaŭleńni haspadarčaj i inšaj dziejnaści.
• Nie dapuskać pazasudovaj kanfiskacyi ziamielnaha ŭčastku dziaržavaj u ziemlekarystalnika.
• Dazvolić dzialić ziamielny ŭčastak.
• Źniać abmiežavańni na pryznačeńnie ziamielnaha ŭčastku, jakim moža vałodać hramadzianin na pravach ułasnaści.
• Skasavać płatu za prava zaklučyć damovu arendy.
• Vykarystoŭvać majomasnyja padatki i arendnuju płatu tolki na raźvićcio adpaviednych terytoryjaŭ.

Dziaržaŭnyja orhany suprać

Kožny zakonaprajekt, pavodle rehlamentu Pałaty pradstaŭnikoŭ, abaviazkova supravadžajecca ekspertnymi zaklučeńniami zacikaŭlenych orhanaŭ i słužbovych asobaŭ. Tamu deputatka nakiravała prajekt amal u 30 adrasoŭ. I atrymała adkazy.

Kanapackaja raskazała, što niekatoryja ź ich byli anekdatyčnymi. Tak, ź Mienskaha abłvykankamu napisali, što razhladać jaje prapanovy nia buduć, bo «deputat Pałaty pradstaŭnikoŭ nia jość subjektam zakanadaŭčaj inicyjatyvy». Kanapackaj daviałosia tłumačyć čynoŭnikam, što jany pamylajucca, bo deputat parlamentu akurat vałodaje takim pravam. Tady, raspaviała dalej Kanapackaja, pryjšoŭ druhi adkaz:

«U im svaju pamyłku čynoŭniki pryznali. Ale napisali, što nia buduć recenzavać moj zakonaprajekt, bo atrymali padobny dakument ź Dziaržaŭnaha kamitetu majomaści. Heta ž znoŭ niejki absurd! Dziaržaŭny kamitet nia maje prava zakanadaŭčaj inicyjatyvy. Takoje prava maje tolki Saviet ministraŭ. Nu kolki ž možna błytacca?»

U inšych dziaržaŭnych ustanovach padtrymki Kanapackaja taksama nie atrymała. Tak, pavodle zaklučeńnia Kamitetu dziaržaŭnaha kantrolu, prapanovy deputatki zroblenyja ŭ intaresach ziemlekarystalnikaŭ i «pazbaŭlajuć dziaržavu važnych mechanizmaŭ rehulavańnia ziamielnych dačynieńniaŭ».

Hieneralnaja prakuratura ličyć zachady Kanapackaj «zaŭčasnymi», bo jany mohuć pryvieści da «zavualavanaha prodažu ziamielnych učastkaŭ».

Taki padychod Kanapackaja patłumačyła tym, što ŭ čynoŭnikaŭ «učorašniaje myśleńnie».

Patrymaŭ vice-premjer, ale ad imia hramadzkaj arhanizacyi

Tolki kiraŭnik Rady raźvićcia pradprymalnictva Alaksandar Turčyn zaśviedčyŭ, što «Rada padtrymlivaje šerah inicyjatyvaŭ».

Kanapackaja źviarnuła ŭvahu, što adkaz Turčyna byŭ padpisany 4 vieraśnia. Na toj čas jon užo pracavaŭ pieršym namieśnikam premjer-ministra Biełarusi.

Na 8 kastryčnika zaplanavanaje abmierkavańnie zakonaprajektu z pradstaŭnikami biznesovych źviazaŭ.

«Kodeks Respubliki Biełarusi ab ziamli» dziejničaje z 23 lipienia 2008 hodu. Apošnija źmieny i dapaŭnieńni ŭ Ziamielny kodeks byli pryniatyja ŭ 2015 hodzie.

• 0
• 0
• 0
• 0
• 0
• 0
• 0
• 0