Jajkahałovyja pravaronili Vialiki Abłom

Łukašenka spadziajecca, što finansavy kryzis skončycca praz-hod paŭtara. Tak zajaviŭ jon 23 studzienia na sustrečy z navukoŭcami.

Sapraŭdy, heta byŭ by dla jaho idealny varyjant. Ujavicie sabie: akurat pad novyja vybary pačynajecca ekanamičny padjom. Šok ad apieracyi «Devalvacyja» ŭ masavaj śviadomaści datul prytupicca. A voś rost — navat simvaličny — zarobkaŭ dy piensij pierad čarhovaj «addačaj hałasoŭ» moža zrabić na elektarat uražańnie. Padumajuć: bač, vykaraskaŭsia i z hetaj jaminy!

Va ŭsiakim razie, vynosić kančatkovy prysud tefłonavamu rejtynhu ja b nie śpiašaŭsia. Tym bolej što da taje pary, pakul u krainie niama minimalnych umoŭ dla kankurentnaj palityki, usie rejtynhi — vialikaja abstrakcyja.

Kaniečnie, kali ŭjavić, što saśpieli hronki hnievu i 80% nie prymajuć uładu, to tut i miechanizm «elehantnych pieramoh» moža dać zboj. Kali ž narod tryvaje i navat radujecca padačcy pierad vybarami, to astatniaje — sprava techniki.

Na sustrečy z navukoŭcami Łukašenka akurat i zaznačyŭ:

«Kryzis projdzie chutka — za hod-paŭtara. U hetaj situacyi nie na barykady treba iści, a pieratryvać, pieražyć, pracujučy».

Musić, vytyrknulisia stojenyja tryvohi. Naturalna ž, nie sivyja akademiki bačacca na hipatetyčnych barykadach. Padčas eskałacyi kryzisu (a pakul ža tolki kvietački) važna ŭratavać zbudavanuju sistemu ŭłady ad masavaj niezadavolenaści, stychijnych buntaŭ.

Navukoŭcy vysłuchali paproki za toje, što nie pradbačyli kryzis i zaraz nie hienierujuć mocnych idej, jak vykaraskvacca. I — kaštoŭnaje ŭkazańnie, što «ŭ raźvićci dziaržavy asnoŭny ŭpor treba rabić nie na enierhietyčnyja, materyjalnyja resursy, a na vytvorčaść dy intelekt».

Zhadałasia, jak akademik Vajtovič raspaviadaŭ mnie pra chadžeńni pa pakutach padčas svajho prezidenctva (tady hety tytuł jašče dazvalaŭsia :) ŭ Akademii navuk.

Jašče ŭ 90-ch kiraŭnictva Akademii prabivała ŭ vysokich kabinietach ideju inavacyjnaha raźvićcia krainy, ale heta było bićcio hałavoj ab ścienku. Na Vajtoviča hladzieli jak na dzivaka: našto toj tłum, kali i tak kazyrnaja karta idzie! Rasijskaja durnica zdavałasia viečnaj.

Sa słoŭ Vajtoviča, «u 1997-m my prapanavali stvaryć zonu vysokich technałohij. Tady prapanoŭvałasia nazva “Akademtechnapolis”. Faktyčna heta była taja samaja ideja, što praź siem hadoŭ pačnie prapahandavacca źvierchu ŭ vyhladzie tak zvanaj biełaruskaj Silikonavaj daliny».

Tady navukoŭcy navat prajekt adpaviednaha prezidenckaha ŭkazu padrychtavali. «Naiŭna dumałasia, što za takuju perśpiektyŭnuju ideju adrazu ŭchopiacca, — raskazvaŭ Vajtovič. — Ja sam jeździŭ z tym prajektam pa roznych instancyjach, kab atrymać vizy vysokich čynoŭnikaŭ. Ale jany pieravažna adbivalisia, jak ad niejkaj niepatrebščyny».

A jašče Vajtovič patrapiŭ pad razdaču, kali z trybuny 2-ha Usiebiełaruskaha narodnaha schodu zajaviŭ pra nieabchodnaść aktyŭna pryciahvać zamiežnyja inviestycyi. Hałoŭny načalnik skazaŭ tady, što zachodnija kampanii nikoli nie buduć «inviestavać sumlenna i prystojna» i što inviestycyi ŭ Biełaruś mohuć pryjści chiba što z Rasii.

Jašče bolš, navat u 2006 hodzie, užo na 3-m Usiebiełaruskim schodzie, Łukašenka zajaviŭ, što pryciahnieńnie zamiežnych inviestycyj nie vyrašaje ekanamičnych prablem, a naadvarot, moža pryvieści krainu da zaležnaści:

«...Zamiežnyja hrošy prosta tak nichto nie daje. Chočacie sieści na ihołku amierykancaŭ, jeŭrapiejcaŭ, jašče niekaha? Lohka na jaje ŭskočyć, a voś, hruba kažučy, saskočyć ź jaje potym budzie nadta ciažka».

Pry kancy 2005-ha na pres-kanfierencyi dla rasijskich žurnalistaŭ jon davoli hrebliva kazaŭ, što zamiežnyja inviestary «jak prusaki lezuć va ŭsie dzirki, va ŭsie ščyliny».

Zaraz tema «Nie damo raspradać Radzimu!» rezka zhornuta, a tych «prusakoŭ» łoviać navat na tumannym Albijonie :), ładziačy darahija (ale, zdajecca, praktyčna nulavyja) forumy.

Jašče trochi retra. Užo zusim fantastykaj hučyć fraza z sakavika 2006 hoda: «Navat u samyja ciažkija časy my nie karystalisia čužymi hrašyma i praktyčna nie majem dziaržaŭnaha doŭhu. Kali ŭ nas paŭtara miljarda dołaraŭ doŭh, to my za hod možam addać hetyja hrošy».

Kryzis nie pakinuŭ i kamienia na kamieni ad samaŭpeŭnienaj rytoryki. Hałoŭnaje ž — poŭnaje fijaska samoj prapachłaj naftalinam ekanamičnaj madeli. Nu a kredytaŭ (kali brać sukupnuju zapazyčanaść) dyk užo nachapalisia amal što na 20 miljardaŭ, i heta nie apošnija.

Pakutlivaja ekanamičnaja samaadukacyja kiroŭnaj viarchoŭki praz šmathadovyja ekśpierymienty nad 10-miljonnaj krainaj abychodzicca nacyi darahavata.

I chto ž viedaŭ, što durnica nie viečnaja? Nu što ž, sapraŭdy, tyja jajkahałovyja nie papiaredzili pra kryzis?

• 0
• 0
• 0
• 0
• 0
• 0
• 0
• 0