Ukrainski prakuror spaliŭsia, kali jaho žonki — ciapierašniaja i byłaja — pachvalilisia ŭ šou «Supiermama» zanadta darahim žyćciom
Prakurora Malejeva vyrašyli zvolnić za toje, što nie zadekłaravaŭ dachody, ale jon zrabiŭ chod kaniom i chucieńka syšoŭ u dekret.
Namieśnik načalnika Śpiecyjalizavanaj pryrodaachoŭnaj prakuratury — načalnik adździeła abarony dziaržaŭnych intaresaŭ u halinie achovy navakolnaha asiarodździa Hienieralnaj prakuratury Ukrainy Alaksandr Malejeŭ razam sa svaimi byłoj i ciapierašniaj žonkami letam minułaha hoda pryniaŭ udzieł u prahramie «Supiermama». Pieradača vyjšła ŭ efir u listapadzie.
Ciapierašniaja žonka prakurora Hanna vyrašyła ździvić svaich sapiernic raskošnym domam, jaki siamja aranduje ŭ Bučy. Udzielnica zajaviła, što nie cikavicca koštam žylla, a taksama paviedamiła, što ich siamja žyvie na dva harady — Kijeŭ i Adesu. Pa acenkach, arenda doma moža kaštavać kala $3000 na miesiac.
Akramia hetaha, Hanna raskazała, što na 35-m tydni ciažarnaści adpraviłasia ŭ Złučanyja Štaty, kab naradzić dačku. Heta dazvoliła dziaŭčyncy atrymać hramadzianstva ZŠA. Pa słovach žančyny, jana apłaciła tolki pieralot, a astatnija vydatki nibyta byli pakrytyja ŭradam ZŠA.
Byłaja žonka Alaksandra Malejeva Taćciana ŭ svaju čarhu raskazała, što čynoŭnik aranduje dla jaje i dziaciej kvateru koštam kala $360, a jašče štomiesiac vypłačvaje joj kala $720.
Raskazy žančyn stali padstavaj dla pravierki ładu žyćcia dziaržaŭnaha słužačaha. U vyniku Nacyjanalnaje ahienctva pa praduchileńni karupcyi znajšło ŭ dekłaracyi chłuślivuju infarmacyju.
Pavodle dekłaracyi čynoŭnika za 2024 hod, jon z žonkaj maje dźvie kvatery ŭ Adesie, a taksama niežyłoje pamiaškańnie. U Kijevie i Adesie mužčyna taksama aranduje nieruchomaść. U krasaviku hetaha hoda para zaviaršyła budaŭnictva jašče adnoj kvatery ŭ Adesie.
Prakuror maje aŭtamabil Hyundai Santa FE 2013 hoda vypusku i arandavany Ford Fiesta 2013 hoda. Jahonaja žonka vałodaje Nissan Teana 2008 hoda vypusku.
Dachod Malejeva ad pracy ŭ prakuratury za 2024 hod składaŭ prykładna $2800 na miesiac.
Ni pra arendu doma, ni pra vydatki na rody žonki, a taksama padtrymku byłoj žonki i dziaciej čynoŭnik u svajoj dekłaracyi nie zhadaŭ.
Jašče adnym niepryjemnym faktam źjaŭlajecca toje, što dom u Bučy, jaki aranduje prakuror, znachodzicca na terytoryi pryrodna-zapaviednaha fondu, dzie budaŭnictva zabaroniena. Za kantrol budaŭnictva na terytoryi fondu adkazvaje Śpiecyjalizavanaja pryrodaachoŭnaja prakuratura, dzie i pracuje Malejeŭ.
Pravierka vyjaviła, što infarmacyja, ukazanaja ŭ dekłaracyi, adroźnivajecca ad faktyčnaj na ahulnuju sumu prykładna $95 tysiač.
Kamisija prakuroraŭ padała chadatajnictva ab zvalnieńni słužačaha za dyscyplinarnaje parušeńnie. 23 lipienia 2025 hoda Hienieralnaja prakuratura na padstavie hetaha rašeńnia vydała zahad ab zvalnieńni Malejeva.
Adnak, jak ciapier vyśvietlili žurnalisty, užo na nastupny dzień prakuror uziaŭ dekretny adpačynak pa dahladu za dziciem da dasiahnieńnia im trochhadovaha ŭzrostu (da vieraśnia 2026 hoda). Takim čynam, jon budzie zvolnieny tolki ŭ pieršy pracoŭny dzień paśla vychadu z adpačynku.
Ciapier čytajuć
Kačanava prapanavała ŭvieści adkaznaść za «niapraŭdu ŭ tyktoku»14
Kačanava prapanavała ŭvieści adkaznaść za «niapraŭdu ŭ tyktoku»
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary