Kala Łukašenki znoŭ źjaviŭsia Usievaład Jančeŭski i paabiacaŭ pierazahruzku PVT

U svaim kamientaryi Usievaład Jančeŭski z nastalhijaj zhadaŭ pra pryniaty ŭ dalokim 2017 hodzie dekret №8, jaki na toj čas byŭ «u mnohim revalucyjny», i pierakinuŭ mastok u siońniašni dzień.

«Zrazumieła, što za hety čas vielmi mnohaje ŭ śviecie pamianiałasia. I jano źmianiałasia, mianiajecca i budzie mianiacca. Pryčym temp paskareńniaŭ, chutkaść pastajanna ŭzrastajuć. Pryjšoŭ čas dla pierazahruzki, i siońnia kiraŭnik dziaržavy vielmi vyrazna, jasna, zrazumieła i vielmi spraviadliva vyznačyŭ niekalki pryjarytetaŭ», — skazaŭ jon.

Pavodle słoŭ Jančeŭskaha, siońnia hałoŭny pryjarytet — abarona intaresaŭ kožnaha hramadzianina. Nivodzin machlar abo sumnieŭnaja struktura, maŭlaŭ, nie pavinny mieć mahčymaść ababrać abo ašukać biełarusa. 

Ale adnačasova z hetym nibyta stvarajecca svabodny šlach dla prahresu, technałohij i inavacyj, a ŭsio, što spryjaje raźvićciu krainy, padtrymlivacca dziaržavaj i asabista Łukašenkam. Pry ŭkaranieńni inavacyj treba abapiracca na suśvietny dośvied, ale taksama sprabavać jaho apiaredzić, kab Biełaruś i jaje zakanadaŭstva zastavalisia prykładam dla inšych krain.

Pry hetym Usievaład Jančeŭski anansavaŭ pierazahruzku ŭ pracy PVT i zajaviŭ, što bačyć dla hetaha pieradumovy, znoŭ nie zabyŭšysia zrabić kamplimient Łukašenku:

«Upeŭnieny, my heta ŭbačym. Budzie i pierazahruzka Parku vysokich technałohij. Niekalki etapaŭ było ŭ jaho raźvićci. Dumaju, što vielmi chutka budzie nastupny. Pad natchnieńniem kiraŭnika dziaržavy Park vysokich technałohij atrymaje vielmi mahutnaje i cikavaje raźvićcio».

Ciapier 49-hadovy Usievaład Jančeŭski ŭ 1990-ja hady stajaŭ la vytokaŭ ciapierašniaha BRSM, u 1997-2001 hadach budučy pieršym sakratarom CK Biełaruskaha patryjatyčnaha sajuza moładzi (tak heta arhanizacyja nazyvałasia tady). Paśla jon byŭ deputatam Pałaty pradstaŭnikoŭ, hałoŭnym redaktaram časopisa «Płanieta», hałoŭnym ideołaham administracyi Łukašenki.

Z 15 sakavika 2017 hoda pa 2023 hod Usievaład Jančeŭski byŭ dyrektaram administracyi Biełaruskaha parka vysokich technałohij, na jahonyja hady kiravańnia prypaŭ jak jaho roskvit, tak i zaniapad paśla palityčnaha kryzisu 2020 hoda i pačatku vajny va Ukrainie ŭ lutym 2022-ha.

Paśla sychodu z pasady kiraŭnika PVT Jančeŭski adyšoŭ u cień i ŭznačaliŭ jurydyčnuju asobu ŭ Abjadnanych Arabskich Emiratach, jakuju adkryvali jak finansavuju prakładku dla PVT. Praź jaje źbiralisia pieravodzić hrošy tych biełaruskich IT-kampanij i zamiežnych zamoŭcaŭ, jakija nie mohuć pracavać naŭprost ź Biełaruśsiu paśla pačatku poŭnamaštabnaj vajny va Ukrainie. 

• 1
• 3
• 4
• 4
• 0
• 0
• 4
• 0