U internecie za sutki sabrali $20 tysiač siamji biełaruskaj režysiorki, što zahinuła na Alascy
Za adzin dzień na płatformie gofundme.com było sabrana $20,465 — na 465 dalaraŭ bolš za zajaŭlenuju sumu.
«Dziakuj usim, chto ŭziaŭ udzieł u zbory srodkaŭ dla Niki Nikanavaj! Dziakujučy vašaj padtrymcy i apieratyŭnaści my sabrali nieabchodnuju sumu ŭsiaho za adzin dzień», — napisali inicyjatary.
Hrošy źbirali najpierš na pajezdku ŭ ZŠA maci zahinuŭšaj Niki Nikanavaj.
Trahičnaje zdareńnie adbyłosia na Alascy ŭ čaćvier, 25 lipienia. Pra heta paviedamiła miascovaje vydańnie Newsminer.com.
24-hadovyja biełarusy Piatro Markiełaŭ i Nika Nikanava zhulali viasielle 1 lipienia i adpravilisia ŭ padarožža pa Amierycy. Na Alascy jany vyrašyli pabačyć zakinuty aŭtobus, jaki staŭ viadomy dziakujučy knizie, a paśla i filmu «U dzikich umovach» (Into the Wild; jon raskazvaje pra amierykanskaha chłopca z zabiaśpiečanaj siamji, jaki adpraviŭsia ŭ hłuchi rajon Alaski, pasialiŭsia tam u aŭtobusie, a praz čatyry miesiacy zahinuŭ tam ad źniasileńnia i hoładu). Pa darozie nazad, kali padarožniki sprabavali pierajści raku Tekłanika, dziaŭčynu zmyła płyńniu. Piatro zdoleŭ vyciahnuć jaje z vady, ale Nika była ŭžo miortvaja.
Piatro paviedamiŭ pra zdareńnie ŭ miascovuju palicyju.
Piatro Markiełaŭ — aktyvist ruchu «Lehałajz Biełaruś», vystupaje za dekryminalizacyju narkotykaŭ.
Nika Nikanava — režysiorka 20-chvilinnaj stužki «Pakaleńnie 328» pra maci niepaŭnaletnich, asudžanych za narkatyčnyja złačynstvy.
U padletkavym uzroście źniałasia ŭ filmie «Bresckaja krepaść». Chacieła pastupać u ZŠA, ale nie zdoleła atrymać vizu. Vučyłasia ŭ EHU pa śpiecyjalnaści «Miedyja i kamunikacyi», ale praz paŭhoda kinuła vučobu i pajechała zajmacca siorfinham na Bali. Padarožža zaciahnułasia na try hady. Paśla ŭsio ž trapiła ŭ ZŠA, vučyłasia na hadavoj prahramie dakumientalistyki. Apošnim časam žyła ŭ Ńju-Jorku.
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž1
Kamientary