Haračyja tancy i dzivosnyja instrumienty: jakija siurpryzy rychtujuć udzielniki «Kaladnaha Festa — 2019»
25 śniežnia ŭ minskim kłubie Re:Public adbudziecca hałoŭnaja štohadovaja padzieja dla ŭsich amataraŭ biełaruskaj falkłornaj muzyki — śviatočny «Kaladny Fest». Tradycyjna na scenie vystupiać vybitnyja kalektyvy i vykanaŭcy siaredniaviečnaj i fołk-muzyki.
Znajomimsia z udzielnikami «Kaladnaha Festa 2019» i daviedvajemsia, jakija siurpryzy jany padrychtavali naviedvalnikam dvanaccataj pa liku, hučnaj zimovaj imprezy biełaruskaj muzyčnaj fołk-kultury!
Stary Olsa
Hurt «Stary Olsa» adznačaje 20-hodździe. Kiraŭnik hurta Źmicier Sasnoŭcki pierad śniežańskim kancertam adčuvaje nieŭśviadomlenaść takoj daty, bo navat praz 20 hadoŭ udzielniki zastalisia takimi ž maładymi i zachoŭvajuć mocnaje žadańnie adradžać. Ź ciaham času jany staviacca da rodnaj historyi ź jašče bolšym patryjatyzmam.
Hurt — pastajanny ŭdzielnik «Kaladnaha Festa». Nie hublać cikavaść da vystupaŭ dapamahaje unikalnaść śviata, što abjadnoŭvaje biełarusaŭ z roznymi śvietapohladami, kaštoŭnaściami, relihijami. Śviata, praź jakoje ludzi hienietyčna adčuvajuć stvareńnie novaha śvietu, pryrody.
Darečy, «Kaladny Fest 2019» unikalny tym, što piať hadzin huku buduć pryśviečany mienavita hurtu «Stary Olsa». «Stary Olsa i siabry» — tak žartaŭliva Źmicier nazvaŭ śniežańskaje šou.
Duet Alesia Čumakova i Taćciany Jačnaj
Aleś Čumakoŭ — adzin z udzielnikaŭ hurta «Stary Olsa». U składzie kalektyva jon budzie daryć usim śviatočny nastroj i dzialicca cikavymi historyjami, jakich za 20 hadoŭ, biezumoŭna, nabrałosia šmat. Prychilnikaŭ čakaje žyvy i kłasny kancert! Ale heta nie ŭsio: Aleś Čumakoŭ rychtuje nievialiki vystup pad huśli mienavita z kaladnymi pieśniami. I nie adzin, a ŭ duecie sa śpiavačkaj Taćcianaj Jačnaj!
Hości «Kaladnaha Festa» pačujuć niekalki papularnych jeŭrapiejskich kaladnych piesien, pierakładzienych na biełaruskuju movu paetami. «Kali huk nie padviadzie, usio budzie cudoŭna!» — kaža rašuča nastrojeny Aleś.
Kasia Radziviłava i hurt «Raroh»
Kasia Radziviłava da 2005 hoda ŭvachodziła ŭ skład hurta «Stary Olsa».
U 2003 hodzie jana stvaryła ŭłasny kalektyŭ «Raroh», nazva jakoha pachodzić ad cudoŭnaj ptuški. «Raroh» navat udzielničaŭ u zapisu filma dla JUNESKA, i, kali farmalnyja momanty buduć chutka vyrašany, hurt možna budzie nieŭzabavie pabačyć na teleekranie.
Isnujuć dva składy, jakija pastajanna źmianiajucca, — małodšy i darosły. Na «Kaladnym Feście» hości pačujuć starejšy skład. Zvyčajna heta chłopcy 12-14 hadoŭ, ale, mahčyma, da ich dałučycca dziaŭčynka. Stvaryć peŭnuju atmaśfieru im dapamoža duda, žalejka, skrypka, bubny. Nie šmat dziaciej u našaj krainie hrajuć na takich śpiecyfičnych instumientach, tamu budzie vielmi cikava!
Duet šatłandskich dudaŭ PiobROCK
Jak heta — vystupać u składzie adzinaha kalektyva Biełarusi, jaki hraje na tradycyjnych šatłandskich dudach? Niaprosta: instrumienty technična składanyja, a kab vykonvać kampazicyi ŭ tradycyjnaj maniery na dobrym uzroŭni, treba doŭha vučycca.
Na «Kaladnym Feście» hurt nie budzie zdradžvać tradycyjam i «zapilić» stary dobry rok: haściam abiacajuć kaviery i mahčymaść pačuć znajomyja miełodyi. Budzie viesieła i horača!
Trollwald
Jašče niekalki hadoŭ tamu Andrej Apanovič taksama ŭvachodziŭ u skład kalektyva «Stary Olsa», ale zaraz jon rychtuje vystup z ułasnym hurtom Trollwald. Na feście hurt ździvić novymi pieśniami. Taksama ŭdzielniki abiacajuć pastaracca arhanizavać siurpryz z zaprošanym muzykam.
Etna-prajekt Patrycyi Śvicinaj
Etna-prajekt Patrycyi Śvicinaj nie tak daŭno staŭ pieramožcam u konkursie maładych kalektyvaŭ. Da «Kaladnaha Festa 2019» Patrycyja sa svaim etna-priektam rychtuje śpiecyjalnuju prahramu. Padajecca, jany pryjemna ździviać publiku!
Fłamieja
«Fłamieja» - kalektyŭ histaryčnaha tanca. Na «Kaladnym Feście» ŭdzielniki hetaha kalektyva adkazvajuć za nastroj i rychtujuć tancavalnyja ruchi, jakija jany vyvučać razam z haściami šou. «Kaladny Fest», na pohlad hurta, - važnaje mierapryjemstva, bo moładź pavinna šanavać svaju kulturu. I mienavita na feście ŭ ich jość mahčymaść daviedacca, jak zabaŭlalisia našyja prodki, praniknucca stanoŭčaj atmaśfieraj i navat paŭdzielničać u śviacie, jakoje ŭ 2019 hodzie pryśviečana hurtu «Stary Olsa».
1410
Na «Kaladnym Feście» hości mierapryjemstva pabačać cudoŭny kalektyŭ histaryčnaha tanca «1410». Jaho ŭdzielniki paznajomiać usich prysutnych na šou z «trešam i čadam» siaredniaviečnaha i biełaruskaha narodnaha tanca — najvažniejšaj i, na žal, amal stračanaj častkaj kultury Biełarusi. U ramkach svaich vystupaŭ kalektyŭ dapamoža žadajučym adkryć dla siabie novaje, a taksama pračuć i palubić tancy našych prodkaŭ.
Dudarski kłub
«Dudarski kłub» — tvorčaje niefarmalnaje abjadnańnie biełaruskich majstroŭ, jakija robiać dudy, muzykaŭ, jakija na ich hrajuć, a taksama ŭsich tych, chto cikavicca hetym instrumientam.
Na «Kaladnym Feście» ŭdzielniki kłuba zajhrajuć jak tradycyjnyja, tak i siaredniaviečnyja miełodyi.
* * *
Štohadovy fiestyval «Kaladny Fest» adbudziecca 25 śniežnia ŭ kłubie Re:Public.
Nie ŭpuścicie šaniec adznačyć śviatočnuju imprezu razam z ulubionymi muzykami!
Nabyć kvitok možna ŭ kasach horada, a taksama na sajcie.
Daviedki:
+375(44) 551-77-06
+375(29) 851-77-06
Kamientary