Navukoŭcy: Atłuścieńnie paskaraje evalucyju virusa hrypu ŭ arhaniźmie
Atłuścieńnie nie tolki pavyšaje vierahodnaść taho, što virus hrypu patrapić u arhanizm čałavieka, ale i prykmietna paskaraje jaho evalucyju. Da takoj vysnovy pryjšli amierykanskija bijołahi, artykuł jakich apublikavaŭ navukovy časopis mBio, piša tass.ru.
«Treba vielmi aściarožna interpretavać vyniki dośledaŭ na myšach, adnak našy ekśpierymienty pakazvajuć, što atłuścieńnie dapamahaje virusu pranikać u arhanizm, paskaraje jaho padzieł i «dapamahaje» jamu atrymlivać bolš mutacyj, častka ź jakich budzie karysnaj dla ŭzbudžalnika hrypu», — prakamientavała pracu Stejsi Šulc-Čery, bijołah z Univiersiteta štata Teniesi (ZŠA).
Virus hrypu, jak daŭno zaŭvažyli miedyki, atakuje roznyja hrupy ludziej ź nieadnolkavaj častatoj. Ad jaho čaściej pakutujuć dzieci, ciažarnyja žančyny, ludzi stałaha vieku i asoby z krajnimi formami atłuścieńnia i dyjabietu. Z čym heta źviazana, navukoŭcy pakul nie mohuć dakładna skazać.
Šulc-Čery i jaje kalehi nazirali, jak arhanizm łabaratornych myšej reahavaŭ na zaražeńnie virusam śvinoha hrypu H1N1.
Pieršapačatkova navukoŭcaŭ cikaviła, jak arhanizm hryzunoŭ sa zvyčajnaj masaj cieła abo arhanizm hryzunoŭ, jakija pakutavali ad atłuścieńnia, reahavaŭ na infiekcyju. Niahledziačy na prykładna roŭnuju kolkaść virusnych čaścinak u arhaniźmie i tych, i druhich myšej, hryp aktyŭniej množyŭsia ŭ lohkich ukormlenych paddoślednych žyvioł.
Sprabujučy zrazumieć, z čym heta źviazana, navukoŭcy zarazili niekalki novych partyj hryzunoŭ pry dapamozie virusaŭ, atrymanych ad pieršych dźviuch hrup myšej. Praź niekalki padobnych cykłaŭ bijołahi vyśvietlili, što virus značna chutčej mianiaŭsia pry trapleńni ŭ arhanizm myšej z zališniaj vahaj. Evalucyja hrypu prachodziła chutčej, i virus bolš efiektyŭna zaražaŭ novyja hrupy myšej i z narmalnaj, i z zališniaj vahoj.
Jak miarkujuć bijołahi, paskoranaje źjaŭleńnie novych mutacyj virusa było źviazana z tym, što imunnyja kletki ŭkormlenych myšej vypracoŭvali mienš interfieronaŭ — białkoŭ, jakija pieraškadžajuć razmnažeńniu virusu i pryciahvajuć uvahu imunnaj sistemy da zaražanych kletak.
Dalejšyja ekśpierymienty pakazali, što hety praces možna było zdušyć, kali ŭ arhanizm myšej uvieści sintetyčnyja interfierony. Padobnyja mietady, jak miarkujuć navukoŭcy, možna budzie vykarystoŭvać i dla strymlivańnia epidemii hrypu siarod ludziej, kali ich hipoteza paćvierdzicca padčas nazirańniaŭ za chutkaściu evalucyi virusa ŭ čałaviečych papulacyjach.
Kamientary