Dźmitryja Kachno z «Udačy ŭ prydaču» źniali z efiru. Za toje, što aburyŭsia svavolstvam AMAPa
Televiadučy Dźmitryj Kachno pazbaviŭsia pracy. Jon nie byŭ u štacie ANT — pracavaŭ pa damovie padradu, ale ŭ apošni čas jaho možna było nazvać adnoj z hałoŭnych asob kanała, piša kp.by.
Z 2016 hoda Dźmitryj byŭ niaźmiennym viadučym rekłamnaj pieradačy «Udača ŭ prydaču», u 2018 i 2019 hodzie jon byŭ viadučym «Pieśni hoda ŭ Biełarusi» na ANT, u 2019 hodzie vioŭ hała-kancert la steły na Dzień Niezaležnaści. Vierahodna, z-za emacyjnaha dopisa ŭ instahramie pra Symbal.by, u jakim Dźmitryj skazaŭ, što jaho raździraje ad taho, što sivoj babuli treba ŭciakać ad ludziej z aŭtazaka, jon bolš nie budzie vieści «Udaču ŭ prydaču».
— 14 lipienia ŭ mianie pa hrafiku pavinien byŭ być efir «Udačy ŭ prydaču». Ja patelefanavaŭ administrataru zdymačnaj hrupy daviedacca, ci ŭsio ŭ sile. Mnie adkazali: «Jak, vam jašče nie paviedamili? Było pryniata rašeńnie pamianiać viadučych».
Ja pracavaŭ na prajekcie 5 hadoŭ, daražyŭ im i lubiŭ daryć ludziam radaść. Za hety čas my razyhrali pryzoŭ na 20 miljonaŭ dalaraŭ. Pavinšavali ŭ žyvym efiry bolš za miljon pieramožcaŭ! I navat kali maja žonka Nadzia naradžała syna Płatona, ja byŭ u žyvym efiry, — raspaviadaje «Kamsamołcy» Dźmitryj.
23 červienia Dźmitryj Kachno ŭ svaim instahramie emacyjna adreahavaŭ na zatrymańni kala kramy Symbal.by:
«Ja ŭbačyŭ, jak čarhu ŭ kramu Symbal.by chapajuć bajcy AMAPa i zapichvajuć u aŭtazak. Ja žyvu za dva kvartały ad hetaha miesca. Na hetym videa ad vas, milicyja, uciakaje sivaja babulka. Vy što?! Vy pavinny abaraniać ludziej, harantavać ich biaśpieku. U hetaj čarzie niama złačyncaŭ. Što vy robicie? Mnie brydka i ahidna bačyć toje, što adbyvajecca. Kali b my hulali tam z synam, nas by taksama schapili hetyja ludzi? Nas by taksama zapichnuli ŭ aŭtazak? Za nami biehli b hetyja strašnyja ludzi ŭ čornym?» — napisaŭ jon.
Słovy Dźmitryja navat pracytavała New York Times.
3 lipienia Dźmitryj Kachno pavinien byŭ vieści ŭračystaje adkryćcio fantana ŭ parku Janki Kupały, jaki padaryŭ Minsku Śbierbank. Kiraŭnik Śbierbanka Hierman Href i Alaksandr Łukašenka prysutničali na adkryćci. Dźmitryja vybrała ahienctva z Maskvy, jakoje zajmałasia arhanizacyjaj śviata.
— Jany pytalisia, z kim ź viadučych-dziaŭčat mnie budzie kamfortniej pracavać — ja paraiŭ Marynu Hrycuk. Ale za niekalki dzion da mierapryjemstva mnie paviedamili, što im «nastojliva rekamiendavali zamianić viadučaha». Ja nie škaduju, što napisaŭ hety post, ale mnie škada, što nie zmahu bolš rabić dobryja spravy dla biełarusaŭ va «Udačy ŭ prydaču». Moj post pra zatrymańni nie ŭtrymlivaŭ pramoj krytyki abo ahitacyi, ale prymusiŭ ANT admovicca ad niaźmiennaha viadučaha prajekta.
Kamientary