Studentam MIU prapanujuć pieravieścisia ŭ inšyja VNU i zapłacić za heta da 3500 rubloŭ
Pieravod studentam Minskaha inavacyjnaha ŭniviersiteta patrebny, kab atrymać dypłomy dziaržaŭnaha ŭzoru. Usio praz toje, što MIU ŭžo niekalki razoŭ atrymlivaŭ admovu ŭ akredytacyi.
Na sustrečy studentaŭ śpiecyjalnaści «prahramnaje zabieśpiačeńnie infarmacyjnych technałohij» z pradstaŭnikom BDTU byli nazvanyja rascenki za likvidacyju akademičnaj roźnicy pry pieravodzie. Studentam treciaha kursa nie pašancavała bolš za astatnich.
Akramia siesii, im treba zdavać 17 pradmietaŭ i zapłacić kala 3500 rubloŭ. U vyniku płata za pieravod i navučańnie dla ich składzie kala 7 tysiač rubloŭ.
«Naša Niva» raspytała pra situacyju ź pieravodam studentaŭ pieršaha, druhoha i treciaha kursaŭ.
«Čym nižejšy kurs, tym akademičnaja roźnica mienšaja, — raspaviadaje student Uładzisłaŭ, jaki skončyŭ pieršy kurs MIU. — I kolkaść pradmietaŭ, jakija treba zdavać pry pieravodzie, taksama mienšaja. Naprykład, kab mnie pieravieścisia na druhi kurs, treba zapłacić 2000 rubloŭ tolki akademičnaj roźnicy — heta čatyry pradmiety.
Pry hetym akademičnaja roźnica budzie ŭ lubym vypadku, nie tolki pry pieravodzie ŭ BDTU».
Uładzisłaŭ raspaviadaje, što studenty byli šakavanyja takim rašeńniem:
«Pałova aŭdytoryi śmiajałasia, pałova płakała. I śmiešna, i hrešna — vy ž razumiejecie. U studentaŭ takich hrošaj niama, i niadkul jany nie źjaviacca.
Va ŭniviersitecie nam prapanavali pieravieścisia na kurs nižej, pravučycca jašče raz i pačakać novaj akredytacyi, jakaja budzie ŭ nastupnym hodzie. Za taki pieravod taksama treba płacić, ale suma tam mienšaja, i treba zdavać mienš pradmietaŭ».
Sam Uładzisłaŭ dumaje pravučycca jašče hod i dačakacca jašče adnoj akredytacyi univiersiteta. Zajaŭku na jaje ŭniviersitet płanuje padać u sakaviku 2021 hoda:
«Kali znoŭ nie projdziem, budu pieravodzicca. Ale škada ciapier studentaŭ treciaha kursa: za pieravod u ich prosiać 3500 rubloŭ, a akramia siesii, im nieabchodna «zakryvać» 17 pradmietaŭ.
Student Anton, jaki skončyŭ treci kurs, raspaviadaje, što dekan BDTU na schodzie raspavioŭ studentam MIU, što dla pieravodu na druhi kurs treba zapłacić kala 1000 rubloŭ i zdać čatyry pradmiety, na treci — kala 2500 rubloŭ i 12 pradmietaŭ. Na čaćviorty kurs — 3500 rubloŭ i 17 pradmietaŭ.
«I da ŭsiaho hetaha treba budzie jašče zapłacić za samo navučańnie, — raspaviadaje Anton. - Jašče možna pieravieścisia na papiaredni kurs. Studentam u 90% vypadkaŭ heta nie spadabałasia. Nichto nie zmoža vypłacić takija hrošy.
Paśla sustrečy rektar daŭ nam prykładna tydzień, kab ŭzvažyć usie «za» i «suprać». Ale na nastupny dzień našamu starastu patelefanavali z dekanata i skazali, što rektar vyrašyŭ nie rasfarmiroŭvać dzionnaje navučańnie. Maŭlaŭ, my zastajemsia vučycca ŭ MIU. Na pytańnie, što budzie z dypłomam i akredytacyjaj, starastu adkazali: «Budziem spadziavacca na toje, što ŭ nastupnym hodzie akredytacyju projdziem».
Studentka Ksienija, jakaja pierajšła na 3 kurs, raspaviadaje, što paśla naviny pra košt pieravodu ŭsia jaje hrupa jeździła va ŭsie univiersitety, u jakich jość takaja śpiecyjalnaść. U vyniku BDUIR navat nie daŭ adkazu, a BNTU prapanavaŭ stracić hod i pierajści na kurs raniej, kab nie było takoj vialikaj akademičnaj roźnicy.
«Zrazumiełaja sprava, nikoha heta nie zadavalniaje, bo hublać hod nie praz našu pamyłku — vialikaje rasčaravańnie. Dy nie ŭsie siemji mohuć sabie dazvolić vučyć dziaciej na hod daŭžej.
Ale alternatyvy nam nie prapanavali. My nie viedajem, što rabić dalej.
Na naš pohlad, kali b studentaŭ pavažali, to zrabili b tak, kab situacyja z akredytacyjaj nijak na nas nie adbiłasia. My hatovyja zdać akademičnuju roźnicu, ale nie hatovyja płacić za jaje vielizarnyja hrošy i hublać kurs.
Jość jašče adzin cikavy fakt. Kali ŭ listapadzie 2019 hoda ŭ MIU była sustreča ź Siarhiejem Kaśpiarovičam (načalnik hałoŭnaha ŭpraŭleńnia prafiesijnaj adukacyi Minadukacyi — «NN»), jon skazaŭ, što kali ŭ dalejšym u śpiecyjalnaściaŭ nie budzie akredytacyi, Minadukacyi dapamoža pieravieści nas biez strat i nivodzin student nie pacierpić.
U vyniku nijakaj dapamohi studenty pieršaha, druhoha i treciaha kursaŭ tak i nie atrymali. Pašancavała tolki vypusknikam: jany dosyć paśpiachova abaranilisia ŭ inšych univiersitetach».
Ciapier čytajuć
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju29
Kamientary