«Evalucyja zakončyłasia». Šrajbman raskrytykavaŭ Cichanoŭskuju za niaźmiennaść naratyvaŭ
«Bolšaść jaje intervju — heta takija ciopłyja vanny», — kaža Arciom Šrajbman.
U novym vypusku prajekta «Hadzińničak cikaje» Arciom Šrajbman, Ženia Suhak i Leŭ Lvoŭski abmiarkoŭvali los hałoŭnych asob biełaruskaha pratestu 2020 hoda i sprabavali zrazumieć, što siońnia adbyvajecca ź ich palityčnymi stratehijami.
Havoračy pra Śviatłanu Cichanoŭskuju, Šrajbman zajaviŭ: «Mnie zdajecca, što jość peŭny trend na branzavieńnie, kali krytyka ŭsprymajecca ŭsio bolš i bolš varoža».
Pavodle słoŭ analityka, padstavy dla takoha mierkavańnia jamu daje analiz intervju Cichanoŭskaj.
«Bolšaść jaje intervju — heta takija ciopłyja vanny, realna. To-bok u jaje vielmi mała žorstkich intervju. Praz heta, kali jany zredku ŭźnikajuć, joj zadajuć niepryjemnyja pytańni, vidać, nakolki joj heta niepryjemna, jak jana aburajecca, jak jana adrazu pierachodzić u ataku na žurnalista», — zaŭvažaje analityk.
Pavodle jaho nazirańniaŭ, za hady palityčnaj dziejnaści ŭ Cichanoŭskaj sfarmiravaŭsia šerah kamfortnych pazicyj, jakija jana rehularna paŭtaraje.
«Užo niama idei pra toje, što heta moža być niejki sastareły mesedž ci niejkija idei nie padtrymlivajucca biełarusami», — miarkuje Šrajbman i pryvodzić prykład: «Kali jana paŭtaraje naleva i naprava ideju pra toje, što biełarusy na baku Ukrainy ŭ hetaj vajnie. Niama nivodnaha sacyjałahičnaha apytańnia, jakoje b heta pakazała».
Šrajbman dapuskaje, što ŭ 2022 hodzie padstavy dla takoj acenki byli. Tady možna było bačyć, jak biełarusy, naprykład, masava pieradavali infarmacyju pra pieramiaščeńni rasijskich vojskaŭ «Biełaruskamu Hajunu». Ale, na jaho dumku, za čatyry z pałovaj hady źjaviłasia dastatkova novaj infarmacyi, jakuju taksama treba ŭličvać.
«Kali ty razumieješ, što, pavodle danych tych ža ŭkrainskich śpiecsłužbaŭ, bolš biełarusaŭ vajujuć za Rasiju, čym za Ukrainu, kali ty razumieješ, što ŭsie apytańni, pry ŭsich papraŭkach, pakazvajuć (pry tym, što jość faktar strachu) nakolki mała ludziej zajmajuć čysta praŭkrainskuju pazicyju i nakolki šmat ludziej zajmajuć pazicyju «aboje raboje».
Pryčym, padkreślivaje jon, prykład z Ukrainaj nie adziny.
«Jość niejkaja liniejka taho, što ŭ anhlijskaj movie nazyvajecca talking points, — tezisaŭ, jakija jana paŭtaraje z pramovy ŭ pramovu. I ŭžo nie adbyvajecca refleksii vakoł. Pazicyi nie mianiajucca. Ja nie viedaju, što pavinna adbycca», — davodzić analityk.
Pry hetym Šrajbman miarkuje, što navat kali ŭ budučyni represii sapraŭdy pačnuć źmiakčacca, Cichanoŭskaja i jaje kamanda nie źmieniać svajoj pazicyi.
«Śviatłana hetaha nie pryznaje. Śviatłana i jaje atačeńnie nie pryznajuć nijakaha źmiakčeńnia situacyi ŭ Biełarusi, kali jano adbudziecca. Ja hatovy zapeŭnivać, što jany buduć da apošniaha kazać, što nie, usio jak raniej, «nie śmiejcie iści na dyjałoh z hetym režymam». Navat kali heta buduć realnyja niejkija pazityŭnyja źmieny ŭ krainie. Ja čamuści baču ŭžo heta jak takuju vybranuju dla siabie fiksavanuju liniju, jakuju, ja nie viedaju, što moža pachisnuć», — davodzić analityk.
Adsiul Šrajbman robić i bolš ahulnuju vysnovu pra toje, jak źmianiałasia Cichanoŭskaja za apošnija hady: «Mnohija kazali pra toje, jak Śviatłana raźvivajecca, jak jana evalucyjanuje, jak jana vyrasła. Ja dumaju, što evalucyja skončyłasia».
Razam z tym Šrajbman nazvaŭ Cichanoŭskuju i astatnich lidaraŭ hierojami, jakija i nie musiać adpaviadać našym čakańniam.
Leŭ Lvoŭski i Jaŭhienija Suhak nie pahadzilisia z Arciomam Šrajbmanam. Na dumku Lvoŭskaha, Cichanoŭskaja «zastajecca reprezientacyjaj Biełarusi paśla 2020 hoda».
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj43
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary