U Čechii palaki źbili palaka, pryniaŭšy jaho za ŭkrainca z-za šapki ŭ kolerach Vierchniaj Silezii. Chłopiec jechaŭ u viełaprabieh dziela chvoraj na rak ciažarnaj partniorki
Hrupa mužčyn u Astravie napała na viełasipiedysta praz hałaŭny ŭbor, kolery jakoha jany pamyłkova pryniali za kolery ŭkrainskaha ściaha. Zdareńnie adbyłosia padčas dabračynnaj akcyi pa zbory srodkaŭ na lačeńnie ciažarnaj dziaŭčyny chłopca, jakaja zachvareła na rak. Rozhałas dapamoh sabrać nieabchodnuju sumu za adnu noč.
Uviečary 11 vieraśnia ŭ češskim horadzie Astrava polskija hramadzianie źbili 36‑hadovaha Kubu Chejsiha z Chožava. Pavodle infarmacyi Dziennik Zachodni, napad adbyŭsia, kali mužčyna viartaŭsia z kramy. Jon atrymaŭ niečakany ŭdar u hałavu, byŭ pavaleny na ziamlu i žorstka źbity nahami.
Napadniki pryniali jaho žoŭta-błakitny kapialuš za ŭkrainski ściah, pačali źnievažać mužčynu i kryčać, što jon «ŭkrainiec i banderaviec». Ahresaraŭ nie spyniŭ navat raźmieščany na hałaŭnym ubory nadpis «GÓRNY ŚLONSK».
Chejsih startavaŭ 9 vieraśnia na hruzavym viełasipiedzie (cargo). Maršrut daŭžynioj 800 kiłamietraŭ naŭmysna pralahaŭ uzdoŭž histaryčnych miežaŭ Vierchniaj Silezii takim čynam, kab mužčyna moh chutka viarnucca dadomu ŭ vypadku paharšeńnia stanu partniorki.
Metaj kampanii «Rajza dla Marceliny» byŭ zbor 300 tysiač złotych dla 30‑hadovaj ciažarnaj maci traich dziaciej Marceliny. U jaje dyjahnastavali złajakasny rak šyjki matki treciaj stadyi, jaki ŭskładniŭsia trambozam na fonie ciažkaj chimijaterapii.
Sabranyja srodki pryznačalisia na niekampiensavanyja leki, miedycynskaje charčavańnie i ŭtrymańnie siamji, pakolki para była vymušana spynić i abmiežavać pracoŭnuju dziejnaść.
Koleravaja hama kapieluša całkam adpaviadaje tradycyjnaj simvolicy Vierchniaj Silezii: rehijon maje žoŭta-błakitny ściah i hierb z załatym arłom na błakitnym ščycie. Paśla źbićcia paciarpieły byŭ dastaŭleny ŭ balnicu dla abśledavańnia. Spravu pieradali češskaj palicyi, jakaja zaraz vyśviatlaje akaličnaści napadu.
Pieršapačatkova ŚMI paviedamlali pra poŭnaje spynieńnie viełaprabiehu i viartańnie mužčyny dadomu, adnak paśla niekalkich hadzin u palicejskim pastarunku Chejsih praciahnuŭ maršrut.
Publikacyja infarmacyi pra źbićcio vyklikała ŭsplosk achviaravańniaŭ na płatformie Pomagam.pl, dziakujučy čamu ŭsia suma na lačeńnie była sabrana za adnu noč sa značnym pieravyšeńniem.
Pavodle vydańnia LIGA.net, u pieršaj pałovie 2026 hoda polskaja palicyja zarehistravała 180 paviedamleńniaŭ ab złačynstvach na hlebie nianaviści ŭ dačynieńni da ŭkraincaŭ, što na 30 pracentaŭ bolš za anałahičny pieryjad minułaha hoda.
«Naša Niva» — bastyjon biełaruščyny
PADTRYMAĆ
Kamientary