Dva hady ź bijaničnaj rukoj: jak žyvie francužanka, jakaja kantraluje svoj pratez siłaj dumki
Da 2018 hoda apieracyi nakštałt hetaj nikoli nie rabili ŭ Francyi i ŭvohule vielmi redka pravodzili ŭ śviecie. Voś čamu ŭstanoŭka bijaničnaj ruki, praź jakuju prajšła francužanka Pryscyła Debara, było krokam u nieviadomaść.
Adnak niadaŭna stała viadoma, što 19 sakavika ŭ klinicy Žula Vierna, što ŭ francuzskim Nancie, projdzie ŭžo druhaja takaja apieracyja. Padčas jaje novy pacyjent, 41-hadovy mužčyna z amputavanaj rukoj, atrymaje pratez, jaki jon zdoleje kantralavać z dapamohaj siły dumki. Paškodžanyja niervy ŭ jaho kuksie buduć znoŭ aktyvavanyja i pačnuć pieradavać rabatyzavanaj ruce sihnały ad mozhu. Dziakujučy hetamu ruka budzie ruchacca.
46-hadovaja Pryscyła Debara, jakaja prajšła hetuju apieracyju dva hady tamu, raspaviadaje, što čakała jaje piać hadoŭ. Jana viedała, što isnuje vialikaja ryzyka, i bolš za ŭsio bajałasia, što technałohija nie spracuje. Ciapier, praz dva hady intensiŭnaj reabilitacyi, mahčyma kazać pra toje, što apieracyja prajšła paśpiachova, paviedamlaje 20 minutes.
Pryscyła karystajecca bijaničnym pratezam štodzień, jana maje mahčymaść vykonvać chatniuju pracu i zajmacca sportam. Ź jaje starym pratezam hetyja rečy byli dla Pryscyły niedasiahalnyja.
Ciapier žančyna, jakaja zhubiła dźvie nahi i pravuju ruku padčas sproby samahubstva, pryśviačaje častku svajho času na toje, kab dzialicca svaim dośviedam. Pryscyła vystupaje ź lekcyjami, raspaviadaje karysnuju infarmacyju ludziam ź invalidnaściu, asabliva tym, chto čakaje pratez. U krasaviku navat čakajecca vychad knihi, pryśviečanaj historyi jaje žyćcia.
Technałohija, jakaja zabiaśpiečyła funkcyjanavańnie prateza Pryscyły, maje nazvu targeted muscle reinnervation, što možna pierakłaści jak «metavaja reinnervacyja muskułaŭ». Šmat ludziej źviartajucca ŭ kliniku Žula Vierna z zapytam na apieracyju takoha kštałtu, ale jany sutykajucca z vysokaj canoj prateza — prykładna 80 tysiač jeŭra.
Sama Pryscyła zdoleła apłacić apieracyju z dapamohaj achviaravańniaŭ, ale pry hetym jana nastojvaje na tym, što bijaničny pratez nie praźmiernaść. Na jaje mierkavańnie, jon dazvalaje čałavieku ź invalidnaściu isnavać bolš aŭtanomna, a heta daje mahčymaść lepš intehravacca ŭ hramadstva.
Ciapier čytajuć
Biełarusu na 100 hadoŭ zabaranili ŭjezd u Rasiju — za ŭdzieł u minskich maršach 2020 hoda6
Kamientary