«Jaŭrejskaje łobi», 500 miljonaŭ ad Sorasa i Čudziancoŭ. ANT pakazała film «Zabić prezidenta»

1) Juraś Ziankovič adčuvaŭ siabie abaronienym jak hramadzianin ZŠA i pry sustrečy adkryta kazaŭ biełaruskim siłavikam pra svoj płan źmieny ŭłady.

2) Pry hetym jon puskaŭ pył u vočy i biełaruskim siłavikam, raskazvajučy pra svaju ŭsiebakovuju zamiežnuju padtrymku (z kankretyki hučaŭ tolki Amierykanski jaŭrejski kanhres), i niejkim amierykanskim siłavikam, pra jakich jon nie viedaje ničoha — ni imionaŭ, ni miesca pracy. Im jon moh pakazać tolki abstraktny śpis biełaruskich siłavikoŭ, ale sam Ziankovič, vyhladaje, nie abapiraŭsia ni na jakuju realnuju siłu.

3) Na dopycie Ziankovič nazyvaje siabie «techničnym arhanizataram» i kaža, što jaho vykarystaŭ Dźmitryj Ščyhielski — adpraviŭ na sustreču z vajskoŭcami. Fiaduta taksama nazyvaje Ščyhielskaha ruchavikom.

4) Ryhor Kastusioŭ prosta słuchaŭ razmovu ŭ «Zumie» i nie vykazvaŭ nijakich idej. Kazaŭ, «mužyki, takaja tematyka razmovy nieprymalnaja».

5) Čaćviortaja abvinavačanaja, Volha Hałubovič, pryvoziła vajskoŭcam hrošy ad Ziankoviča i pakidała ŭ kamiery zachoŭvańnia. Taksama rabiła tajnik na mohiłkach.

6) Aryštavany eks-śpiecsłužbist Sidarakin (śpiecyjalist pa vybuchoŭkach) kaža, što Ihar Makar paprasiŭ jaho kupić dom z padvałam, kab vykradać ludziej, advozić tudy i «zadavać pytańni». Sidarakin — čałaviek ź ćmianym minułym, niezrazumieła, na kaho jon pracuje. U filmie jon kaža, što havorka išła pra vykradańnie… Lidzii Jarmošynaj.

7) U efiry hučać razmovy Siarhieja Cichanoŭskaha z advakatam. Zakanadaŭstva harantuje ich kanfidencyjnaść, ale heta nie pieraškoda dla siłavikoŭ i dla dziaržaŭnaha telebačańnia.

8) U jakaści palityčnaha ekśpierta pakazali tolki… asudžanaha žurnalista Uładzimira Čudziancova. Jon znachodzicca za kratami pa abvinavačvańni ŭ kantrabandzie narkotykaŭ i raspaŭsiudzie porna z 2019 hoda, ale ŭpeŭniena razvažaje pra toje, chto što moh rabić u 2020-2021. Raskazvaje i pra toje, što niechta niekali abmiarkoŭvaŭ mahčymaść źbić samalot z Łukašenkam, a taksama ździejśnić ataku z drona. Chto? Kali? U teoryi ci na praktycy?

9) Ekśpiert z boku uładaŭ — vypusknik akademii FSB, kolišni namieśnik Administracyi prezidenta Biełarusi Stanisłaŭ Kniazieŭ. Jon pierakazvaje fejk sa słovami, jakija nibyta naležać Marharet Tetčer. A paśla bieź nijakich dokazaŭ raskazvaje, što Džordž Soras nibyta vydzieliŭ 500 miljonaŭ dalaraŭ na revalucyju ŭ Biełarusi.

• 0
• 0
• 0
• 0
• 0
• 0
• 0
• 0