Pavodle novych patrabavańniaŭ rasijskaha zakona «Ab suviazi», zamiežnyja hramadzianie, u tym liku biełarusy, bolš nie mohuć nabyć abo zachavać dziejučuju rasijskuju SIM-kartu pavodle sproščanaj schiemy. Dla afarmleńnia spatrebiacca aryhinał pašparta, paćvierdžany ŭlikovy zapis na partale «Dziaržpasłuhi» i zdača bijamietryčnych dadzienych.
Padrychtoŭka dakumientaŭ i atrymańnie ŚNIAR (ŚNIŁS)
Pierad pačatkam pracedury pierakanajciesia, što ŭ vas na rukach aryhinał pašparta hramadzianina Biełarusi — fota abo kopii dakumienta siłavikami i apieratarami nie prymajucca. Akramia hetaha, patrabujecca ŚNIAR (strachavy numar indyvidualnaha asabovaha rachunku). Kali jaho pakul niama, atrymać numar možna biaspłatna ŭ dzień zvarotu ŭ lubym MFC abo ŭ adździaleńni Sacyjalnaha fondu Rasii (SFR).
Stvareńnie ŭlikovaha zapisu na «Dziaržpasłuhach»
Nastupny krok — stvareńnie i paćviardžeńnie profilu na rasijskim partale «Dziaržpasłuhi». Dla hetaha treba naviedać MFC abo adździaleńnie banka z pašpartam, ŚNIAR i dziejučaj elektronnaj poštaj. Supracoŭnik centra aformić i paćvierdzić ulikovy zapis u dzień zvarotu.
Kali vy ŭžo źjaŭlajeciesia klijentam rasijskaha banka i majecie rasijski numar, zarehistravacca možna samastojna praz QR-kod u bank-dadatku.
Zdača bijamietryi
Paśla rehistracyjnaha etapu nieabchodna pieradać bijamietryčnyja dadzienyja ŭ Adzinuju bijamietryčnuju sistemu (ABS). Pracedura prachodzić u adździaleńniach bankaŭ, jakija pracujuć z ABS. Z saboj treba mieć pašpart, ŚNIAR i elektronnuju poštu, pryviazanuju da «Dziaržpasłuh». Supracoŭnik banka zrobić vaša fota i zapiša hołas (spatrebicca pramović karotkuju paśladoŭnaść ličbaŭ).
Kupla i aktyvacyja SIM-karty
Z aryhinałam pašparta i mabilnaj pryładaj treba źviarnucca ŭ sałon abranaha apieratara suviazi. Zhodna z novymi praviłami, SIM-karta žorstka pryviazvajecca da ŭnikalnaha 15‑značnaha kodu pryłady (IMEI), tamu supracoŭnik pravieryć vaš telefon. Aktyvacyja adbyvajecca adrazu ŭ sałonie praź bijamietryčny terminał albo samastojna na «Dziaržpasłuhach» praz kamieru smartfona ci kampjutara.
Źviarnicie ŭvahu
Kali ŭ vas užo jość dziejučaja rasijskaja SIM-karta, prajści zdaču bijamietryi ŭsio roŭna daviadziecca, inakš apieratar jaje zabłakuje.
Akramia taho, rasijskaje zakanadaŭstva abmiažoŭvaje kolkaść numaroŭ — na adnaho zamiežnika dazvalajecca afarmlać nie bolš za 10 SIM-kart. Śpis usich zarehistravanych na vas numaroŭ možna kantralavać u asabistym kabiniecie na «Dziaržpasłuhach».
U siamji Mironcavych za palityku ŭžo asudzili maci i troch siaścior. A ciapier aryštavali i muža adnoj ź siaścior3
Kamientary