26 krasavika byŭ zatrymany Dzianis Kraŭčuk.
Pra heta «Našaj Nivie» raskazała mama Dzianisa Nadzieja Michajłaŭna. Zatrymańnie adbyłosia ŭviečary 26 krasavika. Prykładna a 18-j hadzinie ŭ kvateru Kraŭčukoŭ pryjšli bolš za dziesiać supracoŭnikaŭ KDB.
Dzianisu adrazu nadzieli na ruki kajdanki, pakazali pastanovu ab pieratrusie, u jakoj čamuści nie byŭ paznačany kryminalny artykuł, pa jakim adbyvajecca dziejańnie. Kraŭčuka chutka zabrali, dazvoliŭšy ŭziać z saboj ručnik i zubnuju pastu. Pieratrus pravodzili ŭ prysutnaści svajakoŭ. Zabrali niekalki starych telefonaŭ, a taksama CD-dyski z zapisami viasiellaŭ i pachavańniaŭ. Taksama pieratrus praviali ŭ haražy, padvale i mašynie.
«Pozna ŭviečary patelefanavaŭ śledčy, jaki skazaŭ, što na nastupny dzień patrebny advakat, inačaj budzie dziažurny», — raskazvaje mama Dzianisa.
Ciapier Dzianis prachodzić u jakaści abvinavačanaha pa artykule 357 KK «Zmova ci inšyja dziejańni, ździejśnienyja z metaj zachopu dziaržaŭnaj ułady». Termin znachodžańnia pad vartaj praciahnuty da 2 miesiacaŭ.
Jak Kraŭčuk źviazany ź Ziankovičam? Pierad prezidenckimi vybarami-2020 Dzianisa zatrymali jak naziralnika i asudzili da 10 sutak aryštu. Atrymałasia tak, što jon adbyvaŭ pakarańnie ŭ adnoj kamiery ź Jurasiom Ziankovičam, jakoha zatrymali za akcyju pratestu ŭ Miadzieli 9 žniŭnia.
«Ščylna jany nie stasavalisia», — pierakonvaje mama.
Pa adnoj ź viersij, Kraŭčuk dahladaŭ dom Ziankoviča na Miadzielščynie, pakul haspadar žyŭ u ZŠA.
26 kastryčnika Kraŭčuk uładkavaŭsia na pracu ŭ Litvu dalnabojščykam, u listapadzie źjechaŭ tudy.
«Jon rychtavaŭsia da pracy, tamu ŭžo ni ŭ jakich maršach i demanstracyjach nie ŭdzielničaŭ. 8 krasavika jon pryjechaŭ u Biełaruś, kab praciahnuć vizu. Kali jon taki niebiaśpiečny złačynca, to čamu jaho nie zatrymali adrazu pry pierasiačeńni miažy? Usie ŭ nas u Naračy viedajuć, što Dzianis vielmi hodny i adkazny čałaviek, ničoha kiepskaha nie zrobić», — kaža Nadzieja Michajłaŭna.
Dzianis rodam ź Miadzielskaha rajona. Skončyŭ fizičny fakultet BDU, fizik-daśledvalnik. Pracavaŭ na roznych pradpryjemstvach, navukovym supracoŭnikam u Nacyjanalnym parku «Naračanski», ale prablemy ŭźnikali praź jaho hramadskuju dziejnaść.
U 2018 hodzie Kraŭčuk prasłaviŭsia tym, što na miascovych vybarach vykryŭ karusieli padčas daterminovaha hałasavańnia i dziakujučy hetamu zmoh prahałasavać try razy na troch roznych učastkach.
Ciapier chłopiec znachodzicca ŭ SIZA KDB. Rodnyja kažuć, što Dzianis trymajecca narmalna, jon upeŭnieny ŭ svajoj nievinavataści.
Taksama pa hetaj spravie prachodziać juryst z ZŠA Juraś Ziankovič, litaraturaznaŭca Alaksandr Fiaduta, staršynia Partyi BNF Ryhor Kastusioŭ i kiraŭnica minskaha ofisa Ziankoviča Volha Hałubovič.
Ciapier čytajuć
Cichanoŭskaja pra muža: Uvieś jahony śviet pierakuleny15
Kamientary