Charčovaja dabaŭka Je171, jakaja jość u žujkach, bolš nie ličycca biaśpiečnaj
Da takoj vysnovy pryjšło Jeŭrapiejskaje ahienctva pa biaśpiecy praduktaŭ charčavańnia (EFSA).
EFSA abnaviła svaju acenku biaśpieki charčovaj dabaŭki Je171 (dyjaksid tytanu). Jeŭrapiejski rehulatar śćviardžaje, što hetu dabaŭku bolš nielha ličyć biaśpiečnaj, kali jana vykarystoŭvajecca ŭ ježy.
Je171 — heta bieły charčovy farbavalnik, jaki nadaje ježy pryciahalny vyhlad. Hetuju dabaŭku taksama vykarystoŭvajuć u lekach, kaśmietycy i farbach. Je171 časta vykarystoŭvajecca ŭ žujkach, a taksama sousach, bulonach i inšych praduktach, kab nadać im patrebny koler. Je171 jość i ŭ kremach ad sonca, papiery, biełym myle i ŭ mnohich inšych pradmietach biełaha koleru.
Vysnovy EFSA datyčacca tolki charčovych praduktaŭ. Usimi inšymi pradmietami, jakija majuć u składzie Je171, karystacca biaśpiečna.
Škoda ad pieraralnaha ŭžyvańnia Je171 daśledčyki pakul nie dakazali, ale jany bolš nie mohuć harantavać biaśpieku hetaj dabaŭki dla arhanizma. EFSA praanalizavała ŭsie dastupnyja navukovyja źviestki i ciapier nie vyklučaje, što dabaŭka moža być hienataksičnaj, tamu jana nie moža razhladacca biaśpiečnaj u ježy.
Apošnija ahlad Je171 jeŭrapiejski rehulatar pravodziŭ u 2016 hodzie. Tady daśledčyki pryjšli da vysnovy, što dabaŭka biaśpiečnaja, ale zastavalisia prabieły ŭ jaje vyvučeńni. Za apošnija hady dadałosia bolš źviestak, jakija śviedčać pra mahčymy admoŭny ŭpłyŭ Je171 na zdaroŭje.
Daśledčyki vyjavili, što Je171 moža być hienataksičnym. Heta značyć, što dabaŭka moža škodzić DNK, što patencyjna moža pryvieści da mutacyj i ankałahičnych zachvorvańniaŭ. Jość daśledavańni, dzie na myšach było pakazana, jak nanačaścicy TiO₂ mohuć mieć taki admoŭny ŭpłyŭ. Adnak navukoŭcy nie vyśvietlili, čamu heta adbyvajecca, a ŭ niekatorych inšych daśledavańniach takoha paškodžańnia kletak nie było.
Tamu dakładnaha miechanizma hienataksičnaści Je171 niama, ale vyklučyć jaje najaŭnaść navukoŭcy nie mohuć. Heta značyć, što dapuščalnaje dzionnaje ŭžyvańnie Je171 nie moža być vyznačana.
Je171 pakul nie zabaronienaja, ale jość imaviernaść, što vysnovy novaha dakłada abumoviać zabaronu hetaj dabaŭki ŭ budučyni.
Dźmitryj Łukašenka choča pastavić pad kantrol usie mabilnyja telefony11
Kamientary