Lohkaatletku Kryścinu Cimanoŭskuju źbiralisia vysłać z Tokia ŭ Biełaruś. Jana budzie prasić prytułak u Jeŭropie
U niadzielu zdaryŭsia incydent ź biełaruskaj lohkaatletkaj Kryścinaj Cimanoŭskaj. Jana zajaviła, što jaje adpraŭlajuć z Alimpijady ŭ Tokia dachaty. Cimanoŭskaja źbirajecca prasić prytułak u Jeŭropie.
U piatnicu Kryścina ŭ svaim instahramie raskrytykavała kiraŭnictva zbornaj za rašeńnie raptoŭna pastavić jaje na estafietu 4 pa 400 mietraŭ, u jakoj jana nie płanavała ŭdzielničać. Spartoŭka rychtavałasia biehčy spryntarskuju dystancyju ŭ 100 i 200 mietraŭ.
Za publičnaje abureńnie Kryścinu raskrytykavali praŭładnyja telehram-kanały.
U niadzielu 1 žniŭnia Kryścina paviedamiła, što jaje pryvieźli ŭ aeraport i źbirajucca adpravić u Biełaruś rejsam praz Stambuł.
Dziaŭčyna raskazała pra akaličnaści jaje vyvazu z alimpijskaj vioski. Nijakich pretenzij joj nie vykazvali, prosta skazali źbirać rečy. U aeraport jaje supravadžaŭ psichołah zbornaj i jašče adzin pradstaŭnik delehacyi.
Zbornaja Biełarusi prakamientavała akaličnaści situacyi z Kryścinaj:
«Pavodle zaklučeńnia daktaroŭ, u suviazi z emacyjna-psichałahičnym stanam biełaruskaj lohkaatletki Kryściny Cimanoŭskaj, trenierskim štabam nacyjanalnaj kamandy pa lohkaj atletycy pryniata rašeńnie ab spynieńni vystupu spartsmienki na Hulniach XXXII Alimpijady. Takim čynam, adklikanaja zajaŭka spartsmienki na ŭdzieł u kvalifikacyjnych zabiehach na 200 m i ŭ estafiecie 4ch400 m».
Cimanoŭskaja rašuča abvierhła aficyjnuju pryčynu, nazvanuju zbornaj Biełarusi. Jana zajaviła, što nijakija daktary jaje nie ahladali.
Kryścina źviarnułasia z prośbaj ab dapamozie ŭ Mižnarodny alimpijski kamitet: «Ja prašu Mižnarodny alimpijski kamitet ab dapamozie. Na mianie byŭ akazany cisk, mianie sprabujuć vyvieźci z krainy biez majoj zhody. Tamu ja prašu Mižnarodny alimpijski kamitet umiašacca ŭ heta», — skazała Kryścina ŭ videazvarocie.
MAK zajaviŭ, što vyvučyć jaje prośbu, a da dziaŭčyny vyjechali pradstaŭniki MZS Japonii.
Kryścina taksama skazała žurnalistam, što baicca viartacca ŭ Biełaruś: «U Biełarusi mianie, mahčyma, mohuć pasadzić u turmu. Ja nie bajusia taho, što mianie zvolniać abo vyhaniać z nacyjanalnaj kamandy. Ja turbujusia pra svaju biaśpieku. I dumaju, što na ciapierašni momant u Biełarusi dla mianie niebiaśpiečna», — skazała jana.
«Zaraz ja ŭ palicyi, a dalej budu prasić prytułak. Krok za krokam budziem dziejničać. Ja płanuju pakinuć Tokia, ale nie tym rejsam, jakim mianie chacieli adpravić. Ciapier ja pad abaronaj palicyi», — skazała Kryścina.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary