Kaścioł u Biełarusi asudziŭ publikacyju ŭ haziecie «Minskaja praŭda» i rasceńvaje jaje jak raspalvańnie varožaści
Pa daručeńni staršyni Kanfierencyi katalickich biskupaŭ u Biełarusi biskupa Viciebskaha Aleha Butkieviča pazicyju biełaruskaha katalickaha jepiskapatu adnosna publikacyi ŭ haziecie «Minskaja praŭda» (№ 68 ad 7 vieraśnia 2021 hoda) vykazvaje staršynia Kamisii pa spravach katalickaj adukacyi i katechiezy pry KKBB biskup Alaksandr Jašeŭski SDB.
«U siońniašnim numary haziety «Minskaja praŭda» (№ 68 ad 7 vieraśnia 2021 hoda), zasnavalnikam jakoj źjaŭlajecca Minski abłasny vykanaŭčy kamitet, na pieršaj staroncy apublikavana karykatura Antona Astroŭskaha. Na malunku — vyjava katalickich śviataroŭ u charakternym adzieńni, svastyki, bieł-čyrvona-biełaha ściaha, dapoŭnienaja słovami biełaruskaha chryścijanskaha himna «Mahutny Boža» na fonie skažonaj repliki abraza Rosickich mučanikaŭ — śviataroŭ, jakija padčas Druhoj suśvietnaj vajny razam sa svaimi viernikami mužna pryniali śmierć ad ruk nacysckich karnikaŭ. Malunak padpisany na ruskaj movie: «Mutacija viery. Kriesty byvajut raznyje…»
Ryma-Katalicki Kaścioł u Biełarusi adnaznačna asudžaje zhadanuju publikacyju ŭ haziecie «Minskaja praŭda» i rasceńvaje jaje jak raspalvańnie varožaści ŭ biełaruskim hramadstvie da Ryma-Katalickaha Kaścioła ŭ Biełarusi, asabliva da jaho ijerarchaŭ i preźbiteraŭ. Dadzienaja publikacyja nanosić vialikuju abrazu relihijnym pačućciam viernikaŭ Katalickaha Kaścioła. Karykatura, na jakoj kryž pieratvarajecca ŭ svastyku, a taksama svastyka, źmieščanaja zamiest kryža, abražaje nie tolki śviataroŭ, ale ŭ pieršuju čarhu źnievažaje Kryž Chrysta Zbaŭcy, jaki na im addaŭ žyćcio za zbaŭleńnie ludziej. Na dumku katalickich biskupaŭ Biełarusi, hetaja publikacyja niasie maralnuju škodu ŭsim chryścijanam roznych kanfiesij. Publikacyja taksama ŭskosna abvinavačvaje ŭsio katalickaje duchavienstva ŭ mierkavanaj prychilnaści da fašyzmu i nacyzmu, što źjaŭlajecca śviadomym i złamysnym skažeńniem praŭdy, paklopam i abrazaj.
Biskupy Ryma-Katalickaha Kaścioła ŭ Biełarusi spadziajucca, što adpaviednyja orhany dziaržaŭnaj ułady daduć naležnuju pravavuju acenku dadzienaj karykatury i publikacyi ŭ haziecie «Minskaja praŭda», źmieščanaj u № 68 ad 7 vieraśnia 2021 hoda, niezadoŭha da śviatkavańnia Dnia narodnaha adzinstva», — havorycca ŭ zvarocie.
-
Były redaktar Nexta Jan Rudzik ažaniŭsia ŭ Kijevie i raskazaŭ, jak pahroza «Arešnikam» padšturchnuła zrabić prapanovu
-
Pakajańnie za 2020‑y nie dapamahło — kancertaŭ «Drazdam» nie dajuć. Hurt spyniaje vystupy, Karpanaŭ idzie ŭ biełaruskamoŭny stendap
-
Piatro Piatroŭski choča, kab u Minsku pastavili pomnik Stalinu
Ciapier čytajuć
«Vyzvalali niemcaŭ ad fašyzmu, a sami zastavalisia ŭ tym ža dziarmie». Apublikavana treciaja častka ŭspaminaŭ Ryhora Biarozkina pra savieckija represii3434
Kamientary