Biełaruska niekalki miesiacaŭ padmanvała kasy samaabsłuhoŭvańnia ŭ kramie
U Kličavie sud vynies prysud miascovaj žycharcy, jakuju pryznali vinavataj u zamachu na tajemny kradziež majomaści. Niekalki miesiacaŭ žančyna roznymi sposabami sprabavała nie płacić za tavary ŭ kramie bujnoj handlovaj sietki, paviedamili ŭ pres-słužbie Mahiloŭskaha abłasnoha suda.
Jak ustanaviŭ sud, sa studzienia pa krasavik 2026 hoda žančyna nieadnarazova krała pradukty charčavańnia, srodki hihijeny, bytavuju chimiju i inšyja tavary. U niekatorych vypadkach jana skanavała pakupki na kasie samaabsłuhoŭvańnia, atrymlivała papiaredni ček, ale nie apłačvała tavary i vychodziła z kramy.
U inšych vypadkach pry ŭzvažvańni tavaraŭ žančyna paznačała pradukcyju ź mienšaj canoj, čym nasamreč vybirała. Takim čynam, za niekalki miesiacaŭ žančyna tajemna vyniesła tavaraŭ bolš čym na 770 rubloŭ. Ahulny košt majomaści, jakuju jana sprabavała skraści, skłaŭ kala 830 rubloŭ.
Apošniaja sproba adbyłasia 6 krasavika. Žančyna pasprabavała vynieści z kramy tavary bolš čym na 50 rubloŭ, ale na vychadzie z handlovaj zały jaje spyniŭ supracoŭnik achovy. Davieści zadumanaje da kanca jana nie zmahła.
U sudzie žančyna całkam pryznała svaju vinu. Pry vyniasieńni prysudu sud uličyŭ jaje ščyraje raskajańnie, toje, što na jaje ŭtrymańni znachodziacca troje małaletnich dziaciej, a taksama dobraachvotnaje pakryćcio naniesienaj škody. Abciažarvalnych abstavinaŭ sud nie vyjaviŭ.
U vyniku žančynie pryznačyli adzin hod pazbaŭleńnia voli. Adnak sud pastanaviŭ nie pryvodzić hetaje pakarańnie ŭ vykanańnie, kali na praciahu vyprabavalnaha terminu praciahłaściu adzin hod jana nie ździejśnić novaha złačynstva i budzie vykonvać uskładzienyja na jaje abaviazki.
Ciapier čytajuć
U Čechii palaki źbili palaka, pryniaŭšy jaho za ŭkrainca z-za šapki ŭ kolerach Vierchniaj Silezii. Chłopiec jechaŭ u viełaprabieh dziela chvoraj na rak ciažarnaj partniorki2525
Kamientary