Prajekt abnoŭlenaj kanstytucyi Biełarusi buduć jašče miesiac dapracoŭvać

«Heta nie apošniaja naša sustreča. Ja jašče raz ahuču toje, što spačatku kazaŭ. Administracyja prezidenta padrychtuje rasparadžeńnie prezidenta, jakim budzie stvorana hrupa, što dapracuje prajekt Kanstytucyi i vyjdzie na bolš daskanały prajekt.

Ja budu ź imi časta sustrakacca, kab adkazać na niejkija pytańni», — skazaŭ siońnia Łukašenka pa vynikach narady nakont Kanstytucyi.

«A potym, pierad uniasieńniem na ŭsienarodnaje abmierkavańnie taho prajekta, my z vami ŭ takim ža składzie źbiaromsia. Kamisija nie raspuskajecca, nie źnikaje. Jana praciahvaje pracavać. Hrupu vy budziecie viedać. Unosicie vy taksama tudy svaje prapanovy, — dadaŭ Łukašenka. —

Hrupa jurystaŭ paśla ŭsienarodnaha abmierkavańnia kožny radok prahledzić i kančatkova jurydyčnaj movaj prapiša dakumient, jaki budzie vynosicca na refierendum. Voś dzie jurysty buduć. A hetaja hrupa pavinna być nie tolki jurystaŭ. Hetaja pavinna być hrupa śpiecyjalistaŭ, dzie pavinny być i ekanamisty, i kiraŭniki».

U jakaści prykładu Alaksandr Łukašenka pryvioŭ pytańnie ab tym, jakimi pavinny być funkcyi i rola Usiebiełaruskaha narodnaha schodu: «Vy što, ličycie, što jurysty pa śpiecyjalnaści lepš buduć viedać, čym Andrejčanka [staršynia Pałaty pradstaŭnikoŭ] funkcyi hetyja? Nie. Jon heta prajšoŭ, heta ŭsio jaho žyćcio. I jon užo budzie viedać, jak ekśpiert: heta padydzie, heta — nie. Heta budzie jaho mierkavańnie. Voś jon nie juryst, choć u parłamiencie daŭno ŭžo jurystam taksama staŭ».

«Tamu roznyja pavinny być ludzi. Vysokaha ŭzroŭniu. Kiraŭniki pavinny być mocnyja. A potym kančatkovy varyjant, Volha Ivanaŭna [namieśnik kiraŭnika Administracyi Volha Čuprys], kali łaska, źbiarycie jurystaŭ i pahladzicie ź jurydyčnaha punktu hledžańnia. Bo Kanstytucyja — heta pieradusim jurydyčny dakumient», — skazaŭ Łukašenka.

Takim čynam, paśla dapracoŭki ciapierašniaha prajekta i jaho ŭsienarodnaha abmierkavańnia jurysty kančatkova dapracujuć dakumient i pradstaviać Łukašenku dla nastupnaha vyniasieńnia na refierendum.

Jon akcentavaŭ uvahu: na hetym etapie ŭ hrupie pa dapracoŭcy prajekta novaj Kanstytucyi mohuć uziać udzieł i členy Kanstytucyjnaj kamisii. «Hetaja hrupa nie tolki ź ciapier prysutnych ludziej. Hetych ludziej treba vyznačyć. Z takoj hrupaj ja dapracoŭvaŭ asabista Kanstytucyju hetuju (havorka ab praktycy padrychtoŭki siońniašniaha prajekta), — adznačyŭ Łukašenka. — Nie treba kazać, što Kanstytucyja — heta sprava jurystaŭ. Nie. Jurysty, kali budzie ideja, mohuć jaje ablehčy ŭ lubuju formu. Ale heta ŭžo budzie na apošniaj stadyi».

Naprykancy Łukašenka pastaviŭ dakładnyja zadačy i davioŭ terminy: «Treba ŭ najbližejšy tydzień unieści prapanovu pa hetaj hrupie. Kab my na praciahu chacia by miesiaca dapracavali Kanstytucyju.

Potym źbiaromsia, jašče raz abmiarkujem, vyniesiem na razhlad naroda. I ŭ kancy jurysty dapracujuć. My znoŭ z vami źbiaromsia pierad vyniasieńniem na refierendum. Vy zahadzia atrymajecie prajekt, pračytajecie, prahladzicie, i kančatkova prymiem rašeńnie», — skazaŭ jon.

Nahadajem, što refierendum pavinien prajści nie paźniej za luty 2022 hoda.

• 0
• 0
• 0
• 0
• 0
• 0
• 0
• 0