Chto toj zamiežnik, jaki zabiŭ žonku i zhvałtavaŭ padčarku ŭ Dobrušy

U aficyjnym paviedamleńni prakuratura kaža, što mužčyna nie byŭ biełarusam, nazyvajučy jaho «zamiežnik». Karystalnikaŭ sacsietak zacikaviła, adkul jon. Adna z udzielnic abmierkavańnia padzialiłasia, što znajomaja z hetaj historyjaj. Pa jaje słovach, heta była šmatdzietnaja siamja z Ukrainy, jakaja ŭciakała ad vajny. «Usim horadam im dapamahali, a akazałasia voś tak usio…», — adznačyła jana.

«Pahražaŭ fizičnaj raspravaj» jašče za piać hadoŭ da trahiedyi

«Lusterka» pravieryła hetuju infarmacyju i znajšło siamju. Ich bijahrafičnyja danyja supali ź infarmacyjaj prakuratury, a vizualnyja detali — z fatahrafijaj ź miesca złačynstva.

Volha i Anton (imiony źmienienyja) rodam z Danieckaj vobłaści. Volha ŭ sacsietkach paznačała svaim rodnym horadam Saladar i Bachmut, Anton — pasiołak Drobyšava, Saladar i Bachmut.

U Volhi było čaćviora dziaciej ad minułaha šlubu — try syny i dačka. U 2018 hodzie jana aformiła razvod ź ich baćkam i padała na alimienty. U mai 2019 hoda Volha vyjšła zamuž za Antona, šlub zarehistravali ŭ Saladary. U aficyjnych bazach zachavalisia zapisy ab tym, što ŭ minułym Anton byŭ sudzimy, u tym liku za razboj, niekatory čas znachodziŭsia ŭ vyšuku.

U pary naradziłasia dvoje dziaciej. Adnak letam 2020 hoda adnosiny razładzilisia. U vieraśni mužčyna ŭčyniŭ siamiejnuju svarku, «vykazvaŭsia niecenzurnaj łajankaj u adras svajoj žonki i pahražaŭ joj fizičnaj raspravaj», havorycca ŭ adnym z sudovych dakumientaŭ. Volha źviarnułasia ŭ palicyju, sprava dajšła da suda, Antona aštrafavali.

Paralelna žančyna źviarnułasia ŭ sud, kab aformić alimienty na ich ahulnych dziaciej — i jaje zapyt padtrymali. U sudovym dakumiencie havorycca, što šlubnyja adnosiny faktyčna byli spynienyja z-za «pastajannych svarak i roznych pohladaŭ na siamiejnaje žyćcio».

«Jechali absalutna ŭ nikudy»

Ale ž, zdajecca, historyja pary na hetym nie zakončyłasia. Paśla hetaha jany sumiesna kupili dom, vierahodna, u siamji źjaviłasia jašče adno dzicia. U 2022—2023 hadach Bachmut byŭ całkam razburany ŭ chodzie bajoŭ padčas rasijskaha ŭvarvańnia va Ukrainu i akupavany. Z studzienia 2023 hoda Saladar taksama apynuŭsia pad akupacyjaj, horad nazyvali «samaj haračaj kropkaj vajny» na toj momant.

Volha i Anton vyrašyli pierajechać u Biełaruś.

— Uziać usich u achapku i ŭciakać va ŭkryćcio nie tak lohka. My spačatku, tak, chacieli zastacca, a potym — nu nie, ryzykavać dziećmi — heta niejak zanadta. Jechali absalutna ŭ nikudy, — pryznavałasia Volha ŭ siužecie biełaruskaha dziaržkanała, jaki vyjšaŭ letam 2023 hoda.

Śpiarša vialikaja siamja znachodziłasia ŭ punkcie časovaha raźmiaščeńnia, paśla pierajechała ŭ Dobruš. U intervju Volha raspaviadała, što ŭ Biełarusi joj padabajecca.

U siužecie havaryłasia, što siamji dapamahli z pošukam pracy. Čym Anton zajmaŭsia ŭ Biełarusi — nieviadoma. Na adnym z sajtaŭ, pryśviečanych pošuku vakansij, zachavałasia reziume Volhi, apublikavanaje ŭ 2024 hodzie. Jana pisała, što ŭ minułym advučyłasia na kuchara, ale ž hatova «razhledzieć lubyja varyjanty» ŭ Minsku. Žančyna taksama pakazvała, što nie zamužam i maje biełaruskaje hramadzianstva (ciažka skazać, ci heta było praŭdaj).

«Akazalisia ŭ ciažkaj žyćciovaj situacyi»

Letam 2025 hoda siamja Volhi i Antona atrymała materyjalnuju dapamohu, jakuju źbirali pry ŭdziele Dobrušskaj kamisii pa spravach niepaŭnaletnich, Biełaruskaha tavarystva Čyrvonaha Kryža i nieabyjakavych biełarusaŭ. Miascovaje vydańnie ŭ publikacyi ab hetym adznačała, što «najbolš aktyŭnymi byli miedyki, rabotniki haliny kultury, adukacyi». Miarkujučy pa fota, Volzie ŭručyli mikrachvalevuju pieč.

U toj ža publikacyi havaryłasia, što niekatoryja z tych siemjaŭ, što atrymali dapamohu, trapili ŭ pole zroku kamisii pa spravach niepaŭnaletnich «tamu, što akazalisia ŭ ciažkaj žyćciovaj situacyi».

Pavialičyć

Trahiedyja zdaryłasia ŭžo praz try miesiacy — u kastryčniku 2025 hoda. Pjany Anton zabiŭ Volhu, jakaja na toj momant była ciažarnaja. Adzin z synoŭ sprabavaŭ jaje abaranić — i atrymaŭ nažavyja ranieńni. Na ščaście, chłopčyk zmoh vyratavacca.

Paśla hetaha mužčyna, «demanstrujučy nož, ździejśniŭ kala trupa zabitaj im žonki dziejańni seksualnaha charaktaru ŭ adnosinach da padčarki, paśla čaho zhvałtavaŭ jaje».

Antona zatrymaŭ AMAP, pad vartaj jon čakaje suda pa cełym śpisie artykułaŭ. Mužčynu pazbavili baćkoŭskich pravoŭ na traich jaho dziaciej. Usich dziaciej śpiarša zabrali ŭ balnicu, paśla nakiravali ŭ terytaryjalny sacyjalna-piedahahičny centr. Paśla ich uładkavali ŭ pryjomnuju siamju.

• 0
• 0
• 2
• 30
• 12
• 8
• 14
• 0