Były bajec SACHR Haraŭski: U Biełarusi na mianie zaviedziena kryminalnaja sprava, siamju apytvaje KDB
KDB akazvaje cisk na siamju Juryja Haraŭskaha, jaki pryznaŭsia ŭ źniščeńni palityčnych apanientaŭ Alaksandra Łukašenki ŭ 90-ch. Pra heta były siłavik paviedamiŭ niamieckamu radyjo, abvieščanamu biełaruskimi ŭładami ekstrymisckim.
U 2019 hodzie bajec biełaruskaha SACHRu Juryj Haraŭski publična zajaviŭ, što ŭdzielničaŭ u zabojstvie palityčnych apanientaŭ Alaksandra Łukašenki. Ciapier jon znachodzicca ŭ Šviejcaryi, u jakoj zapytaŭ palityčny prytułak.
Pa słovach Haraŭskaha, niadaŭna na jahonych svajakoŭ adnaviŭsia cisk z boku KDB, a na jaho samoha ŭzbudžanaja kryminalnaja sprava.
U śniežni 2019 hoda vyjšaŭ film pra Juryja Haraŭskaha, u jakim jon pryznaŭsia, što ŭdzielničaŭ u vykradańni i zabojstvie byłoha staršyni CVK Biełarusi Viktara Hančara, eks-ministra ŭnutranych spraŭ Juryja Zacharanki, biznesmena Anatola Krasoŭskaha ŭ kancy 1990-ch hadoŭ.
Cisk na svajakoŭ
Paśla publikacyi videa, raspaviadaje Haraŭski, jahonych svajakoŭ niekalki razoŭ vyklikali ŭ KDB — u Biełarusi ŭ jaho zastalisia maci, brat, byłaja žonka i dačka. Praź niekatory čas cikavaść da ich źnikła.
U śniežni 2021 hoda cisk na siamju Haraŭskaha adnaviŭsia: na pracu da jahonaha brata pryjechali supracoŭniki AMAPa i advieźli ŭ budynak Hienprakuratury, dzie jaho apytvali kala piaci hadzin, śćviardžaje Juryj Haraŭski.
«Apytvali nie radavyja starejšyja lejtenanty, a padpałkoŭniki i pałkoŭniki KDB. Nie adzin ci dva, a čałaviek piać, jak mnie raskazaŭ brat. Pytalisia, z kim ja mieŭ znosiny, siabravaŭ, kali svajaki apošni raz sa mnoj razmaŭlali. Brat adkazaŭ, što i da majho adjezdu my mała razmaŭlali. Pierasiakalisia albo doma ŭ maci, albo na dačy. Jon praktyčna ničoha pra mianie nie viedaŭ».
6 studzienia 2022 hoda, kaža Jury Haraŭski, jon daviedaŭsia, što na jaho zaviedziena kryminalnaja sprava. Pa jakim artykule, jamu nie paviedamili. Krynicu hetaj infarmacyi Haraŭski nie raskryvaje:
«Kali razvažać łahična, to spravu suprać mianie mahli ŭzbudzić za padziei 20-hadovaj daŭniny, ale ŭsie saŭdzielniki hetych złačynstvaŭ praciahvajuć zastavacca na voli. Albo maje słovy mahli rascanić jak paklop. Albo naohuł — zamacham na nacyjanalnuju biaśpieku krainy».
Pavodle Haraŭskaha, paśla vymušanaha vizitu ŭ Hienprakuraturu ŭsie jahonyja rodnyja ź niejkaj pryčyny stali nievyjaznymi. U ramkach jakoj kryminalnaj spravy — jamu nieviadoma:
«Jany nie mohuć nikudy zjeździć adpačyć abo pa pakupki. Plus da ŭsiaho, kali brat byŭ u Hienieralnaj prakuratury i jaho apytvali [supracoŭniki] z Kamiteta dziaržbiaśpieki, skazali nie pakidać Minsk. Na padstavie čaho? Čamu jon staŭ nievyjaznym? Ja nie razumieju i nie mahu zrazumieć. Jany chočuć zadać pytańni mnie. Pryčym tut svajaki? Kali ździajśnialisia hetyja złačynstvy, brat naohuł byŭ maleńki, chadziŭ u škołu.Z bratam my chutka [paśla vizitu ŭ Hienprakuraturu] pierahavaryli. Paśla hetaha jon vydaliŭsia z usich miesendžeraŭ.Bolš ź im nie razmaŭlali».
Haraŭski kaža, što biełaruskija śpiecsłužby naŭprost ź im nie źviazvalisia. Śćviardžaje, što nie viedaje i nie razumieje, čamu mienavita zaraz jany znoŭ zacikavilisia im, kali na praciahu apošnich dvuch hadoŭ nijakaj cikavaści nie prajaŭlali:
«(Paśla vychadu filma — Red.) śledstva było adnoŭlena, ale ŭsio puścili na samaciok, nibyta niama dokazaŭ. Jak niama dokazaŭ, kali jość dakładnyja dadzienyja, jakija ja mahu ŭkazać, dzie byli zabityja i pachavanyja Hančar, Krasoŭski, Zacharanka? Dumaju, chočuć, kab ja zmoŭk raz i nazaŭsiody. Ułada niachaj jašče hod pratrymajecca, maksimum dva, ale narod jaje źniasie. A ŭ Łukašenki ruki ŭ kryvi. Mnie zdajecca, heta maralny cisk (na svajakoŭ — Red.), kab byli padstavy brata pasadzić i skazać mnie: «Jon siadzić z-za ciabie».
Haraŭski rychtuje zajavu ŭ Hienprakuraturu RB
Jury Haraŭski kaža, što viartacca ŭ Biełaruś nie źbirajecca. Ciapier jon płanuje napisać zajavu ŭ Hienieralnuju prakuraturu Biełarusi, u jakoj choča pryznacca ŭ saŭdziele ŭ złačynstvach, «kab pačalisia narmalnyja vyšukovyja mierapryjemstvy».
Letam i vosieńniu 2021 hoda Juryj Haraŭski davaŭ pakazańni šviejcarskim uładam pa spravie ab źniknieńni Hančara, Krasoŭskaha i Zacharanki, raskazvaje były siłavik.
«Ja byŭ dapytany prakuroram adnaho z kantonaŭ. Pieršy raz mianie vyklikali ŭ lipieni i apytvali z advakatam i pierakładčykam paradku 9-10 hadzin. Druhi raz — u pačatku vieraśnia — kala 8 hadzin. Ci adbudziecca sud, pakul nie viedaju».
Były śpiecnazaviec: Ja ŭdzielničaŭ u zabojstvie Zacharanki i Hančara
«Jany stralali ŭ śpinu»: dačka Zacharanki sustrełasia z eks-bajcom śpiecnazu Juryjem Haraŭskim
Ciapier čytajuć
«Pra sustreču Łuku zaŭsiody prasili pieradać Pucinu». Šuster raskazaŭ, jak Łukašenka prapanoŭvaŭ svaje pasłuhi amierykancam6
Kamientary