U Akademii milicyi raskazali, jak dziaržava pavinna pracavać z błohierami. I nazvali błakiroŭku sajtaŭ nieefiektyŭnaj
U navukovym časopisie Akademii Ministerstva ŭnutranych spravaŭ vyjšaŭ artykuł, pryśviečany pracy z błohierami. Dacent Akademii Dźmitryj Varapajeŭ praanalizavaŭ praktyku ŭ Rasii i Biełarusi, i pryjšoŭ da vysnovy, što błakiroŭka sajtaŭ i navat adklučeńnie interneta — usiaho tolki paŭmiera, jakuju karystalniki zmohuć vielmi chutka abyści. Aŭtar ličyć, što dziaržava pavinna pracavać z błohierami, jakija buduć trymacca pravilnaj linii, i za heta ŭznaharodžvać ich, to-bok stvaryć sietku «pravilnych» aŭtaraŭ.
Dźmitryj Varapajeŭ nazyvaje niaŭdałaj sprobu rasijskich uładaŭ na zakanadaŭčym uzroŭni kantralavać błohieraŭ. U 2014 hodzie ŭ Rasii pryniali zakon, pavodle jakoha stvaralniki sajtaŭ i błohaŭ z audytoryjaj bolš za try tysiačy ŭ sutki, pavinny byli zarehistravacca ŭ Raskamnahladzie, na resursy nakładvali peŭnyja abmiežavańni. Rasijskaje hramadstva niehatyŭna ŭspryniało i pryniaćcie zakona, i jaho realizacyju, tak što ŭžo ŭ 2017 hodzie ad hetaj praktyki adyšli.
Dacent Akademii milicyi źviartaje ŭvahu, što ŭ internecie nie tak-ta prosta realizavać funkcyju dziaržavy, jakaja tyčycca prymusu.
«Možna, naprykład, zabłakavać dostup da peŭnych internet-resursaŭ ci naohuł adklučyć dostup da interneta, — razvažaje aŭtar. — Možna navat stvaryć nacyjanalnuju sietku pieradačy danych, jakaja nie budzie mieć suviazi ź internetam i inšymi sietkami.
Ale siońnia vidavočna, što ŭ sučasnym vysokatechnałahičnym śviecie takija dziejańni ŭ lepšym vypadku źjaŭlajucca paŭmierami, jakija majuć tolki časovy, i, jak praviła, vielmi karotki efiekt. Adkazam na ich stanuć sučasnyja prajekty, takija jak Starlink2, ci inšyja techničnyja rašeńni».
Varapajeŭ ličyć, što z błohierami treba supracoŭničać i ŭzajemadziejničać, a nie kantralavać ich i padparadkoŭvać. Pry hetym supracoŭnik Akademii milicyi vieryć, što možna stvaryć «pravilnych» z punktu hledžańnia dziaržavy błohieraŭ:
«Błohier abaviazujecca prytrymlivacca peŭnaj linii pavodzinaŭ u miežach svaich kampietencyj, a dziaržava jaho padtrymlivaje. Taki varyjant supracoŭnictva vyhladaje najlepšym».
Dalej u časopisie Akademii milicyi adznačajecca, što treba «stvaryć sietku «pravilnych» błohieraŭ-iflujensieraŭ z samych roznych śfier, adnak nie fabryku trolaŭ».
Varta adznačyć, što ŭłady Biełarusi nie pieršy hod sprabujuć uziać pad kantrol błohieraŭ i lidaraŭ mierkavańniaŭ. Andrej Kabanaŭ, Ihar Łosik, Eduard Palčys, Volha Takarčuk, Uładzimir Niaronski, Mikoła Dziadok — heta niapoŭny śpis błohieraŭ, jakija ŭžo atrymali turemnyja terminy pa spravach, dzie fihuruje ich palityčnaja pazicyja. Błakiroŭka sajtaŭ i pryznańnie ich ekstremisckimi stała rucinaj dla biełaruskaj sistemy paśla vybaraŭ-2020.
Deputat Hienadź Davydźka zajaŭlaŭ, što dziejnaść błohieraŭ treba ŭziać pad kantrol: «Dziejnaść žurnalistaŭ rehulujecca pa zakonie i jany adkazvajuć za kožnaje słova, tym časam błohiery ŭ pahoni za łajkami i padpiskami nachabna chłusiać».
U Biełarusi isnuje puł praŭładnych ekśpiertaŭ, jakich zaprašajuć u efir dziaržaŭnych telekanałaŭ, na mierapryjemstvy z udziełam Łukašenki. Z rostam papularnaści Telehrama jany stvaryli tam svaje kanały, ale ŭ lik samych papularnych błohieraŭ u krainie tak i nie ŭvajšli.
Kiraŭnictva BRSM admaŭlała, što arhanizacyja źjaŭlajecca bazaj praŭładnych kamientataraŭ, adnak było nieadnarazova zaŭvažana, što materyjały pra dziejnaść sajuza źbirajuć anamalnuju kolkaść adnatypnych kamientaryjaŭ.
U Rasii praca ŭ hetym kirunku bolš naładžanaja. Aproč fabryki trolaŭ, isnuje puł praŭładnych błohieraŭ i zorak šou-biznesu, jakich aktyvujuć padčas važnych palityčnych kampanij, a taksama pryciahvajuć da ŭdziełu ŭ prapahandysckich šoŭ.
«Ja b byŭ dobrym ideołaham, ale niadoŭha». Ščyraja hutarka z błohieram Andrejem Pavukom
«Maru stać Kisialovym». Vialikaja hutarka z praŭładnym błohieram Holikavym, jaki krytykuje BRSM i zajaŭlaje, što razvodzicca z «žonkaj-bečebešnicaj»
Rasśledavańnie Navalnaha: Simańjan i jaje siamja zarabili na mutnych schiemach amal $10 miljonaŭ za try hady
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku21
Kamientary