Para ź Indyi zładzić viasielle ŭ Mietasuśviecie. Siarod haściej budzie i tata niaviesty, jaki pamior letaś
Indyjskaja para rychtujecca pravieści pieršaje ŭ krainie viasielle ŭ Mietasuśviecie. Udzieł u cyrymonii prymie niabožčyk — baćka niaviesty — dakładniej, jaho avatar. Pra niezvyčajnuju cyrymoniju piša Metro.
24-hadovy Dynieš Sivakumar Padmavaci i jaho niaviesta Džanahanandchini Ramasvami, jakoj 23 hady, źbirajucca pabracca šlubam 6 lutaha ŭ svajoj vioscy. Ale taksama jany praviaduć ličbavy pryjom u virtualnaj prastory, dzie da ich dałučacca siabry i siamja z usiaho śvietu, pakolki karanavirusnyja abmiežavańni nie dazvalajuć pravodzić šmatludnyja mierapryjemstvy ŭ ich štacie Tamiłnad.
«My pieršaja para ŭ krainie, jakaja paženicca ŭ Mietasuśviecie. Ja jakraz pracuju nad błokčejnam ciaham apošniaha hoda, tamu viedaju krychu bolš pra heta. Mietasuśviet — heta technałohija, jakaja pracuje mienavita na błokčejnie», — raskazaŭ žanich.
Paniaćcie Mietasuśvietu pieraklikajecca z paniaćciem virtualnaj realnaści (VR), ale heta nie adno i toje ž. Mietasuśviet — heta prastora virtualnaj realnaści, jakaja dziejničaje na pastajannaj asnovie, nikoli nie adklučajecca, vykarystoŭvaje šmat technałohij, jakija pahružajuć nas u ličbavy śviet. Padmavaci, supracoŭnik daśledčaha instytuta ŭ Madrasie, vieryć, što za hetaj technałohijaj vialikaja budučynia.
«Ciapier takija kampanii, jak Microsoft, Facebook i mnohija inšyja, inviestujuć u Mietasuśviet. Tamu ja padumaŭ, što, kali my zładzim tam viasielle, usie ŭ Indyi daviedajucca pra hetuju technałohiju. A my zmožam pracavać nad startapam i raźvivać jaho», — skazaŭ Padmavaci.
Admietnaściu cyrymonii stanie «prysutnaść» na joj baćki niaviesty, jaki pamior u krasaviku letaś. Padmavaci płanuje pakazać jaho ličbavy avatar na cyrymonii.
«Baćka majoj dziaŭčyny pamior letaś. Ja chaču zrabić joj siurpryz — zaprasić jaho virtualna i zrabić častkaj mierapryjemstva. Jon budzie tam u jakaści 3D-avatara. Heta padarunak, jaki ja mahu joj zrabić», — padzialiŭsia žanich svajoj idejaj.
Paviedamlajecca, što viasielle ŭ Mietasuśviecie budzie pryśviečanaje Hary Poteru i, pavodle papiarednich acenak, u im voźmuć udzieł ad 2000 da 5000 siabroŭ pary, členaŭ siamji, a taksama padpisčykaŭ u sacyjalnych sietkach.
I feel so proud and blessed that I have seen and taken advantage of many great opportunities in this world before millions of people have seen them, Beginning of something big! India's first #metaverse marriage in Polygon blockchain collaborated with TardiVerse Metaverse startup. pic.twitter.com/jTivLSwjV4
«Ja viedaju, što pary brali šlub praz Zoom, ale ja chacieŭ pajści dalej i być pieršym, chto zrobić heta ŭ Mietasuśviecie. Ja taksama chacieŭ paznajomić indyjcaŭ z hetaj technałohijaj», — raskazaŭ Padmavaci haziecie «Tajms».
Praviadzieńniem viasiella ŭ Mietasuśviecie budzie zajmacca startap Tardiverse. Zaprošanyja hości zmohuć uvajści ŭ sistemu i vybrać sabie admysłovy avatar. Avatary ŭžo raspracavanyja dla maładych, členaŭ ich siamji i siabroŭ.
Navina pra viasielle zacikaviła mnohija pary, i TardiVerse płanuje zładzić nastupnaje śviata na Dzień śviatoha Valancina.
Kamientary