Urad Iraka zajaviŭ, što amierykanskija vajskoŭcy całkam pakinuli krainu. Pa słovach pradstaŭnika irakskaha ŭrada, ź Iraka vyvieli ŭsie bajavyja padraździaleńni ZŠA, a taksama siły, jakija zajmalisia łahistyčnaj padtrymkaj. Adnak Złučanyja Štaty aficyjna hetuju infarmacyju jašče nie paćvierdzili, piša Deutsche Welle.
Pra vyvad amierykanskich vojskaŭ ZŠA i Irak damovilisia ŭ 2024 hodzie. U apošnija hady ŭ krainie znachodziłasia kala 2500 amierykanskich vajskoŭcaŭ. Apošnija amierykanskija padraździaleńni raźmiaščalisia ŭ Erbili ŭ kurdskim rehijonie, na vajskovaj bazie kala aeraporta Bahdada, a taksama ŭ tak zvanaj «zialonaj zonie» — uradavaj častcy irakskaj stalicy.
Z 2014 hoda ZŠA razam z sajuźnikami pravodzili ŭ Iraku i Siryi vajennuju apieracyju suprać terarystyčnaj arhanizacyi «Isłamskaja dziaržava». U 2017 hodzie było abvieščana pra vajenny razhrom ID u Iraku, a ŭ 2019‑m — u Siryi. Pry hetym asobnyja jačejki arhanizacyi zachavalisia i praciahvajuć ździajśniać napady, choć bolš nie kantralujuć značnych terytoryj u hetych krainach.
Situacyja ź biaśpiekaj u Iraku apošnim časam pahoršyłasia na fonie vajny ŭ Iranie. Padčas hetaha kanfliktu atakam padviarhalisia amierykanskija abjekty ŭ Iraku, a taksama pazicyi kurdskich sił.
Čakajecca, što vyvad amierykanskich vojskaŭ budzie adznačacca ŭ Iraku jak «Dzień niezaležnaści». 28 vieraśnia, kali zakančvajecca ŭstanoŭleny termin vyvadu, u krainie byli zapłanavanyja adrazu čatyry śviatočnyja mierapryjemstvy. Dziaržaŭnyja ŭstanovy ŭ hety dzień nie pracavali.
Pieršapačatkova mierkavałasia, što źviazanyja ź Iranam uzbrojenyja hrupoŭki ŭ Iraku pa miery vyvadu amierykanskich vojskaŭ razzbrojacca, a ich udzielniki paśla ŭvojduć u skład dziaržaŭnych siłavych struktur. Adnak premjer-ministr Iraka Ali az-Ziejdzi abviaściŭ, što hetuju mieru adkłali da červienia 2027 hoda.
Amierykanskija vojski ŭpieršyniu ŭvajšli ŭ Irak u 2003 hodzie razam z sajuźnikami. Metaj apieracyi było źviaržeńnie tahačasnaha kiraŭnika krainy Sadama Chusejna. U 2011 hodzie amierykanskija vajskoŭcy viarnulisia ŭ Irak užo pa prośbie ŭrada krainy dla ŭdziełu ŭ baraćbie suprać «Isłamskaj dziaržavy».
Z 2015 hoda ŭ mižnarodnaj apieracyi ŭdzielničaŭ i niamiecki Bundeśvier, asnoŭnaj zadačaj jakoha była padrychtoŭka irakskich vajskoŭcaŭ. Ciapierašni mandat praduhledžvaje mahčymaść znachodžańnia ŭ Iraku da 500 niamieckich vajskoŭcaŭ i dziejničaje da studzienia 2027 hoda. Ministr zamiežnych spraŭ Hiermanii Johan Vadeful raźličvaje, što niamieckija vajskoŭcy zmohuć zachavać prysutnaść u Erbili i paśla zaviaršeńnia mižnarodnaj apieracyi ŭ Iraku.
U Siryi vybuchnuli bujnyja pratesty paśla mocnaha padaražańnia paliva
Saudaŭskaja Aravija prypyniła pracu naftapravoda «Uschod — Zachad» paśla ataki dronaŭ z terytoryi Iraka. Pa im idzie 5% suśvietnaj nafty
ZŠA znoŭ udaryli pa Iranie. Tehieran atakavaŭ amierykanskija bazy ŭ Iraku i Iardanii
ZŠA i Saudaŭskaja Aravija nanieśli ŭdary pa abjektach u Iraku, źviazanych ź Iranam
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy4
Kamientary
• Poŭnaściu — aznačaje «da kanca, va ŭsim abjomie, biez astatku». Čaściej vykarystoŭvajecca, kali havorka idzie pra kolkaść, fizičny abjom, dziejańnie abo praces, jaki zavieršany na 100%.
• Prykłady: poŭnaściu vypłacić kredyt, poŭnaściu pračytać knihu, poŭnaściu zapoŭnić zału, poŭnaściu adnavić budynak.