Chrenin zapeŭniŭ ministra abarony Ukrainy, što Biełaruś nie budzie «inicyjataram napružanaści ŭ rehijonie»
Siońnia pa inicyjatyvie ŭkrainskaha boku adbyłasia telefonnaja razmova ministra abarony Biełarusi Viktara Chrenina ź ministram abarony Ukrainy Alaksiejem Reźnikavym. Baki abmierkavali pytańni supracoŭnictva ŭ vajennaj śfiery, «bolevyja kropki», a taksama kankretnyja kroki pa ŭmacavańni atmaśfiery davieru i biaśpieki ŭ rehijonie, paviedamlaje pres-słužba Minabarony.
Padčas razmovy Viktar Chrenin adznačyŭ, što narod Ukrainy byŭ i budzie dla Biełarusi brackim narodam. Biełaruś nie źjaŭlajecca inicyjataram napružanaści ŭ adnosinach Biełarusi i Ukrainy.
Alaksiej Reźnikaŭ vystupiŭ za adnaŭleńnie supracoŭnictva pamiž dźviuma krainami, a taksama aktyvizacyju supracoŭnictva pa pytańniach biaśpieki i ŭzajemnaha davieru.
U zaklučeńnie razmovy Viktar Chrenin taksama padkreśliŭ, što Alaksandr Łukašenka nieadnarazova zajaŭlaŭ: «Važnaja zadača — nie stracić bracki narod Ukrainy. Usio papraŭna — ekanomika, tavaraabarot, dypłamatyčnyja adnosiny. Duchoŭnaja suviaź našych narodaŭ nie pavinna dać raskolinu. I my nie možam dapuścić razryvu brackich suviaziaŭ pamiž narodami».
Ministry abmierkavali praviadzieńnie mierapryjemstvaŭ padrychtoŭki Uzbrojenych sił. I vykazali ŭpeŭnienaść, što mierapryjemstvy nie niasuć pahroz biaśpieki brackim krainam.
Kiraŭniki vajennych viedamstvaŭ paznačyli kankretnyja kroki pa mierapryjemstvach pavyšeńnia transparentnaści i ŭzajemnaha davieru.
Hutarka adbyłasia dla adnaŭleńnia atmaśfiery dyjałohu, źnižeńnia hradusa publičnych prajaŭ i zabieśpiačeńnia biaśpieki ŭ rehijonie, paviedamlaje pres-słužba Minabarony.
Čytajcie taksama:
Łukašenka pra vyvad rasijskich vojskaŭ paśla vučeńniaŭ: «Heta naša z Pucinym sprava»
Ciapier čytajuć
«Dzied budzie hladzieć asabista. Kali jamu spadabajecca…» Ziankovič raskazaŭ, jak ź im zapisvali pieršaje intervju ŭ SIZA KDB4
Kamientary