Biełarusam, jakija siadziać na chatniaj chimii za palityku, prapanujuć palohku — pierajści na papraŭčyja raboty
Abmiežavańni na pierasoŭvańnie tady zdymajucca, pravierki spyniajucca, ale treba addavać dziaržavie 25% zarobku.
Biełarusam, asudžanym pavodle palityčnych artykułaŭ da chatniaj chimii, u milicyi prapanujuć źmianić pakarańnie na bolš miakkaje. «Našaj Nivie» viadoma pra piać padobnych vypadkaŭ, ale vyhladaje, što źjava šyrejšaja.
Zrazumieć sistemu, jakim katehoryjam asudžanych inśpiektary zrabili takuju prapanovu, a kamu — nie (ci jašče nie), pakul nie ŭdałosia. Usie hetyja piać čałaviek dastatkova daŭno znachodziacca na chatniaj chimii, niekatorym zastałosia kala hoda terminu, niekatorym — niekalki miesiacaŭ. Siarod piaci ŭkazanych vypadkaŭ jość jak Minsk, tak i drobnyja rajcentry.
Va ŭsich hetych historyjach havorka pra pierachod z chatniaj chimii (jurydyčnaj movaj — «abmiežavańnie svabody biez nakiravańnia ŭ papraŭčuju ŭstanovu adkrytaha typu») na papraŭčyja raboty.
Nasupierak stereatypnamu ŭsprymańniu, papraŭčyja raboty — heta nie adpracoŭka niejkich dadatkovych hadzin dvornikam ci na sarciroŭcy śmiećcia. Sistema pracuje inačaj. Čałaviek na papraŭčych rabotach pracuje tam, dzie i pracuje, ale dziaržava zabiraje ŭ jaho ad 10% da 25% zarobku.
Va ŭsich vypadkach, pra jakich viadoma «Našaj Nivie», chatnich chimikaŭ papiaredžvali, što ŭ ich buduć zabirać maksimalna mahčymyja 25% zarobku.
Adnak pry hetym admianiajucca inšyja abmiežavańni — nie budzie strohaha hrafiku, kali treba znachodzicca doma, nie pavinna być i milicejskich pravierak u luby čas. Častkova zdymajucca abmiežavańni na spažyvańnie ałkaholu. Na pracy, naturalna, treba być ćviarozym, ale absalutnaj zabarony na rassłableńnie doma niama.
Rašeńnie ab pieravodzie na papraŭčyja raboty prymaje sud. Kali adpaviednaje chadajnictva składaje milicyja, to prablem z pryniaćciem rašeńnia niama, jano padpisvajecca amal aŭtamatyčna.
Dla ludziej, asudžanych pa niepalityčnych artykułach, — za alimienty ci kradziež, heta zvykłaja praktyka. Ale dla «palitykaŭ» hety miechanizm raniej nie prymianiaŭsia.
Kolki čałaviek znachodzicca na chatniaj chimii za palityku, dakładna nieviadoma. Heta jak minimum sotni čałaviek, ale, mahčyma, što lik pieravaliŭ i za 1000. Na chatniuju chimiju adpraŭlajuć absalutnuju bolšaść asudžanych pa spravie Hajuna, a taksama tych, kaho paśpieli pryciahnuć za ŭdzieł u pratestach, pakul nie skončylisia terminy daŭniny.
«Naša Niva» — bastyjon biełaruščyny
PADTRYMAĆ-
U RCAP u Ratamcy rastłumačyli, čamu ŭładalnikam koniej nie praciahnuli damovy
-
«Maja pazicyja adnosna siłavikoŭ paśla pieramohi prostaja». Eks-palitviazień pra škłoŭskuju kałoniju, padpolle i «karelickuju spravu»
-
U 2021 hodzie vypusknica admoviłasia pacisnuć ruku Hihinu na ŭručeńni dypłoma. Ciapier BDU nie choča jaho paćviardžać
Ciapier čytajuć
U 2021 hodzie vypusknica admoviłasia pacisnuć ruku Hihinu na ŭručeńni dypłoma. Ciapier BDU nie choča jaho paćviardžać10
Kamientary
Sotni čałaviek tam naźbirajucca i z adnaho staličnaha rajona. Adpaviedna, tolki pa stalicy budzie značna bolš za tysiaču. Bo pa artykule 341 zvyčajna ž vypisvali chimiju, a tam tysiačy represavanych. A kolki ž jašče inšych składaŭ "złačynstva" u łukavych!
Nie dziva, što ŭžo nie ŭsiudy paśpiavajuć navat raz na tydzień praviarać hetych ekstremistaŭ, jak raniej namahalisia
Uvohule navina navat dobraja, možna pryjechać, zrabić pašpart, a kali daduć raboty, to źjechać.