Bujnoha pieravozčyka taksi na paŭhoda vyklučajuć z Rejestra. Zabłakavanyja dla pracy ŭłasnyja mašyny 800 kiroŭcaŭ

Pieravozčyk paćvierdziŭ hetuju infarmacyju ŭ svaim telehram-čacie i patłumačyŭ pryčynu: u 2025 hodzie było vyjaŭlena dva i bolš parušeńni paradku pryjomu płaciažoŭ i/abo vykarystańnia kasavaha abstalavańnia i płaciežnych terminałaŭ padčas pieravozak. Faktyčna heta tyčyłasia pryjomu hrošaj kiroŭcami biez taksomietraŭ z SKPO — śpiecyjalnaj pryładaj kantrolu padatkovych orhanaŭ, jakaja ŭstaloŭvajecca na kasavy aparat.

Najbolš niepryjemnaja situacyja dla kiroŭcaŭ u tym, što aŭtamabili, uniesienyja ŭ rejestr hetaha pieravozčyka, na praciahu hetych šaści miesiacaŭ nie zmohuć vykarystoŭvacca dla pracy ŭ taksi.

Pieravozčyk adznačyŭ, što nie mieŭ mahčymaści zahadzia papiaredzić kiroŭcaŭ i vyklučyć ich aŭtamabili z rejestra, kab paźbiehnuć błakavańnia, chacia dla hetaha prykładalisia maksimalnyja namahańni.

Parušeńnie tłumačycca tym, što kiroŭcy biez taksomietraŭ z SKPO adklučali ŭ dadatku zakazy z apłataj hatoŭkaj. Adnak «Jandeks.Taksi» aŭtamatyčna pieraklučaje sposab apłaty ź bieznajaŭnaha na najaŭny padčas pajezdki, kali nie atrymlivajecca śpisać hrošy z kartki pasažyra.

«TADZIE plus» pracavała ŭ Homieli, a taksama ŭ Mazyry, Rečycy i inšych rehijanalnych haradach.

Dyrektar taksaparka kampanii Dzianis Buturlin paźniej daŭ razhornutaje tłumačeńnie situacyi, adznačyŭšy, što kiraŭnictva ŭžo padaje ŭ sud zajavu ab abskardžańni rašeńnia Transpartnaj inśpiekcyi i budzie prasić časova prypynić dziejańnie pastanovy ab vyklučeńni z Rejestra na pieryjad razhladu spravy. Kali heta nie atrymajecca, viarnucca ŭ Rejestr kampanija zmoža tolki 3 vieraśnia 2026 hoda.

Pavodle słoŭ dyrektara, parušeńni byli nienaŭmysnymi i źviazanyja z techničnymi asablivaściami elektronnaj sistemy dyśpietčarskaj słužby «Jandeks Go» (TAA «BiełHoKorp»). Aŭtamabilam biez taksomietraŭ u asabistym kabiniecie pieravozčyka adklučali mahčymaść pryjomu zakazaŭ z apłataj najaŭnymi, što dazvolena Praviłami aŭtamabilnych pieravozak pasažyraŭ.

Z sakavika 2023 hoda kampanija pastupova zabiaśpiečvała aŭtamabili kasavym abstalavańniem, terminałami i ekvajrynham. Adnak uźnikali składanaści. U pieršaj pałovie minułaha hoda praces uskładniła madernizacyja kasavaha abstalavańnia ŭ krainie, što pierahruziła servisnyja centry i pavialičyła terminy ŭstanoŭki.

Taksama ŭstalavańnie błokaŭ SKPO mahło zajmać da dvuch miesiacaŭ. U pieršym kvartale 2025 hoda byŭ deficyt taksomietraŭ, i ich davodziłasia čakać ad adnaho da paŭtara miesiaca. Košt ustalavańnia adnaho taksomietra składaje ad 1150 rubloŭ, a mantaž technična składany i patrabuje ŭmiašańnia ŭ tarmaznuju sistemu aŭtamabila.

Dadatkovaja prablema — płaciežny terminał. U kampanii vykarystoŭvajuć mabilny dadatak AlfaSoftPOS, jaki nie padtrymlivajecca na ŭsich madelach telefonaŭ i patrabuje najaŭnaści NFC. Stacyjanarny terminał u taksi ŭstalavać niemahčyma.

Na śniežań 2025 hoda 99% aŭtamabilaŭ kampanii ŭžo byli abstalavanyja taksomietrami z SKPO.

Kiraŭnik adznačaje, što kala 800 kiroŭcaŭ časova straciać mahčymaść pracavać na svaich aŭtamabilach u taksi. Jon zaklikaje da bolš dyfierencyjavanaha padychodu da kantrolu ŭ zaležnaści ad pamieru kampanii, bo dla bujnoj arhanizacyi dapuścić parušeńni praściej, čym dla nievialikaj.

Ciapier kampanija prypyniła najom novych kiroŭcaŭ i afarmleńnie aŭtamabilaŭ. 

Situacyju taksama prakamientavaŭ namieśnik načalnika filijała Transpartnaj inśpiekcyi pa Minsku i Minskaj vobłaści Alaksandr Kavalenka. Jon paviedamiŭ, što ŭ filijał pačało źviartacca šmat kiroŭcaŭ, adnak pa pytańniach znachodžańnia ŭ Rejestry inśpiekcyja supracoŭničaje tolki z zacikaŭlenymi bakami — pieravozčykam i dyśpietčaram. Inśpiekcyja nie prymaje rašeńniaŭ ab vyklučeńni kankretnych aŭtamabilaŭ z rejestra. Pa ŭsich pytańniach kiroŭcam rekamiendavana źviartacca da svajho najmalnika — TAA «TADZIE plus» — i zahadzia vyvučać zakanadaŭstva pierad pieradačaj aŭtamabila jurydyčnym asobam abo IP.

• 0
• 0
• 1
• 2
• 1
• 0
• 0
• 0