U Minsku zapuścili servis z ucenienaj ježaj z kafe. Jakija tam źnižki?

Jak heta pracuje, što pradajuć i ci jość realnyja źnižki, raźbiraŭsia Onliner.by.

Pra što ŭvohule idzie havorka?

Loveresta — heta małady dadatak i sajt, prajekt zapuściŭsia paru tydniaŭ tamu. Prajekt zadumany jak markietplejs ježy, jakuju ŭstanovy pradajuć sa źnižkaj, kab nie pryjšłosia jaje śpisvać.

Jak hetym karystacca: zajści na sajt abo ŭ dadatak, vybrać pazicyi, jakija spadabalisia, i zabrać ich va ŭstanovie (dziejničaje tolki samavyvaz, dastaŭki niama). Zakazy možna rabić tolki dzień u dzień: adras i čas, da jakoha treba zabrać zakaz, prapisvaje sama ŭstanova.

Pavialičyć

Da servisu padklučylisia bolš za 20 ustanoŭ, siarod jakich Marks, Paragraph, Varka, Salateira, Let it be i inšyja. Kafe vykładvajuć stravy tolki tady, kali ŭ ich jość liški, tamu asartymient mianiajecca na praciahu dnia.

Ustanovy prapanujuć kupić kankretnyja pazicyi — naprykład, vypiečku, abo desierty, abo sakretny boks, pra źmieściva jakoha zahadzia možna budzie tolki zdahadvacca.

U čym sens dla ŭstanoŭ?

Andrej Babakajeŭ, zasnavalnik servisu Loveresta, tłumačyć ideju tak: u jaho była kaviarnia, i nie zaŭsiody atrymlivałasia pradavać usiu pradukcyju ŭ termin. Siabry padkazali, što za miažoj papularny dadatak pa vyratavańni ježy. Tak źjaviŭsia biełaruski anałah Too Good To Go.

Pavodle jaho słoŭ, u prajekt układziena prykładna 100 tysiač dalaraŭ. Asnoŭnyja vydatki — raspracoŭka servisu i rašeńniaŭ dla pracy biznesu ŭ im.

— U čym cikavaść ustanoŭ, kali jany mohuć prosta rabić źnižku biez pasiarednika?

— Dla ŭstanoŭ heta biaspłatny markietynh, my biarem usio na siabie. Plus da ich pryjduć novyja pakupniki — akramia tych, chto i tak byŭ ich klijentam. My zrabili kamisiju servisu 15%, kab dla kafe ŭdzieł u prajekcie byŭ nie balučym. Naprykład, z zakazu ŭ 7 rubloŭ atrymlivajecca ŭsiaho tolki 1 rubiel kamisii.

U budučyni servis chacieŭ by pracavać z handlovymi sietkami — u mnohich ciapier vialikaja ŭłasnaja vytvorčaść i napeŭna raspradajecca nie ŭsia pradukcyja.

— Mnie zdajecca, sietkam było b cikava, ale my dla ich jašče nievialiki prajekt. Kali my budziem viadomyja i padklučycca bolš karystalnikaŭ, upeŭnieny, što jany prajaviać cikavaść.

Ciapier u servisie zarehistravana kala tysiačy pakupnikoŭ, užo jość paŭtornyja zakazy, kaža Andrej. Asnoŭnaja aŭdytoryja — studenty, zakazy iduć dziakujučy sarafannamu radyjo.

— Padklučajucca šmat kitajskich studentaŭ, što było dla nas dziŭna. Jany sami na nas vyjšli i rehistrujucca masava. U ich jość niejki anałah Instagram, adzin sa studentaŭ raskazaŭ, što daviedaŭsia pra nas adtul.

Što pa źnižkach?

Na momant padrychtoŭki materyjału čaściej za ŭsio ŭstanovy prapanoŭvali źnižki ad 32% da 47% u zaležnaści ad pazicyi.

Naprykład, tort «Miadovik» patańnieŭ z 13 da 7 rubloŭ — źnižka skłała 46%. Boks z desiertami kaštavaŭ 18 zamiest 30 rubloŭ (źnižka 40%.) «Rymskaja pica» patańnieła na 32%, z 31 da 21 rubla.

Kali havorka pra sakretny boks, to zahadzia daviedacca jaho źmieściva niemahčyma, heta varta mieć na ŭvazie ludziam z alerhijaj ci niepieranosnaściu peŭnych praduktaŭ.

Pavialičyć

— Servis abiacaje źnižki da 70%, a ci hatovy ŭstanovy rabić takuju istotnuju ŭcenku?

— My nie dyktujem umovy, rašeńnie ab pamiery źnižki prymaje ŭstanova. Ale łahična, što heta ŭpłyvaje na pavodziny pakupnikoŭ, kali jany bačać dosyć pryvabnuju źnižku, jany kupiać chutčej. Dla ŭstanoŭ sens u tym, što jany mohuć vyručyć choć štości, a nie prosta śpisać stravy.

Łahičnaje pytańnie — a što z terminami prydatnaści ŭ takim vypadku?

Servis zapeŭnivaje, što praterminavanuju pradukcyju dakładna nie prapanujuć, heta zabaroniena zakonam, tamu ŭstanovy prapanujuć tolki pradukcyju ŭ miežach terminu prydatnaści, jakuju jany nie paśpiavajuć pradać.

— U Biełarusi ŭžo sprabavali zapuścić padobnyja prajekty, ale jany nie vystralili. Jak dumajecie, čamu ciapier pavinna atrymacca?

— Ja nie sustrakaŭ padobny servis u nas, choć u Jeŭropie ŭžo daŭno pracuje (Too Good To Go). Jość servisy pa dastaŭcy, ale ŭ ich inšaja kamisija.

— Kolki času treba, kab vyjści na samaakupnaść?

— Dumaju, bolš za hod heta zojmie, jak minimum, kab choć by pakryvać vydatki, ab prybytkovaści pakul rana ŭvohule kazać. Patencyjał rynku jość, ale patrebny čas. My razmaŭlali z roznymi ŭstanovami — niekatoryja pa staryncy pryvykli rabić źnižku ŭ viačernija hadziny, jość niejki strach sprabavać novy farmat, tamu što my nieviadomyja na rynku.

• 0
• 0
• 0
• 1
• 0
• 0
• 0
• 0