Rada Jeŭrapiejskaha Sajuza 26 lutaha padoŭžyła sankcyi suprać Biełarusi jašče na adzin hod. Pra heta paviedamiła Ministerstva zamiežnych spraŭ Litvy.
Adznačajecca, što abmiežavalnyja miery suprać Biełarusi zastajucca ŭ tym ža abjomie i bieź źmien. Pavodle litoŭskaha boku, sankcyi źviazanyja z unutranymi represijami ŭ Biełarusi, padtrymkaj Rasii ŭ vajnie suprać Ukrainy, a taksama z hibrydnymi dziejańniami suprać krain Jeŭrasajuza.
Ministr zamiežnych spraŭ Litvy Kiastucis Budrys zajaviŭ, što ŭ Biełarusi praciahvajecca pieraśled hramadzianskaj supolnaści, utrymańnie ludziej u źniavoleńni pa palityčnych matyvach, a taksama fiksujucca novyja hibrydnyja ataki. Jon taksama adznačyŭ vykarystańnie biełaruskaj terytoryi ŭ vajskovych metach. Pavodle jaho słoŭ, krainy ES zachoŭvajuć adzinuju pazicyju adnosna nieabchodnaści praciahvać cisk.
Zhodna ź infarmacyjaj MZS Litvy, pad sankcyjami ES ciapier znachodziacca 312 hramadzian Biełarusi i 57 jurydyčnych asob. Ich aktyvy ŭ Jeŭrasajuzie zamarožanyja, hramadzianam i kampanijam ES zabaroniena pravodzić ź imi finansavyja apieracyi, a fizičnym asobam z sankcyjnaha śpisu — ujezd na terytoryju ES. Ekanamičnyja abmiežavańni zakranajuć finansavy, handlovy, enierhietyčny, transpartny i inšyja siektary.
Pastanova budzie dziejničać da 28 lutaha 2027 hoda z mahčymaściu nastupnaha padaŭžeńnia.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran
Kamientary