Staršynia AHP Mikałaj Kazłoŭ paśla vychadu na volu: Źjazdžać ź Biełarusi nie źbirajusia
Mikałaja Kazłova asudzili na try miesiacy aryštu za razhałošvańnie danych pa kryminalnaj spravie suprać Kaardynacyjnaj rady. 26 sakavika palityk vyjšaŭ na volu. Lidar AHP raspavioŭ «Našaj Nivie», jak daviedaŭsia pra vajnu va Ukrainie, a taksama pra staŭleńnie da jaho z boku administracyi i płanach na budučyniu. Uvieś termin jon pravioŭ u adzinočnaj kamiery.
Znachodziŭsia ŭ poŭnaj izalacyi
Pakarańnie Kazłoŭ adbyvaŭ u SIZA-6 u Baranavičach.
Mikałaj adznačaje, što na praciahu troch miesiacaŭ byŭ praktyčna ŭ poŭnaj izalacyi. Jak były supracoŭnik milicyi, uvieś termin jon pravioŭ u adzinočnaj kamiery.
«Adnosiny z supracoŭnikami ŭstanovy byli stroha pa statucie, za dzień jany abmiažoŭvalisia prykładna piatnaccaciu słovami. Možna skazać, što znachodziŭsia ŭ poŭnaj izalacyi. Utrymańnie ŭ adzinočnaj kamiery samo pa sabie davoli pakutlivaje.
A jašče ŭ dadatak kryŭdna, kali razumieješ, što siadziš nie za złačynstva, a za pierakanańni».
Kab nie stracić praktyku vusnych znosin, Mikałaj čytaŭ knihi ŭsłych.
Na druhi dzień jaho pastavili na prafiłaktyčny ŭlik jak schilnaha da ekstremizmu i inšaj destruktyŭnaj dziejnaści.
«Paśla hetaha pry kožnaj praviercy mnie treba było nazyvać nie tolki svaje danyja i artykuł, ale i dadavać infarmacyju ab maich «schilnaściach». Tablička z adpaviednaj infarmacyjaj taksama źjaviłasia na maim łožku.
Jany pastavili mianie na prafiłaktyčny ŭlik nibyta z-za maich papiarednich administracyjnych parušeńniaŭ. Ja z takim rašeńniem nie zhodny. Tym bolš, što jany nie mieli nijakaha dačynieńnia da ekstremisckaj dziejnaści. Ja liču, što tym samym byli istotna parušanyja maje pravy. Ciapier budu raicca z advakatam, što rabić, jość namier abskardzić hetaje rašeńnie. Jany vielmi volna abychodziacca z hetymi pastanoŭkami i prafiłaktyčnymi ŭlikami».
Palityk pryznajecca, što pisaŭ skarhi, z patrabavańniem, kab jamu vydali dakumienty, na padstavie jakich jon u nastupnym zmoža źviarnucca ŭ sud, kab asprečyć takoje rašeńnie.
U cełym, pa słovach Mikałaja Kazłova, staŭleńnie da jaho z boku administracyi było vietlivaje, a ŭ niekatorych vypadkach navat pavažlivaje.
«Zbolšaha prytrymlivalisia zakona. Pieradaču atrymaŭ. Listy ad svajakoŭ prychodzili biez prablem. U toj čas jak ad inšych ludziej mnohija listy i telehramy nie zaŭsiody dachodzili da adrasata. Pa maich padlikach, «zhubiłasia» nie mienš za 20-30 listoŭ.
Tolki praz tydzień daviedaŭsia pra vajnu
«Niahledziačy na toje, što z 6 ranicy i da 10 viečara ŭ nas tam hučna hrała radyjo, pra vajnu Rasii suprać Ukrainy ja daviedaŭsia ad svajho advakata, było heta niedzie praz tydzień paśla jaje pačatku. Z taho, što čuŭ pa radyjo, razumieŭ, što tam adbyvajecca niejki kanflikt, adnak było niezrazumieła, što tam na samoj spravie i ŭ jakich maštabach», — zhadvaje palityk.
Mikałaj Kazłoŭ miarkuje, što supracoŭnikam ustanovy navat u asabistych razmovach zabaroniena abmiarkoŭvać temu vajny.
«Ja nikoli nie čuŭ, razmovy pra heta. Mahčyma, hetaja tema pad zabaronaj. Ja prosta nie razumieju, jak žyvy čałaviek moža nie abmiarkoŭvać rečy takoha maštabu», — razvažaje palityk.
Havoračy ab płanach na budučyniu, Mikałaj Kazłoŭ kaža, što źjazdžać ź Biełarusi nie źbirajecca.
«Budu zastavacca na radzimie, sychodzić z palityki taksama nie źbirajusia, budu rabić toje, što i rabiŭ raniej».
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia4
Kamientary