Praz dva hady pandemii KNDR paviedamiła ab «pieršych vypadkach» karanavirusa. U krainie ŭviedzieny łakdaŭn
Ułady KNDR paviedamili ab pieršych u krainie vypadkach zaražeńnia karanavirusam, paviedamlaje paŭdniovakarejskaje ahienctva Yonhap sa spasyłkaj na paŭnočnakarejskija ŚMI.
Vypadki zaražeńnia «amikronam» nibyta byli vyjaŭlenyja ŭ Pchieńjanie — analizy ŭ žycharoŭ ź simptomami Covid-19 byli ŭziatyja 8 traŭnia.
Paśla hetaha va ŭsioj krainie byŭ uviedzieny režym «maksimalnaj nadzvyčajnaj situacyi» i abjaŭleny łakdaŭn. Kolki mienavita ludziej zaraziłasia, nie paviedamlajecca.
Lidar KNDR Kim Čen Yn zahadaŭ padnačalenym spynić raspaŭsiudžvańnie virusa i paabiacaŭ, što kraina pieraadoleje kryzis, jaki, pavodle jaho słoŭ, uźnik niečakana.
«My pieraadolejem kryzis, jaki raptam uźnik, i abaviazkova pieramožam», — skazaŭ jon na śpiecyjalna sklikanym u čaćvier pasiadžeńni palitbiuro centralnaha kamiteta Pracoŭnaj partyi KNDR.
Ułady KNDR raniej śćviardžali, što ŭ krainie za čas pandemii nie było zarehistravana nivodnaha vypadku zaražeńnia karanavirusam.
Ekpierty vykazvali sumnievy ŭ tym, što KNDR udałosia nie dapuścić zavozu karanavirusa ŭ krainu.
U Jeŭropie ž u hety čas admianiajuć abaviazkovaje našeńnie masak navat u samalotach i aeraportach.
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak28
Kamientary