«Serca schapiła raptoŭna». Pamior baćka Alaksandra Tarajkoŭskaha
Stała viadoma, što pajšoŭ z žyćcia baćka Alaksandra Tarajkoŭskaha Valeryj. Heta zdaryłasia jašče 26 maja, pachavali mužčynu 28-ha, ale siamja nie afišavała hety fakt.
Valeryju ŭ biahučym hodzie pavinna było spoŭnicca 60 hadoŭ.
«Usio zdaryłasia niečakana, u jaho nie nazirałasia prablem sa zdaroŭjem, ni na što nie skardziŭsia, a tut voś serca schapiła raptoŭna. I ŭ toj momant jon byŭ adzin. Čamu tak? My dumajem, paŭpłyvali pieražyvańni za Sašu», — prakamientavali «Našaj Nivie» svajaki.
Valeryja pachavali pobač z synam na Zachodnich mohiłkach u Minsku.
Alaksandr Tarajkoŭski — pieršaja achviara ź liku pratestoŭcaŭ. Jon zahinuŭ u noč z 10 na 11 žniŭnia 2020 hoda kala stancyi mietro «Puškinskaja».
MUS u tuju noč apublikavała aficyjnuju zajavu: «Padčas masavych biesparadkaŭ u Minsku na vuł. Prytyckaha, natoŭp budavaŭ barykady dla błakavańnia ruchu. U chodzie supraćstajańnia sa śpiecnazam, jaki prybyŭ dla debłakavańnia płoščy, adzin z pratestoŭcaŭ sprabavaŭ kinuć nieŭstanoŭlenuju vybuchovuju pryładu ŭ bok pravaachoŭnikaŭ. Jana vybuchnuła ŭ ruce, mužčyna atrymaŭ traŭmy, niesumiaščalnyja z žyćciom».
Adnak paźniej źjaviłasia niekalki videazapisaŭ, na jakich bačna, jak Alaksandr z pustymi rukami idzie ŭ bok siłavikoŭ. Jon ničoha nie kidaje, u jaho rukach ničoha nie vybuchaje — u Tarajkoŭskaha ź blizkaj adlehłaści stralaje adzin ź siłavikoŭ. Paśla strełu akryvaŭleny mužčyna padaje.
Nijakaj kryminalnaj spravy pa fakcie zabojstva zaviedziena nie było — u hetym siamji admovili. Jak i ŭ tym, kab aznajomicca z materyjałami praviedzienaj pravierki.
Kamientary