Źviazany sa śpiecsłužbami i Ruskaj pravasłaŭnaj carkvoj miljarder Kanstancin Małafiejeŭ prapanavaŭ Pucinu stać impierataram. Aŭdytoryja sustreła prapanovu avacyjami.
U Maskvie na Krasnaj płoščy adbyłasia prezientacyja knihi rasijskaha biznesmiena Kanstancina Małafiejeva «Impierija. Obraz buduŝieho».
Padčas prezientacyi ŭ Małafiejeva spytali: «Vy ŭ svajoj knizie pišacie ab tym, što Rasija zaŭsiody była manarchičnaj krainaj. I pravić pavinien manarch. Jak vy ličycie, chto pavinien stać manarcham u siońniašniaj Rasii — Vialiki Kniaź [naščadak dynastyi Ramanavych] abo naš prezident?»
Kanstancin Małafiejeŭ adkazaŭ biez ekivokaŭ:
«Ja, biezumoŭna, liču, što samym hodnym pretendentam na toje, kab być impierataram sučasnaj Rasii, źjaŭlajecca Uładzimir Uładzimiravič Pucin», — sardečna adkazaŭ Małafiejeŭ.
Publika sustreła adkaz avacyjami.
Raniej Małafiejeŭ kazaŭ, što pačatkam apieracyi suprać Ukrainy 24 lutaha Uładzimir Pucin pakazaŭ, što Rasija znoŭ vybrała šlach impieryi, što viadzie jaje ŭ «śvietłuju budučyniu».
Małafiejeŭ — miljarder, jakoha časam nazyvajuć «pravasłaŭnym aliharcham».
Jahonamu biznesu spryjajuć rasijskija dziaržaŭnyja struktury i śpiecsłužby. U to ža čas praź jaho struktury finansujucca rasijskija čarnasociency, a taksama ŭltrapravyja palityki Jeŭropy. U 2014—2015-m praz Małafiejeva finansavalisia rasijskija siły ŭ Danbasie. Ën taksama ŭłaśnik internet-sajt i jutub-kanała «Carhrad».
Za niekalki tydniaŭ da rasijska-ŭkrainskaj vajny 2022 hoda Małafiejeŭ śćviardžaŭ, što Ukraina nie pratrymajecca i 48 hadzin:
— Adkrytaje vajennaje supraćstajańnie pamiž Rasijaj i Ukrainaj nie moža nasić charaktar vajny abo, va ŭsiakim vypadku, zaciažnoha kanfliktu, tamu što roźnica vajennych patencyjałaŭ nastolki vialikaja, što heta moža być tolki apieracyja pa prymusie da miru, jak u Hruzii. Jana budzie doŭžycca maksimum 48 hadzin, i my nie možam kazać pra niejkija franty, — śćviardžaŭ jon.
Taksama Małafiejeŭ kaža, što Rasija pavinna «viarnuć sabie» Polšču i Finlandyju.
«A my ich nie adpuskali. Voś u suviazi z hetym u nas uźnikaje šmat cikavych kalizij u našaj mižnarodnaj palitycy, jakija było b cikava ŭ budučyni razhledzieć detalova», — kazaŭ jon za niekalki tydniaŭ da vajny.
Čytajcie taksama:
Rasija źjaŭlajecca klučavym fundataram ultrapravych u Jeŭropie. Havorka pra sotni miljonaŭ dalaraŭ
Ciapier čytajuć
Na vučeńniach «Zachad» adpracoŭvajuć napad na Polšču i Litvu pad vyhladam abarony Kalininhrada19
Kamientary