Čechija nie budzie vydavać vizy biełarusam minimum da kanca 2023 hoda

Nieŭzabavie paśla napadu Rasii na Ukrainu ŭrad Čechii vyrašyŭ spynić vydaču viz hramadzianam Rasii, a potym i Biełarusi, za vyklučeńniem vypadkaŭ humanitarnaha charaktaru. Pradstaŭlenaja pastanova ŭrada ŭvodzić u dziejańnie normy, što znachodziacca ŭ papraŭcy da zakona «Lex Ukraina», jakuju Pałata deputataŭ pryniała ŭ kancy maja.

Zajavy na atrymańnie vidu na žycharstva ŭ Čechii, jakija padajucca ŭ dypłamatyčnyja pradstaŭnictvy hramadzianami Biełarusi ci Rasii, pavodle zakanadaŭstva, nie buduć razhladacca.

«Hety krok zaklikany abaranić zamiežnapalityčnyja intaresy Čechii ŭ suviazi z uzbrojenym kanfliktam va Ukrainie, jaki byŭ vyklikany ŭvarvańniem Rasijskaj Fiederacyi i jaki padtrymlivaje Respublika Biełaruś», — havorycca ŭ paviedamleńni. Meta pastanovy — cisk na Rasiju i Biełaruś, kab jany spynili ahresiju, a taksama ŭzmacnieńnie biaśpieki Češskaj Respubliki.

Adnak hetaja miera nie nakiravanaja suprać tych, u kaho ŭžo jość vid na žycharstva, tamu hramadzianie Biełarusi i Rasii mohuć praciahvać źviartacca pa praciah vidu na žycharstva. «Ich mahčymyja zajavy ab praciahnieńni vidu na žycharstva buduć padlahać standartnamu režymu razhladu, praduhledžanamu Zakonam ab pražyvańni inšaziemcaŭ u Češskaj Respublicy», — dadali ŭ ministerstvie.

Akramia taho, hetaje pałažeńnie nie raspaŭsiudžvajecca na zajaŭki na karotkaterminovyja vizy, kali zajaŭnik źjaŭlajecca členam siamji hramadzianina Čechii abo hramadzianina ES, jakoha jon/iana supravadžaje abo da jakoha nakiroŭvajecca.

Heta taksama nie tyčycca zajavaŭ na atrymańnie vizy, dazvołu na doŭhaterminovaje ci pastajannaje pražyvańnie, kali znachodžańnie zajaŭnika adpaviadaje intaresam Češskaj Respubliki, i hety intares byŭ paćvierdžany ministram zamiežnych spraŭ.

Akramia taho, pałažeńnie nie tyčycca zajaŭ na atrymańnie doŭhaterminovaha vidu na žycharstva, kali zajaŭnik źjaŭlajecca členam siamji inšaziemca ź vidam na žycharstva ŭ Češskaj Respublicy, a taksama chadajnictvaŭ ab pastajannym vidzie na žycharstva dla dziaciej inšaziemcaŭ, jakija pražyvajuć u Češskaj Respublicy, kali pryčynaj padačy zajavy źjaŭlajecca ich sumiesnaje pražyvańnie.

Na siońnia, pavodle infarmacyi Ministerstva statystyki ČR, u Čechii lehalna pražyvaje 8 tysiač hramadzian Biełarusi.

Śviatłana Cichanoŭskaja padčas vizitu ŭ Prahu na pačatku maja sustrakałasia z češskimi ministrami i inšymi aficyjnymi asobami z metaj źmiakčyć pałažeńni zakona, jakija tyčacca hramadzian Biełarusi. Adnak nie ŭsie abiacańni češskich palitykaŭ byli vykananyja.

— My praciahvajem vystupać suprać tatalnaj vizavaj zabarony. Ale lubyja pieramovy — heta praces… Ale ž ja prašu zaŭsiody pamiatać, što vizavyja pytańni — heta častka vialikaj prablemy, jakuju ŭžo niemahčyma vyrašyć kropkavymi dziejańniami. My sutyknulisia z dvuma dyktatarami, jakija razburajuć žyćcio ludziej va ŭsim rehijonie, i ŭpłyŭ hetaha razbureńnia ŭžo bačny pa ŭsioj Jeŭropie, — skazała Śviatłana Cichanoŭskaja ŭ intervju «Svabodzie».

Biełarusam taksama pierastali vydavać vizy ŭ Daniju, Estoniju, Šviecyju i Finlandyju.

Tym časam pasolstva Słavakii ŭ Minsku 18 maja adnaviła vydaču biełarusam turystyčnych šenhienskich viz typu S. Infarmacyja pra heta źjaviłasia na sajcie pradstaŭnictva.

• 4
• 0
• 0
• 6
• 0
• 6
• 5
• 0