Piensijaniery, aktyvisty, šmatdzietnyja baćki: chto trapiŭ u śpis z 250 pamiłavanych palitviaźniaŭ

Pamiłavanaja 51 žančyna

U śpisie pamiłavanych — 51 žančyna i 199 mužčyn. Ź ich 50 žančyn byli asudžanyja da pazbaŭleńnia voli ŭ kałonii, adna — da «chimii». Troch žančyn vydvaryli z krainy — dvuch pravaabaroncaŭ i adnu žurnalistku.

14 hadoŭ i 9 miesiacaŭ — maksimalny termin prysudu pamiłavanaj palitźniavolenaj

Heta prysud kaardynatarki Vałanciorskaj słužby «Viasny» Marfy Rabkovaj. Jana ŭtrymlivałasia za kratami bolš za piać z pałovaj hadoŭ kałonii. Pamiłavali taksama palitołaha Valeryju Kaściuhovu, jakuju asudzili da 10 hadoŭ kałonii.

Minimum 34 pamiłavanyja byli asudžanyja da dvuch i dvuch z pałovaj hadoŭ niavoli. Pry hetym, niekatorych zatrymali ŭ 2024 hodzie — ich terminy chutka pavinny byli skončycca. Tak, naprykład, Alaksandra Šabuniu zatrymali 25 śniežnia 2024 hoda i pavodle art. 342 KK pryznačyli dva hady kałonii. 31 kastryčnika 2024 hoda pa «spravie dvarovych čataŭ» zatrymali Anastasiju Sikiryckuju. Jon pryznačyli dva hady kałonii, jakija zakančvajucca sioleta. Takaja ž situacyja ŭ Ludmiły Ksiandzovaj i šmat inšych.

Taksama siarod pamiłavanych šmat tych, kaho tolki pieraviali ŭ kałonii paśla razhladu ich apielacyjnych skarhaŭ na prysudy.

Samym maładym z vyzvalenych palitviaźniaŭ pa 20 hadoŭ, najstarejšym — 70 hadoŭ

Trom pamiłavanym palitviaźniam tolki pa 20 hadoŭ. Heta Stanisłaŭ Amieljaniuk z Žabinki, asudžany za «ździek ź dziaržaŭnych simvałaŭ»; Uładzisłaŭ Horski z Hrodzienščyny, asudžany da «chimii» za «sadziejničańnie ekstremisckaj dziejnaści»; Alaksandr Markin z Babrujska, asudžany pa «spravie Hajuna» da «chatniaj chimii».

Z krainy vydvaryli Mikitu Załatarova, jakomu ciapier 21 hod. Chłopiec byŭ zatrymany, kali jamu było jašče 16 hadoŭ — 11 žniŭnia 2020 hoda. Mikita — chvory na epilepsiju. Jon paviedamiŭ, što jašče za try dni da vyzvaleńnia znachodziŭsia pad kropielnicaj. A vyzvalili jaho prosta z ŠIZA.

Samaj starejšaj palitźniavolenaj — 70 hadoŭ. Heta Alena Viarbickaja, asudžanaja da kałonii za salidarnaść z palitviaźniami. 

Ahułam u śpisie pamiłavanych naličvajecca 17 čałaviek va ŭzroście bolš za 60 hadoŭ. Pavodle infarmacyi pravaabaroncaŭ, jak minimum 12 pamiłavanych palitźniavolenych — piensijnaha ŭzrostu.

Minimum 84 paliźniavolenyja byli zatrymanyja ŭ 2025 hodzie

Pavodle źviestak «Viasny», jak minimum 84 palitźniavolenych byli zatrymanyja letaś. Zatrymanych u 2024 hodzie — minimum 76 palitźniavolenych. Šeść palitviaźniaŭ byli ŭ niavoli z 2021 hoda. 

Dzieviać čałaviek byli zatrymanyja jašče ŭ 2020 hodzie i ŭtrymlivalisia za kratami bolš za piać hadoŭ. Usich, akramia Alaksieja Mielnikava z Mahilova, vydvaryli z krainy. Siarod ich — Kirył Kaziej, asudžany da siami hadoŭ niavoli; Dźmitryj Kubrakoŭ, jakoha zatrymali 11 žniŭnia 2020 hoda i asudzili da vaśmi hadoŭ kałonii. Pamiłavali taksama asudžanaha da 13 hadoŭ błohiera Eduarda Palčysa — jon byŭ zatrymany 27 vieraśnia 2020 hoda. Vydvaryli ź Biełarusi i Kima Samusienku, jaki byŭ zatrymany 3 listapada 2020 hoda.

Minimum 31 palitviazień, asudžany da «chimii»

Pavodle infarmacyi «Viasny», jak minimum 31 palitźniavoleny sa śpisa pamiłavanych byŭ asudžany da abmiežavańnia voli z nakiravańniem u papraŭčuju ŭstanovu adkrytaha typu («chimii»). Siarod ich — uładalnik haradzienskaj etnakramy «Cudoŭnia» Andrej Nieściarovič. Jon byŭ nakiravany adbyvać paŭtarahadovy termin za ŭdzieł u pratestach u viciebskaje PUAT № 9. Dniom 20 sakavika jaho adpravili z pracy dadomu.

Minimum 8 čałaviek asudžanyja da «chatniaj chimii» — bolšaść pa «spravie Hajuna»

Pavodle infarmacyi «Viasny», minimum vosiem palitźniavolenych sa śpisa pamiłavanych asudžanyja da abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaj chimii»). Siarod ich — siem fihurantaŭ «spravy Hajuna» Uładzimir Patapienka, Chakbierdzi Mamiedaŭ, Alaksandr Markin, Alaksandr Łabuzaŭ, Alaksiej Drupaŭ, Alaksandr Duleba, Dźmitryj Caruk. Pamiłavany taksama płyviec i kandydat u majstry sportu, asudžany da «chatniaj chimii» za ŭdzieł u akcyjach pratestu Dźmitryj Ščamier.

Fihuranty «spravy dvarovych čataŭ»

Pa «spravie dvarovych čataŭ» na voli apynulisia 27 palitviaźniaŭ, bolšaść ź jakich — žančyny. Siarod ich — 53-hadovaja Volha Matusievič, 46-hadovaja Taćciana Miniec, 58-hadovaja Ryta Navumava, 62-hadovaja Maryna Pietražyckaja.

Taksama ŭ śpisie pamiłavanych 58‑hadovaja palitźniavolenaja Maret Valuk. Žančyna maje druhuju niepracoŭnuju hrupu invalidnaści, vydalenuju ščytapadobnuju załozu i maje patrebu ŭ rehularnym pryjomie lekaŭ. Maret zatrymali pa «spravie dvarovych čataŭ» vosieńniu 2024 hoda. Jaje abvinavacili ŭ «stvareńni ekstremisckaha farmavańnia» (art. 361-1) i letam 2025 hoda asudzili da dvuch z pałovaj hadoŭ kałonii.

Vyzvalenuju Maryju Dziejčyk na volu čakali troje dziaciej. Jaje zatrymali ŭ kastryčniku 2024 hoda i abvinavacili pa «spravie čataŭ» pavodle č. 3 art. 361‑1 KK (stvareńnie ekstremisckaha farmavańnia abo ŭdzieł u im) i č. 1 art. 130 KK (raspalvańnie varožaści ci varažniečy). Joj pryznačyli dva hady dzieviać miesiacaŭ kałonii, a taksama 1 000 bazavych vieličyń štrafu.

Palitviaźni z surjoznymi prablemami sa zdaroŭjem 

U minimum dzieviaci pamiłavanych palitviaźniaŭ byli surjoznyja prablemy sa zdaroŭjem i invalidnaść. Tak, Ihar Šumiłaŭ maje invalidnaść treciaj hrupy — raniej jon trapiŭ u DTZ i straciŭ nahu, a taksama praz heta maje surjoznuju prablemu z pravaj rukoj. Jaho asudzili da čatyroch z pałovaj hadoŭ kałonii. 

Žurnalist Aleh Supruniuk, jaki taksama ŭ śpisie, maje invalidnaść pa słychu. U kałonii jamu nie dali mahčymaści karystacca słychavym aparatam. Z hetaj pryčyny Aleh praktyčna ničoha nie čuŭ i mieŭ vializnyja prablemy ŭ kamunikacyi ź inšymi ludźmi. Jon byŭ asudžany da troch hadoŭ kałonii za «ŭdzieł u ekstremisckim farmavańni».

U piaci pamiłavanych za kratami zastajucca svajaki 

U niekatorych vyzvalenych za kratami jašče zastajucca svajaki i blizkija. Tak, u departavanaj žurnalistki Kaciaryny Bachvałavaj (Andrejevaj) u niavoli ŭtrymlivajecca muž Ihar Iljaš, asudžany za žurnalisckuju dziejnaść da čatyroch hadoŭ kałonii. U 21-hadovaha Mikity Załatarova za kratami baćka Michaił Łapunoŭ.

U pamiłavanaha i asudžanaha pa «spravie dvarovych čataŭ» Siarhieja Daronina ŭ kałonii zastałasia žonka Natalla, jakuju asudzili pa hetaj ža spravie.

Troch pravaabaroncaŭ vydvaryli z krainy

19 sakavika byli pamiłavanyja namieśnik staršyni «Viasny» i były vice-prezident Mižnarodnaj fiederacyi za pravy čałavieka (FIDH) Valancin Stefanovič, kaardynatarka Vałanciorskaj słužby «Viasny» Marfa Rabkova, a taksama pravaabaronca z Human Constanta Nasta Łojka.

Marfu Rabkovu zatrymali 17 vieraśnia 2020 hoda. Jaje ŭtrymlivali za kratami piać z pałovaj hadoŭ. Paźniej pravaabaroncu asudzili da 15 hadoŭ źniavoleńnia i vielizarnaha štrafu. U źniavoleńni ŭ Marfy mocna pahoršyłasia zdaroŭje.

Valancina Stefanoviča ŭtrymlivali za kratami bolš za čatyry hady i vosiem miesiacaŭ. 14 lipienia 2021 hoda jaho zatrymali razam z Uładziem Łabkovičam i Alesiem Bialackim. U sakaviku 2023‑ha viasnoŭcam pryznačyli vialikija terminy: Uładziu — 7 hadoŭ kałonii, Valancinu — 9 hadoŭ kałonii, Alesiu — 10 hadoŭ kałonii. 

Nasta Łojka ŭtrymlivałasia ŭ źniavoleńni bolš za try hady i try miesiacy. U červieni 2023‑ha hodu ŭ Minskim haradskim sudzie palitźniavolenaj pryznačyli 7 hadoŭ kałonii za padrychtoŭku dakłada «Pieraśled anarchistaŭ, antyfašystaŭ, levych i sacyjalnych aktyvistaŭ u Biełarusi». U niavoli na Nastu akazvaŭsia cisk: naprykancy letam 2025 hodu Nastu źmiaścili na šeść miesiacaŭ u pamiaškańnie kamiernaha typu.

Pamiłavanyja piać žurnalistaŭ

19 sakavika z krainy vydvaryli žurnalistku «Biełsata» Kaciarynu Bachvałavu (Andrejevu). Jaje zatrymali paśla žyvoha efiru ź miesca žorstkaha razhonu siłavikami demanstrantaŭ na «Płoščy Pieramien» u Minsku 15 listapada 2020 hoda. Žurnalistku asudzili na dva hady kałonii. U 2022 hodzie Kaciarynu asudzili za «zdradu dziaržavie» da 8 hadoŭ i troch miesiacaŭ u kałonii.

Pamiłavali i pakinuli ŭ Biełarusi jašče čatyroch palitźniavolenych žurnalistaŭ: Antona Kazielskaha, Alaksandra Marčanku, Aleha Supruniuka, Dźmitryja Navažyłava. Usich, akramia apošniaha, asudzili da troch hadoŭ kałonii. Byłoha dyrektara infarmacyjnaha ahienctva BiełaPAN Dźmitryja asudzili da vaśmi hadoŭ kałonii.

Minimum 42 fihuranty «spravy Hajuna»

Pavodle infarmacyi «Viasny», pa «spravie Hajuna» vyzvalili minimum 42 palitviaźni. Siarod ich — asudžanyja jak da kałonii, tak i da «chimii», a taksama da «chatniaj chimii».

U śpis pamiłavanych trapiła i hramadzianka Rasii Jarasłava Chromčankava. Homielski abłasny sud pryznačyŭ joj try hady pazbaŭleńnia voli ŭ kałonii va ŭmovach ahulnaha režymu.

Taksama vyzvalili kaardynatara pošukavaha atrada «Anioł», jakoha pasadzili za «sadziejničańnie ekstremizmu». Maksima Fiedaroviča asudzili da troch hadoŭ pazbaŭleńnia voli ŭ kałonii va ŭmovach ahulnaha režymu. Mužčynu sudzili za dzieviać vypadkaŭ pieradačy danych u «Hajun». Taksama jamu pryznačyli štraf — 500 bazavych vieličyń. 

Pravaabaroncy «Viasny» adznačajuć, što zatrymańni i sudy pa hetaj spravie adbyvajucca da hetaha času. «Viasna» maje infarmacyju pra jak minimum 183 paćvierdžanych fihurantaŭ spravy, jakich źmiaścili pad vartu. Ahulnaja ž ličba zatrymanych značna bolšaja — pravaabaroncam viadoma pra šerah zatrymańniaŭ, jakija adbylisia ŭ apošnija tydni.

15 asudžanych za salidarnaść z palitviaźniami

Pavodle infarmacyi «Viasny», pamiłavali 13 žančyn i dvuch mužčyn, jakich asudzili za salidarnaść z palitviaźniami. Častka pamiłavanych žančyn starejšaja za 50 hadoŭ: asudžanaj za salidarnaść z palitviaźniami Natalli Žyhar z Bresta — 69 hadoŭ, Alenie Viarbickaj — 70 hadoŭ, Alenie Taparkovaj — 55 hadoŭ, Volzie Łocmanavaj — 53 hady, Aksanie Lapko — 51 hod.

Taksama pamiłavali 61‑hadovuju palitźniavolenuju Natallu Ładućku, jakuju letaś pryznali vinavataj u «sadziejničańni ekstremisckaj dziejnaści» i asudzili jaje da čatyroch hadoŭ pazbaŭleńnia voli i 600 bazavych adzinak štrafu (24 000 rubloŭ).

Jašče adna pamiłavanaja — šmatdzietnaja maci Natalla Davydulina. U ich z mužam vialikaja siamja — piaciora dziaciej, ź jakich adna dačka ciapier jašče ŭ małodšaj škole. Adzin z synoŭ Natalli, Dzianis Davydulin — były palitviazień. Jaho zatrymali ŭ sakaviku 2021‑ha i prysudzili paŭtara hoda kałonii pa palityčnaj spravie. Natallu zatrymali padčas «rejdu pa salidarnaści» z palitviaźniami 23‑24 studzienia 2024 hoda. U vyniku jaje asudzili da troch hadoŭ pazbaŭleńnia voli ŭ kałonii ahulnaha režymu.

U studzieni 2024 hoda ŭ Biełarusi supracoŭniki KDB zładzili masavyja pieratrusy, dopyty i zatrymańni svajakoŭ i blizkich palitviaźniaŭ, a taksama byłych palitźniavolenych. Pryčynaj stała dapamoha siemjam palitviaźniaŭ, u tym liku ad inicyjatyvy «INeedHelpBY», jakuju napiaredadni ŭłady pryznali «ekstremisckim farmavańniem».

Proźvišča palitviaźnia Alaksandra Łykšyna taksama ŭ śpisie. Jaho dvojčy sudzili pa palityčnych spravach, apošni raz — pa spravie inicyjatyvy «piśmo.bieł». Jašče dva fihuranta hetaj spravy — Alaksandr Mazura i Pavieł Karaniuchin — zastajucca ŭ źniavoleńni. «Piśmo.bieł» — servis dla adpraŭki listoŭ źniavolenym, jakim karystalisia tysiačy biełarusaŭ. Inicyjatyvu pryznali «ekstremisckim farmavańniem» užo paśla zatrymańnia palitviaźniaŭ. Fihurantaŭ asudzili da pazbaŭleńnia voli pavodle art. 361‑1 Kryminalnaha kodeksa (stvareńnie ekstremisckaha farmavańnia abo ŭdzieł u im).

Try palitviaźni, jakich sudzili pa «spravie Revalucyjnaha dziejańnia». Ich usich departavali

Pa «spravie Revalucyjnaha dziejańnia» pamiłavali i vydvaryli z krainy troch palitźniavolenych: Alaksandra Kaźlanku, Paŭła Špietnaha, a taksama pravaabaroncu Marfu Rabkovu, jakuju sudzili razam ź imi. Alaksandra i Paŭła zatrymali 2 sakavika 2021 hoda, u miežach kryminalnaj spravy, zaviedzienaj na aktyvistaŭ anarchisckaha ruchu z Bresckaj vobłaści. U vyniku im pryznačyli pa siem z pałovaj i vosiem hadoŭ kałonii adpaviedna.

Usim vydvaranym nie addali pašparty.

11 palitviaźniaŭ, jakich asudzili za danaty

Pavodle źviestak «Viasny», 11 palitviaźniaŭ sa śpisa pamiłavanych byli asudžanyja za danaty («finansavańnie dziejnaści ekstremisckaha farmavańnia»). Heta 57‑hadovy asudžany da «chimii» Ihar Hubarevič; 56‑hadovaja asudžanaja da kałonii Žanna Daškievič; 47-hadovy Pavieł Charytonaŭ, asudžany da piaci hadoŭ kałonii. Siarod ich taksama 31-hadovaja Nadzieja Karankievič — za danaty jaje asudzili da piaci z pałovaj hadoŭ kałonii. Z žanočaj kałonii pavinny byli vyzvalić 37-hadovuju Alenu Šapkinu, jakoj pryznačyli piać hadoŭ źniavoleńnia za danaty.

Pamiłavali taksama 58-hadovaha Uładzimira Sitkoviča, jakomu za danaty pryznačyli try hady kałonii. Viadoma, što Uładzimir maje prablemy sa zdaroŭjem. Niekalki hadoŭ tamu ŭ jaho znajšli rakavuju puchlinu, jakuju apieravali. Ale paśla zatrymańnia nijakich miedycynskiych abśledavańniaŭ nie pravodzili, taksama nie dazvalali prymać leki. Taksama niezadoŭha da aryštu palitviazień lažaŭ u balnicy praz prablemy ź ciskam.

Minimum 28 asudžanych za ŭdzieł u pratestach 

Pavodle infarmacyi «Viasny», jak minimum 28 pamiłavanych palitźniavolenych byli asudžanyja za ŭdzieł u akcyjach pratestu pa ŭsioj Biełarusi. Siarod ich — fihurant «pinskaj spravy» Siarhiej Maŭšuk. Jamu pryznačyli šeść z pałovaj hodoŭ kałonii za ŭdzieł u pratestach u Pinsku. Jahonuju žonku Alenu Maŭšuk pamiłavali i departavali ŭ lutym 2025 hoda.

• 1
• 0
• 0
• 0
• 0
• 1
• 1
• 1