Daśledavańnie: sabaki nasamreč mohuć razumieć čałaviečuju dabryniu
Pavodle pracy aŭstryjskich daśledčykaŭ, sabaki zdolnyja razumieć namiery ludziej. Navukoŭcy vyśvietlili heta padčas ekśpierymientu, kali jany naŭmysna abo nienaŭmysna admaŭlali sabakam u ježy i sačyli pry hetym za ich reakcyjaj, piša The Times.
Kamanda ź Vienskaha univiersiteta vieterynarnaj miedycyny praviała ekśpierymient, u jakim paŭdzielničali 96 sabak roznych parod i ŭzrostaŭ. Navukoŭcy chacieli vyznačyć, nakolki sabaki zdolnyja ŭsprymać čałaviečyja namiery i razumiejuć ludziej. Naprykład, kali čałaviek čahości nie robić, to jon nie moža, albo śpiecyjalna hetaha nie žadaje?
Udzielnicu kamandy źmiaścili ŭ prazrystuju skryniu ź dzirkami ŭ piaredniaj paneli. Kali da skryni padychodziŭ sabaka, daśledčyca sprabavała pieradać jamu kavałak kaŭbasy praź dzirki ŭ paneli.
Časam ekśpierymientatarka padnosiła ježu da dzirki, ale potym chutka adciahvała ruku ad paneli, nibyta dražniła sabaku. U inšych vypadkach žančyna praciahvała ruku da dzirki, a potym nibyta vypadkova ŭpuskała kaŭbasu z ruk.
Sabaki reahavali bolš nieciarpliva ŭ tych vypadkach, kali čałaviek nibyta nie chacieŭ davać im ježu, čym tady, kali ŭ jaho vypadkova nie atrymoŭvałasia heta zrabić. Svajo staŭleńnie žyvioły vykazvali tym, što radziej padychodzili da ekśpierymientatarki i čaściej ad jaje adychodzili. Taksama jany bolš času lažali — jak śviedčyć inšaja praca, sabaki tak robiać, kali čałaviek, jaki za imi naziraje, zabaraniaje im jeści.
Kali čałaviek «vypadkova» nie moh dać sabakam kaŭbasu, jany čaściej machali chvastom u pravy bok. Mierkavana, taki kirunak źviazany ź levym paŭšarjem mozha sabak, u jakim apracoŭvajucca stanoŭčyja emocyi, tamu možna zrabić vysnovu, što ŭ takich vypadkach žyvioły dobra stavilisia da ekśpierymientatarki.
Vajna i chvastatyja siabry. Ščymlivyja historyi pra vyprabavańni i luboŭ
Sabaka štonočy prychodziŭ da niemaŭlaci dla taho kab upeŭnicca, što ź im usio dobra. Hetaje VIDEA stała virusnym
Ciapier čytajuć
Aryštavany 75‑hadovy Źmicier Sańko — vieteran-vydaviec3
Kamientary