25‑hadovaja ispanka dva hady zmahałasia za prava na eŭtanaziju paśla hrupavoha zhvałtavańnia i invalidnaści. I ŭrešcie pieramahła

Naelija Kastylja Ramos naradziłasia ŭ Barsiełonie. Jak piša El Pais, kali dziaŭčynie było 13 hadoŭ, jaje baćki raźvialisia i stracili dom, u vyniku čaho jana razam ź siostrami trapiła ŭ sacyjalny prytułak. Pa słovach samoj Naelii, jana stała achviaraj niekalkich vypadkaŭ seksualnaha hvałtu.

Apošni raz, kali joj byŭ 21 hod, jaje zhvałcili troje chłopcaŭ. Paśla hetaha ŭ jaje raźviłasia ciažkaja kliničnaja depresija. Psichałahičny stan dziaŭčyny imkliva paharšaŭsia: jana straciła adčuvańnie biaśpieki, kantrolu nad ułasnym žyćciom i budučyniaj. Na hetym fonie źjavilisia suicydalnyja dumki i adpaviednyja pavodziny.

Dziaŭčyna zrabiła dźvie sproby samahubstva. Padčas druhoj ź ich, u kastryčniku 2022 hoda, Naelija skoknuła ź piataha paviercha i atrymała ciažkija traŭmy, jakija pryviali da paraplehii — paraliču nižniaj častki cieła.

Na praciahu amal dvuch hadoŭ jana znachodziłasia ŭ balnicach i reabilitacyjnych ustanovach. Jaje žyćcio było źviazana z pastajannym dohladam i poŭnaj zaležnaściu ad inšych ludziej. Miedyki charaktaryzavali jaje stan jak ciažki i niezvarotny.

Pavodle ich acenki, jakuju pryvodzić vydańnie El Confidencial, stupień invalidnaści Naelii skłała 74%. Paškodžańnie pajaśničnaha adździeła śpinnoha mozhu nie paddavałasia ni lačeńniu, ni reabilitacyi. Dziaŭčyna pakutavała na mocnyja nieŭrapatyčnyja boli, jakija składana kantralavać, a taksama na stratu kantrolu nad funkcyjami vydzialalnaj sistemy.

U 2024 hodzie Naelija pryniała rašeńnie padać zajavu na eŭtanaziju. U Ispanii hetaja pracedura lehalizavanaja z 2021 hoda, ale jana patrabuje składanaj i šmatstupienčataj pravierki. Jaje vypadak prajšoŭ praz usie nieabchodnyja etapy: ekśpiertyzu pravodzili lekary roznych śpiecyjalnaściej, psichołahi i psichijatry. Asnoŭnym pytańniem było nie tolki fizičnaje zdaroŭje, ale i zdolnaść pacyjentki prymać uśviadomlenaje rašeńnie.

Pavialičyć

U vyniku kamisija pryjšła da vysnovy, što stan Naelii adpaviadaje kryteram zakona: jon ciažki, chraničny i niezvarotny, pakuty — pastajannyja i značnyja, a sama jana zachoŭvaje jasnuju śviadomaść i zdolnaść samastojna zrabić vybar. Na hetaj padstavie joj byŭ dadzieny aficyjny dazvoł na eŭtanaziju, jakaja pavinna była adbycca 2 žniŭnia.

Adnak za dzień da pryznačanaj daty baćka dziaŭčyny padaŭ apielacyju. Mužčyna śćviardžaŭ, što jaho dačka pakutuje na psichičnyja razłady z suicydalnymi schilnaściami i joj patrebna psichałahičnaja dapamoha, a nie dapamoha ŭ sychodzie z žyćcia. Jon nastojvaŭ, što paraplehija nie pryčyniaje joj nievynosnaha bolu ci pakut, śćviardžaŭ, što jana moža chadzić na mylicach i što jaje fizičny stan nibyta palapšajecca.

Akramia taho, baćka adkryta kazaŭ pra ŭłasnyja pakuty i niežadańnie prymać taki chod padziej. Kab spynić praceduru, jon źviarnuŭsia ŭ sud i pryciahnuŭ jurydyčnuju padtrymku arhanizacyi «Chryścijanskija advakaty», viadomaj svajoj kansiervatyŭnaj pazicyjaj u pytańniach žyćcia i śmierci.

U vyniku šlach Naelii da eŭtanazii zaciahnuŭsia. Jaje sprava stała pieršym padobnym pracesam u Ispanii i prajšła praź piać sudovych instancyj. Niahledziačy na sproby baćki i relihijnych aktyvistaŭ zabłakavać rašeńnie, sudy ŭsich uzroŭniaŭ — ad miascovaha da Viarchoŭnaha, Kanstytucyjnaha i navat Jeŭrapiejskaha suda pa pravach čałavieka (kudy taksama źviartaŭsia baćka) — paćvierdzili jaje prava na dobraachvotnuju śmierć.

Paśla praciahłaj jurydyčnaj baraćby ŭsie pieraškody byli źniatyja, i praceduru pryznačyli na 26 sakavika. Napiaredadni Naelija dała intervju adnamu ź ispanskich telekanałaŭ.

«Moža, choć ciapier ja zmahu adpačyć, bo ŭ mianie bolš niama sił tryvać hetuju siamju, niama sił ciarpieć hety bol i ŭsio toje, što mučyć mianie paśla ŭsiaho, što ja pieražyła», — skazała dziaŭčyna.

• 4
• 5
• 2
• 4
• 10
• 70
• 0
• 0