Miač, jaki kranuła ruka Maradony ŭ 1986 hodzie, pradali za rekordnyja 2,4 miljona dalaraŭ
Futbolny miač, jakim arhiencinski futbalist Dyjeha Maradona zabiŭ dva hały ŭ čverćfinale čempijanatu śvietu 1986 hoda ŭ matčy suprać Anhlii, pradadzieny na aŭkcyjonie za 2 młn funtaŭ (2,4 młn dalaraŭ), piša Bi-bi-si.
Pieršy hoł, zabity ŭ matčy pamiž zbornymi Anhlii i Arhienciny, staŭ adnym z samych znakamitych u historyi. Na 52-j chvilinie, pry liku 0:0, znachodziačysia ŭ štrafnoj supiernika, Maradona padskočyŭ adnačasova z bramnikam Anhlii Piteram Šyłtanam i kułakom pasłaŭ miač u varoty. Paźniej jon skazaŭ, što hoł byŭ zabity «častkova hałavoj Maradony, a častkova — rukoj Boha».
Jašče praz čatyry chviliny Maradona zabiŭ hoł, viadomy siońnia jak «hoł stahodździa». Jon atrymaŭ miač na svajoj pałovie pola i pačaŭ ruch da bramy supiernikaŭ, abvodziačy adnaho hulca za adnym. Prajšoŭšy piaciarych futbalistaŭ anhlijskaj zbornaj, jon abvioŭ bramnika i zabiŭ hoł. U vyniku anhličanie prajhrali ź likam 1:2.
Brytanski aŭkcyjonny dom Graham Budd pradavaŭ miač, jaki znachodziŭsia na poli na praciahu ŭsiaho hetaha matča, takim čynam jaho novy ŭładalnik zmoh u peŭnaj stupieni dałučycca adrazu da dvuch znakamitych hałoŭ Maradony. Imia pakupnika nie nazyvajecca.
Paśla matča miač trapiŭ va ŭłasnaść da tuniskaha refiery Ali Bin Nasiera, jaki sudziŭ matč — i pryniaŭ kančatkovaje rašeńnie, što «padpraŭleny» kułakom miač zalacieŭ u varoty pa praviłach.
Svajo rašeńnie Nasier patłumačyŭ tak: «Toje, što adbyłosia, ja jak śled nie bačyŭ. Pierada mnoj znachodzilisia dva hulcy: [bramnik zbornaj Anhlii Piter] Šyłtan i Maradona. Pavodle rekamiendacyj FIFA, zroblenych da čempijanatu, ja pahladzieŭ na bakavoha sudździu, kab paćvierdzić, ci byŭ hoł zabity pa praviłach. Sudździa pabieh da siaredniaj linii, pakazaŭšy takim čynam, što hoł byŭ sapraŭdy zabity».
Ciapier Bin Nasier pradaŭ znakamity miač. Pierad aŭkcyjonam refiery vykazaŭ nadzieju, što novy ŭładalnik vystavić jaho na ŭsieahulny ahlad.
Sioleta ŭ mai futbołka, u jakoj Maradona hulaŭ padčas čverćfinału sa zbornaj Anhlii, syšła z aŭkcyjona za 9,3 młn dalaraŭ. Takim čynam byŭ pastaŭleny novy rekord prodažaŭ spartyŭnych relikvij na aŭkcyjonach.
Ciapier čytajuć
Chto pradaŭ kvateru ŭ «Majaku Minska» źnikłaj Mielnikavaj? Takoha čałavieka nie isnuje14
Kamientary