U Brazilii vyzvalili zaniatyja pratestoŭcami pałac prezidenta i Kanhres
Palicyja Brazilii vyzvaliła prezidencki pałac Płanałtu, a taksama budynki Nacyjanalnaha kanhresa i Viarchoŭnaha suda krainy, zaniatyja pratestoŭcami — prychilnikami byłoha prezidenta Žaira Bałsanaru. Pa słovach hubiernatara fiederalnaj akruhi Brazilia Ibaniejsa Roča, paśla biesparadkaŭ byli zatrymanyja bolš za 400 čałaviek, piša «Nastojaŝieje vriemia».
Jany «zapłaciać za ździejśnienyja złačynstvy», paabiacaŭ hubiernatar. Samoha Roča na 90 dzion adchilili ad pasady rašeńniem Viarchoŭnaha suda za «biaździejnaść i paturańnie». Kiraŭnik dziaržavy Łuis Inasiu Łuła da Siłva zajaviŭ, što ŭsie ŭdzielniki biesparadkaŭ «vyśviatlajucca i buduć pakaranyja».
Kali pačalisia biesparadki, da Siłva nie było ŭ stalicy, jon jeździŭ u štat San-Paŭłu, dzie inśpiektavaŭ nastupstvy pavodak u municypalitecie Ararakuara.
Prezident uvioŭ u Brazilia režym nadzvyčajnaha stanovišča, jaki budzie dziejničać da kanca studzienia.
U pratestach u asnoŭnym udzielničali prychilniki Bałsanaru, jaki pravodziŭ palityku vielmi pravaha kirunku. Jany admovilisia pryznać jaho niadaŭniuju parazu na vybarach (Bałsanaru atrymaŭ 49,2% hałasoŭ vybarščykaŭ, a Łuła da Siłva — 50,8%). Ministr justycyi krainy Fłavia Dzina nazvaŭ dziejańni napadnikaŭ «teraryzmam» i abvinavaciŭ ich u sprobie zładzić dziaržaŭny pieravarot.
Toje, što adbyvajecca, asudziŭ i Bałsanaru, zajaviŭšy, što «rabavańni i praniknieńni ŭ hramadskija budynki parušajuć ustanoŭleny paradak». Eks-prezident pakinuŭ krainu ŭ kancy śniežnia, za dva dni da zakančeńnia terminu svaich paŭnamoctvaŭ. Ciapier jon znachodzicca ŭ amierykanskim štacie Fłaryda, u Arłanda.
Ciapier čytajuć
Siarhiej Cichanoŭski pierabraŭsia žyć u Łos-Andželes18
Kamientary