Łukašenkaŭski pradstaŭnik pry AAN: Niekatoryja zachodnija palityki — jak padhuźniki, ich treba časta mianiać
Aficyjny pastajanny pradstaŭnik Biełarusi pry AAN Valancin Rybakoŭ na pasiadžeńni Rady biaśpieki AAN šelmavaŭ jeŭrapiejskich palitykaŭ i zajaviŭ, što nie budzie asudžać Rasiju za vajnu.
Rybakoŭ abvinavaciŭ Ukrainu i krainy Zachadu ŭ tym, što jany schłusili i padpisali Minskija pahadnieńni, kab skarystać pieramoŭny praces dla vajennych padrychtovak «z metaj vyrašeńnia kanfliktu ŭzbrojenym šlacham», piša BiełTA.
Jon spasłaŭsia na niekatoryja cytaty jeŭrapiejskich palitykaŭ. Naprykład, na słovy eks-kanclerki Hiermanii Anhieły Mierkiel, jakaja ŭ śniežni kazała ŭ intervju: «Minskija pahadnieńni 2014 hoda byli sprobaj dać čas Ukrainie. Jana taksama vykarystała hety čas, kab stać macniejšaj, jak vy možacie bačyć siońnia. Ukraina 2014/15 — heta nie Ukraina siońnia. I ja vielmi sumniavajusia, što tady krainy NATO mahli zrabić stolki, kolki robiać ciapier dla dapamohi Ukrainie».
Zhadaŭ jon taksama słovy byłoha prezidenta Francyi Fransua Ałanda: «Z 2014 hoda Ukraina ŭmacavała svaju vajennuju pazicyju. Sapraŭdy, ukrainskaja armija całkam adroźnivałasia ad toj, što była ŭ 2014 hodzie. Jana stała lepš navučanaj i abstalavanaj. Zasłuha Minskich pahadnieńniaŭ u tym, što jany dali ŭkrainskaj armii takuju mahčymaść».
«Usie hetyja vykazvańni — dazvolcie mnie źviarnucca da narodnaj tvorčaści — nahadvajuć mnie nalepku na bampiery na mašynie, jakuju ja tut u Ńju-Jorku ŭbačyŭ niekalki hadoŭ tamu. Jana, pa-mojmu, idealna pieradaje staŭleńnie da padobnaha rodu dziejačoŭ. Na nalepcy było napisana: «Niekatoryja palityki — jak padhuźniki. Ich treba časta mianiać. I pa toj ža pryčynie», — vykazaŭsia dypłamat.
Jon prapanavaŭ na Hienasamblei AAN razhladać nie prajekt rezalucyi z abvinavačvańniami Rasii ŭ vajennaj ahresii, a dać acenku «dobraachvotnym pryznańniam» jeŭrapiejskich palitykaŭ.
U dakumiencie, ličyć łukašenkaŭski dypłamat, ni słova nie havorycca «ab praŭdzivych pryčynach ciapierašniaha kanfliktu — źniščeńni na praciahu vaśmi hadoŭ žycharoŭ Danbasa, adradžeńni va Ukrainie nacyzmu, aktyŭnych dziejańniach Zachadu pa pieratvareńni Ukrainy ŭ anty-Rasiju».
«A ja vam adrazu ciapier, za tydzień da hetaha mierapryjemstva zajaŭlaju, što Biełaruś nie budzie vystupać na hetym šou, ale my prahałasujem suprać hetaha prajekta rezalucyi,
kali ŭ jaho nie buduć uniesienyja adpaviednyja źmieny, u tym liku i parahraf z samym rašučym asudžeńniem dziejańniaŭ zhadanych mnoj vyšej piersanažaŭ», — zajaviŭ Valancin Rybakoŭ.
Kamientary