Doktar z Homiela sabraŭ bolš za 300 telefonaŭ Nokia roznych hadoŭ. A jašče procivahaz i humovyja boty ad hetaha brenda FOTY
U kalekcyi aniestezijołaha-reanimatołaha RNPC radyjacyjnaj miedycyny i ekałohii čałavieka Siarhieja Chadanoviča bolš za 300 aparataŭ firmy Nokia. Pra niezvyčajnaje zachapleńnie doktara piša «Homielskaja praŭda».
— Uviesnu 2017 hoda ŭźnikła dumka: a što kali pačać kalekcyjanavać aparaty? Prosta sam sabie kinuŭ vyklik — zmahu ci nie? Da hetaha času nie mahu adkazać na pytańnie, čamu mienavita hetuju marku abraŭ. Usio adbyłosia zusim spantanna.
Pieršaj madellu stała Nokia 7710, jaje Siarhiej znajšoŭ u internecie i nabyŭ za nievialikija pa tahačasnych mierkach hrošy. Telefon zacikaviŭ jaho svaim vonkavym vyhladam: heta byŭ adzin ź pieršych sieryjnych sensarnych aparataŭ finskaj kampanii. Dla 2005 hoda litaralna praryŭ. Da taho ž pašancavała ź jakaściu.
— U našych krajach składana znajści jaho ŭ vydatnym abo dobrym stanie, zvyčajna surjoznaja stupień znosu. A hety choć i byŭ užo ŭ karystańni, ale rabočy, biez bačnych paškodžańniaŭ — idealny pa vonkavych i ŭnutranych charaktarystykach. Hetym ja i adroźnivajusia ad prafiesijnych kalekcyjanieraŭ — jany zvyčajna šukajuć novyja aparaty z aryhinalnym kamplektam, upakoŭkaj. Dla mianie ž dastatkova, kab telefon pracavaŭ i vyhladaŭ hodna.
Dalej kalekcyjanier pačaŭ šukać i nabyvać madeli pa takim ža pryncypie. Chutka źjavilisia novyja znajomstvy. Siabry z entuzijazmam uspryniali chobi Siarhieja i pačali dapamahać u pošuku, pieradavać jamu ŭsio bolš telefonaŭ Nokia.
— Ź niekatorymi pasiabravaŭ nastolki, što jany stali dasyłać mnie ich pačkami. Za hety čas znajomyja z Maskvy adpravili kala sta madelaŭ. Jość telefony z Rasii, Estonii, ZŠA, inšych krain.
Čym hłybiej Siarhiej Chadanovič pahružaŭsia ŭ temu, tym bolš daviedvaŭsia ab kampanii Nokia. Vyśvietliłasia, što brend źjaviŭsia ŭ siaredzinie XIX stahodździa, pieršapačatkova firma zajmałasia drevaapracoŭkaj i vytvorčaściu vyrabaŭ z humy: šynaŭ, abutku, procivahazaŭ…
U hamialčanina jość asobnik tych časoŭ: raspylalnik paraškapadobnych rečyvaŭ, vyrableny ŭ pieršaj pałovie XX stahodździa, heta samy stary pradmiet kalekcyi. Vyrab nahadvaje klizmu, ale ź mietaličnym nakaniečnikam inšaj formy, u vyhladzie sietački, praź jakuju možna raspylać talk. Jość na palicy Siarhieja i procivahaz, jaki byŭ na ŭzbrajeńni finskaj armii. A jašče abutak: humovyja boty, tufli, kiedy. I suvienirnaja pradukcyja: znački, pamiatnyja žetony. Mara doktara — zdabyć papieru Nokia dla kapiravalnaj techniki.
Na hety momant samym darahim asobnikam svajoj kalekcyi źbiralnik ličyć smartfon N92. Jon nie pryznačaŭsia dla prodažu na postsavieckaj prastory, aparat nie rusifikavany. Zatoje ŭ im jość svaja fiška — padtrymka mabilnaha telebačańnia, što dla siaredziny 2000-ch było ekskluzivam. Ekran krucicca, padvojnaja kłavijatura, kamiera fiksujecca — redkaść, adnym słovam.
Ź cikavaha taksama madel 9300i — niešta nakštałt mini-kampjutara z funkcyjaj Wi-Fi, raskoša dla 2005 hoda niabačanaja.
Kultavaja madel 8910 z tytanavym korpusam była telefonam kłasa luks, jana taksama zajmaje asablivaje miesca ŭ kalekcyi Siarhieja. Vysokaja cana na aparat i ciapier — usio ž materyjał nie samy standartny dla vytvorčaści mabilnika. Taksama admietny
Nokia 8110, tak zvany «banan», mnohija pamiatajuć jaho pa filmie «Matryca».
U liku lubimych u hamialčanina madel 770 Internet Tablet — pravobraz sučasnaha płanšeta, N-Gage — hulniavaja prystaŭka i smartfon u adnym korpusie.
Va ŭsie madeli ŭstaŭleny simki, kožny telefon možna ŭklučyć i vykarystoŭvać pa pryznačeńni.
— Dla pracy ŭ mianie iPhone, a astatniaje dla dušy. Ale časam u jakaści asnoŭnaha telefona vykarystoŭvaju niešta z kalekcyi. Pahladzicie na ich, jany ŭsie roznyja! U hetym taksama svaja cikavaść. A zaraz što? Biezabličnyja pramavuholniki. Raniej byŭ palot inžyniernaj dumki i svoj firmovy počyrk, styl, — dzielicca źbiralnik. — Adzinaja prablema ŭ najbolš staražytnych aparataŭ — batarei. Na niekatoryja madeli žudasny deficyt. I niemałavažna: ich treba zachoŭvać asobna, ale nie ŭsie heta viedajuć. Batareja moža razdźmucca, łopnuć, paškodzić aparat i sapsavacca sama. Ja zachoŭvaju ich u asobnaj skryni. Plus Nokia va ŭzajemazamianialnaści elemientaŭ siłkavańnia — niekatoryja typy ich akumulataraŭ padychodziać prykładna da niekalkich dziasiatkaŭ madelaŭ.
Tych, chto źbiraje pradukcyju Nokia ŭ Biełarusi ŭ takim maštabie, Siarhiej nie sustrakaŭ. Jość tyja, chto kalekcyjanuje madeli inšych marak, chtości tolki redkija ci najbolš kaštoŭnyja. Dla suviazi ŭ amataraŭ retra-techniki jość hrupa ŭ vajbiery.
— Ja ćviorda vyrašyŭ, što ni pry jakich abstavinach pradavać ekzemplary svajoj kalekcyi nie budu. Chiba što paŭtarajucca madeli, i to imknusia ich vymianiać na niešta redkaje, — pryznajecca doktar.
Darečy, Siarhiej u svoj čas nabyŭ taksama pejdžar i netbuk brenda Nokia, i heta taksama častka kalekcyi. Hałoŭnaje pytańnie — dzie ŭsio heta raźmiaścić. Asobniki spakavanyja i čakajuć svajho času. Źbiralnik płanuje abstalavać śpiecyjalnaje pamiaškańnie, kab arhanizavać nievialiki muziej. A pakul možna zazirnuć na virtualnuju vystavu prosta ŭ instahram-akaŭncie ŭładalnika aparataŭ pad nikam @narkozist_nokia.
-
«Adzin raz za sto hadoŭ prajechaŭ na transparcie». Žycharu Mahilova ŭ aŭtobusie dali zdaču rasijskimi manietami
-
Vučniaŭ, jakija z matam parvali ekzamienacyjnyja bilety pa historyi Biełarusi, zastavili vybačacca kala manumienta Pieramohi
-
«Mikałaja bili, dzie tolki jaho bačyli». Pra katavańni źniavolenaha anarchista Dziadka raskazała advakatka Mackievič
Ciapier čytajuć
«Mikałaja bili, dzie tolki jaho bačyli». Pra katavańni źniavolenaha anarchista Dziadka raskazała advakatka Mackievič5
Kamientary
spačatku tak - sprabavali nadavać indyvidualnaść madelam (ja pra płafony))
a zaraz adnolkavyja va ŭsich kirpičy