«Jak Vikipiedyja, ale tolki ŭ śviecie kartaŭ». Hrodzieniec raskazaŭ pra svajo niezvyčajnaje chobi

U svoj čas Siarhiej vyrašyŭ pasprabavać amatarskaje kartahrafavańnie ŭ OpenStreetMap (OSM) i nieŭzabavie ŭciahnuŭsia ŭ jaho.

«OSM — heta svabodnaja i adkrytaja karta śvietu, — raskazvaje Siarhiej. — Jana stvoranaja supolnaściu, što abjadnoŭvaje kartohrafaŭ z mnohich krain i na hety momant źjaŭlajecca samaj vialikaj adkrytaj kartaj na ziamli. U joj bolš za 6 miljardaŭ abjektaŭ: darohi, budynki, reki, lasy, kramy, kaviarni i inšyja miescy. Jak «Vikipiedyja», ale tolki ŭ śviecie kartaŭ».

Mahčymaść dadać na kartu niejkuju słavutaść, novuju darohu ci navat cełuju haru jakraz i pałaniła Siarhieja. Jość adčuvańnie, što, jak staražytnyja kartohrafy, ty robiš kartu bolš dakładnaj i karysnaj dla ludziej.

«Nie ŭsie viedajuć, što źviestki z OSM vykarystoŭvajucca paŭsiul u našym žyćci: heta i mabilnyja prahramy dla navihacyi (OsmAnd i MAPSME abo OrganicMaps), i karty dla veb-sajtaŭ, i prahramy dla prahnazavańnia nadvorja (Windy, Weather Underground), a taksama prahramy dla ludziej z abmiežavanymi mahčymaściami, što dapamahaje im lepš aryjentavacca ŭ navakolnym asiarodździ i atrymlivać dostup da patrebnych abjektaŭ i pasłuh», — natchniona dzielicca hrodzienski inžynier svaimi viedami.

A ŭ śviatle niadaŭnich ziemlatrusaŭ u Turcyi i Siryi humanitarnaja kamanda OSM prapanavała abnavić karty miascovaści dla dapamohi ratavalnym słužbam i inšym arhanizacyjam u efiektyŭnaj kaardynacyi namahańniaŭ — bazavyja karty byli biednymi abo mocna sastareli.

Voś tak, siedziačy doma ŭ Hrodnie i abmalavaŭšy paru damoŭ i daroh pa spadarožnikavych zdymkach, možna było stać vałancioram i prynieści karyść u humanitarnaj dapamozie hetym krainam u składany momant. Siarhiej hetak i zrabiŭ.

Ale ŭsio ž kudy bolš jamu padabajecca daśledavać novyja miescy i dadavać ich na kartu praz mabilnyja prahramy ŭ «palavych umovach».

Jon pravodzić šmat času za vyvučeńniem vulic, budynkaŭ i słavutaściaŭ u roznych haradach, dapamahajučy stvaryć najbolš dakładnuju kartu miascovaści. Heta dazvalaje i samomu daskanała paznavać cikavyja miescy i maršruty dla padarožžaŭ.

Isnuje šmat prahram dla redahavańnia OSM: ad prasunutaha Vespucci, dzie treba mieć siakija-takija navyki, što vyklikaje aściarohi ŭ pačatkoŭcaŭ, da StreetComplete, jakoje znachodzić niapoŭnyja i patrabujučyja ŭdakładnieńnia danyja vakoł vas i padaje heta ŭ vyhladzie zadańniaŭ-kvestaŭ, što vielmi zručna dla novych karystalnikaŭ.

Voś i Siarhiej ličyć, što dadavańnie, naprykład, hadzin pracy apteki abo infarmacyi pra najaŭnaść pandusa na leśvicy, — i sabie pryjemna, i inšym karysna.

«Redahavańnie kart openstreetmap — zajmalnaje chobi, jakoje moža prynosić karyść inšym ludziam i dapamahać u samaraźvićci: davać novyja viedy i navyki. Kožny moža ŭnieści svoj uniosak u prajekt, dadaŭšy novyja miescy na kartu i palepšyŭšy jaje jakaść.

Akramia taho, praca nad prajektam OSM padtrymlivaje ideju svabodnaha dostupu da viedaŭ i technałohij, što robić jaho jašče bolš važnym i cikavym dla mnohich ludziej», — upeŭnieny Siarhiej Dudzinski.

• 27
• 0
• 0
• 3
• 0
• 2
• 3
• 0